Read Q'anjob'al Gn 7 Bible Online

Gn 7 - Q'anjob'al bible

Gn 7

¹Axa yet max ajapnok c'ual xin, max yalon Jehová Dios bay cham Noé: Ocantok yul barco yetok etbi, c'al eb a c'ajol, c'al yetok yetbi eb a c'ajol tu', yujtol asannej ach yikem ach ayin xol anima masanil, yet jun tiempoal ti'.

²I octok uk mojanok no' chi je' yoc yin xajanbalil, a pax masanil no' comon xin, junjun mojan no' che octok.

³I c'apax octok uktakok mojan junjun makan no tz'iquin, yet watx' c'am chi c'ayil yinatil no'.

⁴Yet ukubix tinani' cax chi wak'on jay jun owal aej mukwajwom; cawinak c'u, cawinak ak'bal ok yak'a'. Caywal tu' ok yun in c'ayon el masanil tzet max in pitzc'onej aj bay sat tx'otx' ti', ẍi Cham bay.

⁵Axca ton tu' max yun yiken Noé masanil tzet max yal Jehová.

⁶A yet max jay jun owal aej mukwajwom tu', 600 abil is k'inal cham Noé tu'.

⁷Max octok cham Noé yul te barco tu' yetok yetbi, yetok eb is c'ajol c'al yetok eb is yalib, yuj colchaj eb bay jun owal aej mukwajwom tu'.

⁸Axca tu' no no', no' chi je' yoc yin xajanbalil, no comon no', no tz'iquin, yetokc'al no' chi jutxtok ba.

⁹Junjun mojan max yun yak'on jayoc ba no' yuj yoctok no' yul barco tu' yetok cham axca max yun yalon Dios bay.

¹⁰Suk c'ual wal tu' cax max jay secnaj jun owal aej mukwajwom tu'.

¹¹A wal tz'aknaj yabilal Noé yin 600 abil is k'inal, yet uklajoneb waay yet is cab xajaw, max ajol nic'naj mimek aej yul tx'otx' c'al max jay secnaj mimek aej max tit satcan.

¹²Cawinak c'u, cawinak ak'bal max yak' nab sat tx'otx' tu'.

¹³A yet jun c'ual albil yuj Dios, max occantok cham Noé tu' yul barco yetok eb oxwan is c'ajol, a ton Sem, Cam c'al Jafet, yetok yetbi cham, c'al eb ix oxwan alibej,

¹⁴c'al masanil makanil no no' ayoctok yetok, no jobbejal no', no' xolakteal no', no' chi jutx ba c'al no tz'iquin.

¹⁵Masanil no no' chi yi' cak'ek', max octok yetok cham Noé yul barco, yin catakc'onc'al max yun yoctok no',

¹⁶junjun c'al mojan. Cac'al tu' max yun yoctok masanil is makanil no', axca max yun yalon Dios bay Noé. Max lajwi tu', a wal caw Jehová max makchen can puertail te barco tu'.

¹⁷Cawinakxa c'ual yel yich yak'on nab tu', max aj sululok a' can, max yikon aj a' te barco tu'.

¹⁹Max mukaytok masanil mimek witz yuj a'.

²⁰Max ch'ibc'al aj a', ay mi wal ukebokxa metro max ec'aj a' yiban mimek witz.

²¹Axca ton tu' max yun cam masanil anima ay bay yulyibank'inal ti', yetokc'al masanil no no', no tz'iquin, no jobbejal no', no xolakteal no', c'al no' chi jutx ba sat tx'otx' tx'otx' ti'.

²²Masanil tzet tol chi yi' is cak'ek' sat tx'otx' tx'otx' ti', pilan max cami.

²³Asanxanej Noé yetok eb ayoctok yetok yul arca, c'al no no' ayoctok yetok, max colchaji. Axa pax juntzanxa eb tu xin, max lajwi el eb.

²⁴Oyeb xajaw max cancan lian a' yiban tx'otx'.