Read Q'anjob'al Gn 45 Bible Online

Gn 45 - Q'anjob'al bible

Gn 45

¹Majxa techaj yuj José tol c'am chi ok'aj satak masanil eb nak chi mulnaj bay tu', xan max yal yin ipejal: Elanektok cayti', ẍi. C'amxa junok eb nak mulnajwom ayoctok yet max yalonxac'al José bay eb yuẍtak tu', tol yuẍtak ba yetok eb.

²Cax max ok' wal yin ipejal. Masanil eb nak aj Egipto max abeni. Max apni oc is k'umal jun tu' bay yul is despacho cham rey.

³Max yalon José bay eb yuẍtak tu' axca ti': —Ayin ton José in ti'. ¿Yel mi wali iquisto co mam chi yal tu'? ẍi cham. Caw wal max xiwaj eb nak yuẍtak tu' satak. C'amxa chi je' k'anjab eb yuj xiwilal.

⁴Max yalon cham José: —Chi wal ayex tinani' xin, jitzektek e ba in c'atan, ẍi cham. Axa yet max jitzontok ba eb, max yalon bay eb axca ti': —Ayin ton José in ti', juẍtak co baek. Ayin ton ti' max quin e txon bay eb nak ismaelita txonjom bay Egipto ti'.

⁵Palta manchak tacaj e c'ul, tamwal chi tit e yowal e yin junjun ex yuj max quin e txono'; is nabal co Mam Dios yayji tol max quin babjitek e satak, yet chi colchaj xiwilok anima, xan caytu' max yunej.

⁶Cabixto ch'an abil yel yich wajil bay yulyibank'inal ti'. Oyebto abil ok yak'a', yin tol c'am chi je' awoj, caxc'al ay mac chi yaw awoj, tutun c'am jabok sat ok yak'a'.

⁷Babel max quin cheklaytek yuj co mam Dios yet watx' c'am chi c'aycan el e yinatil bay sat tx'otx' tx'otx' ti', c'al ex in colon bay jun miman wajil ti'.

⁸Yuj tu xin, a Dios max quin chekontek bay jun lugar ti', cax mayexnak, max in e yatek cayti'. A Dios max quin aon oc yin aom oc nabalejal bay cham rey c'al yin yajawilal yin masanil is tzet yetal bay yatut, c'al yin gobernadoral bay masanil yul yet Egipto ti'.

⁹A tinani xin, asek bay co mam tu', cax che yalon bay axca ti': Tix wal yalon nak a c'ajol José ti': A Dios max quin aon oc yin yajawilal yul yet Egipto ti'; yuj tu' titan yin aymanil, chin ul elon cayti'.

¹⁰A tu' ok ach ayjok ec' bay tx'otx' Gosén, yet watx' cawil ayach ec' in c'atan, yetokc'al masanil eb oninal, c'al eb e atxiquin c'al a jobbejal no', yetokc'al masanil tzet ay ayach.

¹¹Cax chi wak'on a lobej yetok masanil eb wuẍtak c'al yetok masanil mac ayic' etok; yujtol oyebto abil ok yak' jun wajil ti'. Ta c'am chach tita, ok lowxac'al mebil en, c'al yin masanil eb ajun etok, ẍi José, quex chi bay co mam tu'.

¹²Testigo nak wuẍtak Benjamín ti' c'al e yetok ayex ti', tol ayin wal caw chi wal jun k'anej ti'.

¹³Alek wal bay co mam tu' tol caw wal ay wopiso c'al wikbej bay yul yet Egipto ti', c'al yin masanil tzet max e yil cayti'. Yuj tu' chi toj e yi' co mam tu' yin aymanil, ẍi cham José tu'.

¹⁴Cax max toj lak'naj José tu' yin nak Benjamín, cax max c'oli jichchaj c'ul yok'i. Ac'ala' c'apax Benjamín tu', max ok' c'apax ajok, yet lak'an c'apax oc yin José tu'.

¹⁵Lajwi tu' cax max tz'ubon el José tu' is ti' juntzanxa eb yuẍtak tu', yet lak'an oc yin eb, cax chi c'oli yok'i. Yet max lajwi juntzan tu xin, cax max tec'ban ba eb nak k'anjab bay José.

¹⁶Yin aymanil max apni oc is k'umal bay is despacho cham rey, tol is yuẍtak José eb nak max apni oc tu'. Caw wal max tzaloj cham rey yetok masanil eb ayoc yin yajawilal yetok cham bay is despacho yet max yaben eb.

¹⁷Max yalon cham rey bay cham José axca ti': —Al bay eb nak oẍtak tu', yaokab oc eb nak yikatz is chej, cax chi meltzoj eb nak bay Canaán tu',

¹⁸cax chi yiontek eb nak yetbi c'al yuninal yetok a mam tu'. A wal tx'otx' tx'otx' caw wal watx' bay Egipto ti' ok wak' bay cham, cax a wal bay watx' chi yun awoj ti', a wal tu' ok low eb yin watx'il.

¹⁹Al bay eb nak tol chi yitok eb carreta cayti' yet chi yitek eb nak yistzil, c'al yuninal, yetok a mam tu'.

²⁰C'am chi yak' bilc'ulal eb yuj tzet ay tinani', yujtol a tzet watx' ay bay Egipto ti', a' ok wak' bay eb, ẍi cham rey tu' bay José.

²¹Axca tu' max yut eb nak is c'ajol cham Israel tu'. Axa José max ak'on carreta tu' bay eb nak, axca max yut yalon cham rey, c'al tzet chi lo eb nak yulak be max yitok eb.

²²Max ak'lay c'apax ac' pichilej bay eb yet chi oc is q'uexbalok eb nak. Axa pax bay nak Benjamín xin, 300 siclo plata max ak'lay bay nak, cax max ak'lay o mojan is pichil nak.

²³Max yaontok lajonc'on no burro bay is mam. Caw wal al max yun yet no' yuj masanil tzet watx' ay bay Egipto tu'. Cax max toj c'apax lajonc'onxa no' txutx burro max ikontok trigo, c'al ixim pan max yatok yet chi lo' cham yulak be yet chi tita.

²⁴Yet max tak'en cantok eb yuẍtak tu', max yaloni: —C'amc'al owal che yun yulak be, ẍi cham.

²⁵Max el eb nak bay Egipto xin, cax max apni oc eb bay Canaán bay ayic' is mam eb.

²⁶Cax max yalon eb nak bay tol iquis ec' nak José, tol ayoc nak yin gobernadoral bay Egipto. Toxac'al chi c'ayaj c'ul cham Jacob, c'amxa chi nachaj yuj tzet chi yut k'anjab ba, c'am chi yaoc yin c'ul yin tzet chi yal eb nak tu'.

²⁷A yet max yalon eb nak masanil tzet max yal cham José, c'al yet max yilon oc cham Jacob jantak carreta max jayoc yuj eb nak, tol max yatok José yet chi ilaytok cham, yuj tu xin caw max tzaloj aj c'ul cham.

²⁸Max yalon cham: K'okbilc'al yuj max wabej tol iquisto in c'ajol. Ok tok wil nak yet c'amto chin cami, ẍi cham.