Read Q'anjob'al Gn 49 Bible Online

Gn 49 - Q'anjob'al bible

Gn 49

¹Max yawtej cham Jacob masanil is c'ajol, max yalon cham: Jitzektek e ba in c'atan ex in c'ajol; abek tzet ok ec'tok e yiban yet yajtok tu':

²Jitzektek e ba in c'atan, cax ok walon ayex, abek tzet ok wal ayex, ayin Israel e mam in ti':

³Ach ti' Rubén, ach ton in babel c'ajol ach. Chi tx'oxil ba wip yet wach'ejal en, ach ti', t'inan tol ay a may, cax miman elapnok satak eb oẍtak.

⁴Axa tinani', manxa ok el juntzan tu', yujtol lajan ach axca junok elom aej, yujtol q'uixwiltak max quin ot bay in wayub, yujtol max cach way yetok ix ix ayoc cab wetbiok.

⁵Ach ti' Simeón, c'al ach ti' Leví, e yuẍtak e ba, a e mitx'k'ab yin owal, max e k'anbalnej yin yaxc'aynakil.

⁶Junelnej c'am chi wochej chin apni oc waan bay xol e wajayil, yujtol a yet chi tit numnaj che yila', che mak'on cam anima. Ilab yet chi tit yin e c'ul, cax che mak'on k'aj yakan no toro.

⁷Titokab can catab e yiban yuj yowal e jolom tu', c'am e yabenc'ulal. Yuj tu' xan ok ex in saklemnej cantok xol eb e yet conob Israel.

⁸Ach in c'ajol Judá, yelxac'al ay is may a binaj xol eb oẍtak ti', cax chach oc pitz'an yin is nuk' eb ajc'ul oc en, cax ok ay nojan eb nak oẍtak ti' a satak.

⁹Ach in c'ajol Judá, lajan ach wal axca junok ach'ej coj, yet chi lajwi chion aytok junok no' chi mak' camok, cax chi meltzojnaj pax bay is nach'en. Chi ay nojanok, cax chi ay pakan sat tx'otx' axca wal junok miman icham coj. ¿Mac wal junok chi tec'baj ba tx'emoni?

¹⁰C'am mac chi je' yion ec' a mayk'ak'al, ach Judá. C'am mac chi je' yion ec' a vara yul a k'ab, masantac'al chi jay jun Cham chi yik Siloh, jun mac tol masanil nación ok iken bay.

¹¹A' ok c'alban oc is burro yin junok moc'an uva yelxac'al watx', cax ok tx'ajon is pichil yuj yal uva.

¹²A is bak' sat, caw k'ek yili yintak vino, axa ye, yelxac'al sak yintak no leche.

¹³Axa ach Zabulón ach ti', a tu' ok ach ayjokc'al bay is ti' a' mar bay xiwil puerto bay chi apni oc te barco, cax chi apni oc a tx'otx' bay Sidón.

¹⁴Axa ach, Isacar ach ti', lajan ach wal axca junok no burro tol iktzom, tol chi xew yul corral.

¹⁵Yet chelon octok tol caw wal watx' junok lugar, cax tol watx' a xew bay tu', cax chaon oc echin yalan ikatz, c'amxac'al tzet chala' chach occan chekbejal.

¹⁶Axa ach Dan ach ti', ach wal caw chak' cuenta a conob, axca wal is moj junok conobal eb Israel.

¹⁷A wal ach Dan ach ti', lajan wal chot a ba axca wal junok no bakne labaj ayic' ti' be, tol chi chi' yakan no chej, cax chi ayc'ay nak ayajtok yiban chej tu' yuj.

¹⁸¡Ach Jehová chi wechbanej in a coloni!

¹⁹Axa ach ti' Gad, chi apni oc eb nak ajc'ul yak'on owal etok, palta chi ayc'ay eb oj.

²⁰Axa ach ti' Aser, ok yak'xac'al sobra tzet ok a lo'; cax ok ak'on c'apax tzet ok lo' eb cham rey.

²¹Axa ach ti' Neftalí, bekan ach ec'jab axca junok no k'opoj sakchej, caw wal watx' nabalej ok ala'.

²²Axa ach José ach ti', lajan ach wal axca junok te te' ay is ti' junok a' aej, toxac'al chi el k'uyanok, cax xiwil sat chi yak'a', chi ec'tok is k'ablak yiban pared.

²³Caw wal ajc'ul chi yut ba eb nak en, chi julwaj yetok is julbal en, cax chi occ'al ijan eb nak tx'emwaj oc en.

²⁴Ach ti' caw wal ay yip a k'ab, watx'c'al yayji a julbal. Yuj wal dios bay in Diosal, tol chic'al je' yuj, a ton Cham Wilomal, c'al in Colomal ayin Israel in ti'.

²⁵Yuj wal dios bay in Diosal chach coloni, Cham Chi Je' Yuj Masanil. A' chi ak'on watx'c'ulal eban, a ton nab chi tit satcan, c'al is yaxilal tx'otx' tx'otx', c'al watx'c'ulal yin ch'ibaj onenal, c'al ch'ibaj a jobbejal no'.

²⁶A masanil juntzan watx' k'anej chi walcan el eban, ayin a mam in ti', yelxac'al miman yelapnok yintak watx' k'anej max yalcan in mam wiban, cax yelxac'al ec'ban tzet chi yak'a' yintak awoj chi yak' bay jolomlak payxail witz. A masanil juntzan ti' chi walcan el eban ach José, tol sic'bil ach el xol eb oẍtak.

²⁷Axa ach Benjamín, lajan ach wal axca junok no ok caw wal ow. Yet wal caw k'inibalil, cax chi chiontok is chibej chi mak' camok; axa yet k'ekbintakilxa xin, chi pojoncan ec' tzet c'am chi lajwi yuj, ẍi cham Israel.

²⁸A ton wal is txolilal eb lajcawan is c'ajol cham Israel ti', a masanil juntzan k'anej ti', max yal cham yet max yaloncan el watx' k'anej yiban junjun eb is c'ajol tu'.

²⁹Max lajwi tu', cax max yalon cham Jacob bay eb is c'ajol: Janic'xanej wal tiempoal, cax ok in camok; yuj tu xin, a tu' chin e muk yetok eb wichmam bay tx'otx' yetben nak Efrón hitita,

³⁰a ton bay yul yet Canaán; chi yal elapnok a tzet max wal ti', a ton bay ch'en olan ch'en yet Macpela, cawilal tx'otx' yet cham Mamre, manbil yuj jichmam Abraham, a ton tx'otx' manbil yuj yet chi occan yin bay chi mukay eb is camnak.

³¹A bay tu' max muk Abraham xal Sara, is yetbi. A tu' max mukay c'apax cham. A tu' mukan e mam icham Isaac c'al e txutx ixnam Rebeca. A tu' max in muk c'apax can xal Lea.

³²A jun tx'otx' tx'otx' tu', c'al ch'en olan ch'en tu', manbil bay eb nak hitita, ẍi cham Jacob bay eb is c'ajol tu'.

³³Max lajwi yalon bay eb nak is c'ajol yuj tzet ok utlay is mimanil tu' yuj eb nak, cax max ay telanok, axa cam tu'.