Read Q'anjob'al Gn 6 Bible Online

Gn 6 - Q'anjob'al bible

Gn 6

¹A yet max aj can ch'ib bisil anima bay sat tx'otx' tx'otx' ti' cax ayc'al is cutz'in eb max jayi,

²axa eb nak yuninal Dios,*fn* max yilon oc eb nak eb ix cutz'in eb anima tol caw wal watx' yili eb ix, max c'oli sic'len eb nak yetbi chi yi' xol eb ix.

³Yuj tu' max yal Jehová: Majxa in tenchanej anima yin tojbalk'inal yin is tenomtakil eb. Naba chibej anima eb, yuj tu xin xan asanxanej 120 abil chi ec' anima yulyibank'inal ti', ẍi Cham.

⁴A yet jun tiempoal tu' yetokc'al yet yajtok tu' yet max yilen ba eb nak yuninal Dios yetok eb ix cutz'in eb anima tu', cax max el yuninal eb, a ton eb chi yik Nefilim.*fn* A eb tu' caw tec'an eb, caw wal mimanbil eb yet payxa tu'.

⁵Max yilon Jehová tol yelc'ulal chi aj can eb anima yin yobtakil bay sat tx'otx' ti', caw wal asanc'al yin yobtakil ayoc is nabal eb.

⁶Yuj tu xin max yalon Cham: Majokta wal in watx'nej juntzan anima ti'. Caw wal ya' chi wab yuj eb.

⁷Ok in c'ayil juntzan anima max in watx'nej sat tx'otx' tx'otx' ti', yetok c'apax no jobbejal no', no xolakteal no', c'al no' chi jutx ba sat tx'otx', yetokc'al no tz'iquin. Caw wal chi tac in c'ul yuj max in watx'nej masanil juntzan ti', ẍi Cham.

⁸Asan cham Noé, watx' yul sat Jehová.

⁹Tix ton yabixal cham Noé ti': A cham Noé caw wal watx'c'al max yut ba cham satak Dios, asannej oc cham watx' is nabal xol eb anima yul is tiempoal tu'. Max beybalnej cham tzet max cha c'ul Dios.

¹⁰Oxwan c'ajol cham max yil yetok yetbi, a ton nak Sem, nak Cam c'al nak Jafet.

¹¹Yobxac'al yulyibank'inal ti' yul sat Dios, comonxac'al chi lipc'oj oc eb anima yin yet animail.

¹²Max yilon Dios xin tol masanil anima max etax elok, axac'al yobtakil chi aj can.

¹³Max yalon Dios bay cham Noé: Mayal in na tinani' tol ok in c'ayil masanil anima sat tx'otx' tx'otx' ti'. Yuj eb xan chi aj can yaxc'ayinakc'ulal, xan ok in c'ayil eb, c'al masanil jun yulyibank'inal ti'.

¹⁴A tinani xin watx'nej junok te barco. A te te' ay is k'olal chaoc yin. Coc' cuartolak chot yul, caw watx' chotej, chaoc k'ol bay chi nublej ba te'. Chaoc yin, c'al yul, yet watx' c'am chi oc aej yul.

¹⁵137 metro chot is k'atil, 22 metro yetok nan chot is sat, cax 13 metro yetok nan chi aji.

¹⁶Oxcol chi yun toj can. Axa bay yiban tu' chi can junok wentena nannej metro chi yunej, yetok junok puerta bay jun pac'ok.

¹⁷Cax ok wak'on jun owal aej mukwajwom sat tx'otx' tx'otx' ti', axa nojcan el sat tx'otx' yuj a' tu', axa c'ayil masanil jantak tol chi yi' cak'ek' bay yulyibank'inal ti'.

¹⁸Asannej etok chin watx'nej jun in trato ti'. A yul te barco tu' ok ach octok yetok etbi, yetok eb nak a c'ajol, yetokc'al yetbi junjun eb nak.

¹⁹Cax ok oc c'apaxtok no no' e yetok yul barco tu', junjun mojan no' yin junjun makan no' ay yulyibank'inal ti', yet watx' chi iquisbican ec' no' axca ex ayex ti'.

²⁰Catakc'on yin junjun makan no' chi oqui: no tz'iquin, no jobbejal no', no xolakteal no', c'al no' chi jutxtok ba sat tx'otx', yet watx' c'am chi c'ayil no'.

²¹Cax cha wajbancan octok jantak tzet chi loji, yet watx' ay tzet cha lo', c'al tzet chi lo' no no' tu', ẍi Cham.

²²Cax max yiken Noé masanil tzet max yal Dios bay.