Read Q'anjob'al Gn 44 Bible Online

Gn 44 - Q'anjob'al bible

Gn 44

¹Max lajwi tu' max yalon cham José bay yilomal yatut: —Ak' noj is coẍtal eb nak ti' yetok ixim trigo, yalc'al jantak chi je' yiontok eb nak, cax chaon pax aytok ch'en tumin chi yak' junjun eb nak manon is trigo tu' yul ti' is coẍtal junjun eb.

²Cax chaon aytok in copa plata yetok ch'en tumin yul ti' is coẍtal nak tzunan unin, ch'en max yak'balnej nak manon is trigo, ẍi cham. Cax max yiken tzet max yal José.

³A yet wal max jay julnaj yakan c'u yet k'inibalil, max chalay meltzoj eb yetokc'al no chej bay is conob eb.

⁴Cawilto chi toj eb, cax max yalon cham José bay yilomal yatut axca ti': —Tzaklojan yintak eb nak tu'. A yet chi michchaj eb nak oj, cax chaloni: ¿Tzet yuj xan a is watx'c'ulalil in patrón, yobxa che yut e paktzen canok? ¿tzet yuj xan max e yelk'anejtek is copa naba plata,

⁵jun is copa bay chi yuc' is vino c'al k'anbalnen yet chi naon el junok k'anej? Caw wal yob tzet che yun ayex ti', cachi bay eb, ẍi cham José.

⁶Cax max toj nak, axa yet max michchaj eb nak yuj xin, max yalon bay eb axca max yut yalon cham José tu'.

⁷Max tak'wi eb nak bay: —¿Tzet yuj xan caytu' chot k'anjab a ba ayon mamin? ¿Tom c'am co nabal, xan tol ok on elk'anok?

⁸Ilab tol atac'al bay Canaán cajan on. Axa yet max on meltzojtek junelxa, max jion paxtek ch'en tumin ayaytok yul is ti' co coẍtal on. ¿Tom ato wal junok is tzet yetal oro ma plata yet cham a patrón tu' chi jelk'anejtek bay is yatut?

⁹A junok on bay chi ilchaj ajtek jun copa tu' yul is coẍtal, watx' tol mak'layokab camok, axa on co masanil, chon occan a chekbejok, ẍi eb nak.

¹⁰Max tak'wi cham axca ti': —Yunokab axca e yalon tu', palta asan nak bay ok ilchaj ajtek jun copa tu' wuj, a nak chi occan in chekbejok; axa ayex ti' e masanil bekan ex, ẍi cham.

¹¹Max yaon ay eb nak is coẍtal masanil yin aymanil, max jakon eb nak ti' is coẍtal tu'.

¹²Max sayon yil cham masanil yulak coẍtal tu'; max sayon yil yet nak babel winak yin babelal, yin c'al txolilal max yunej, masantac'al max apni oc sayon yil yet nak tzunan unin. Axa max yun xin, a tu' max ajtek ch'en copa tu' yul yet nak tzunan unin tu', a ton nak Benjamín.

¹³Max c'oli tzilontok eb nak is pichil yet chi tx'oxon el ba is cusc'ulal eb. Max lajwi tu', max yaon pax oc eb yikatz is burro tu' junelxa, axa meltzoj pax eb nak bay conob tu'.

¹⁴Ayto wal ec' José tu' bay yatut, max apni oc nak Judá yetok eb yuẍtak tu', cax max ay nojnaj eb nak satak cham, bay sat tx'otx'.

¹⁵Max yalon cham bay eb nak axca ti': —¿Tzet xan caytu' che yut e ba? ¿Tom man e yojtakok tol a junok winak ay yikbej axca in ti', tol chi je' nachaj el junok tzet yetal yuj? ẍi cham.

¹⁶Max tak'wi nak Judá axca ti': —¿Tzetto wal chi yun co tak'wi ayach mamin? ¿Tzetto wal chi yun ojtaknen elok ta watx' on jaloni? Ay co mul on yul sat co mam Dios, tix on ti' a satak xin. Chi je' chon oc a chekbejok yetok nak bay max ilchaj ajtek a copa tu', ẍi nak.

¹⁷Max yalon pax José axca ti': —C'amak, asan nak bay max ilchaj ajtek in copa tu', asan nak chi can in chekbejok. Axa ayex ti', meltzojanek yin junc'ulal bay e conob bay ayic' e mam, ẍi José.

¹⁸Max jitzwaltok ba Judá bay José, max yaloni: —Mamin, elok yin a c'ul chi wal tzet chi yochej in c'ul ayach, yuj wal dios ayach c'amokab chi tit owal win ach ti', caxc'al wal tol axca cham rey ach.

¹⁹Ach wal max a k'anlej el ayon ta ayto ec' co mam on, cax ta ayto junokxa juẍtak on.

²⁰Yuj tu xin, max jalon ayach tol ayto ec' co mam on, asan xin caw icham winakxa cham; yetok junxa nak juẍtak tzunan unin, yinxa yicham winakil co mam tu' max alji nak juẍtak tu'. Axa junxa nak junnej is txutx nak yetok, camnakxa nak, xan caw wal xajan nak yuj cham, yujtol asanxanej nak.

²¹Ach max ala' tol chi jitek nak, yet chojtaknej elok.

²²Max jalon ayach tol c'am chi yal c'ul co mam on tu' chi el nak is c'atan, yujtol ta chi el nak is c'atan, ijanxa chi cam cham yaloni.

²³Palta max al c'apax ayon tatol c'am chi jitek nak, c'amxa chon jay a satak aloni.

²⁴A yet max on apni oc bay co na tu', max jalon bay cham co mam on tu' tzet max al ayon.

²⁵Axa co mam on tu', max alon pax ayon tol chon tit pax manoj trigo junelxa.

²⁶Max on tak'wi on bay cham axca ti': C'am chon toji, tatol c'am chi jitok nak juẍtak tzunan unin ti', yujtol ta c'am chi toj nak jetok, c'am chi je' japni oc satak jun cham yajaw tu', con chi on bay.

²⁷Max yalon co mam on tu' ayon xin: E yojtak tol cawan ch'an in c'ajol max wil yetok xal camom wetbi.

²⁸Jun nak junelnej max tojcanok, c'amxa bay max wil sat nak, ay mi wal junok no chiwajwom no' max chiontok nak, quin chi.

²⁹Ta che yi' paxtok junxa nak ti', ta ay pax tzet chi on nak, e yuj wal bian, chin cam yuj cusc'ulal, ẍi cham ayon.

³⁰Yuj tu', axca wal tol is cawil in mam tu' yayji oc nak ach'ej ti'; ta c'amxa chi meltzoj nak jetok tinani'

³¹cax chi cam co mam on tu' yuj cusc'ulal, ayon wal chi oc co mul on.

³²Ayin wal max in wabaj in ba yin nak bay in mam tu', max walon bay: Ta c'amxa chi jay nak wuj, caw wal yob chin can yul a sat junelnej, quin chi bay cham.

³³Yuj wal tu' chin tewi oc ayach, ta chi je' xin, ayin chin can is q'uexelok nak wuẍtak ti' a chekbejok. Yuj tu' cha bekil nak, cax chi toj nak yetok eb nak wuẍtak ti'.

³⁴Ta c'amak, ¿tzetto wal chi yun toj wilon in mam, tatol man aok jun nak wetok? Caw wal c'am chi je' in c'ul waon oc in mam yin cusc'ulal, ẍi nak Judá.