Read Q'anjob'al Gn 5 Bible Online

Gn 5 - Q'anjob'al bible

Gn 5

¹Tix wal yoc yabixal eb yinatil Adán yin txolilal ti'. Yet max watx'nej Dios eb anima, axca yayji oc Cham max yunej.

²Max watx'nej Cham nak winak c'al ix ix, max yak'oncan Cham yaxilal yiban eb. A yet jun c'ual max watx'ji eb yuj Cham, anima*fn* max yikcan aj eb yuj.

³A Adán tu' 130 abil is k'inal cax max alji nak is c'ajol chi yik Set, lajanc'al axca is mam.

⁴Lajwi tu', 800 abil maxto yil Adán tu'. Aytoc'al is c'ajol c'al is cutz'in max alji.

⁵930 abil is k'inal yet max cami.

⁶A Set tu', 105 abil is k'inal yet max alji is c'ajol chi yik Enós.

⁷Lajwi tu', 807 abil maxto yila', aytoc'al is c'ajol c'al is cutz'in max alji.

⁸912 abil max yila' yet max cami.

⁹A Enós tu', 90 abil is k'inal cax max alji is c'ajol chi yik Cainán.

¹⁰Lajwi tu', 815 abil maxto yila', aytoc'al is c'ajol c'al is cutz'in max alji.

¹¹905 abil max yila' yet max cami.

¹²A Cainán tu', 70 abil is k'inal yet max alji nak is c'ajol chi yik Mahalaleel.

¹³Lajwi tu', 840 abil maxto yila', cax aytoc'al is c'ajol c'al is cutz'in max alji.

¹⁴910 abil max yila' yet max cami.

¹⁵A Mahalaleel tu', 65 abil is k'inal yet max alji nak is c'ajol chi yik Jared.

¹⁶Lajwi tu xin 830 abil maxto yila'. Aytoc'al is c'ajol c'al is cutz'in max alji.

¹⁷895 abil max yila' yet max cami.

¹⁸A Jared tu' 162 abil is k'inal yet max alji nak is c'ajol chi yik Enoc.

¹⁹Lajwi tu' 800 abil maxto yila'. Aytoc'al is c'ajol c'al is cutz'in max alji.

²⁰962 abil max yila' yet max cami.

²¹A Enoc tu' 65 abil is k'inal yet max alji nak is c'ajol chi yik Matusalén.

²²Max ec'jab Enoc axca wal chi yochej c'ul Dios. Yet maxax alji Matusalén is c'ajol tu', 300 abil maxto ec' Enoc tu'. Yet jun tiempoal tu', aytoc'al is c'ajol c'al is cutz'in max alji,

²³365 abil max yila'.

²⁴Tutun max ec'jab axca wal chi yochej c'ul Dios, xan ay jun c'ual max c'ayajok, yujtol a Dios max iontok yetok.

²⁵A Matusalén tu', 187 abil is k'inal yet max alji nak is c'ajol chi yik Lamec.

²⁶Lajwi tu' 782 abil maxto yila'. Aytoc'al is c'ajol c'al is cutz'in max alji.

²⁷969 abil max yila' yet max cami.

²⁸A Lamec tu' 182 abil is k'inal yet max alji jun is c'ajol.

²⁹Noé*fn* max yak' yik is c'ajol tu' yujtol max yala': A Dios max catabnen tx'otx' tx'otx' ti', xan yin wal ipejal chi yun co mulnaj sat tx'otx', axa tinani' xin, a jun nak unin ti' ok on ak'on xewok, ẍi Lamec.

³⁰Yet mayal alji Noé tu xin, 595 abil maxto yil Lamec. Aytoc'al is c'ajol c'al is cutz'in maxto alji.

³¹777 abil max yila' yet max cami.

³²A Noé tu' 500 abil is k'inal, catatu' max c'oli jayc'al yuninal, a ton nak Sem, nak Cam c'al nak Jafet.