Read Q'anjob'al Gn 8 Bible Online

Gn 8 - Q'anjob'al bible

Gn 8

¹Lajwi tu' max nalaytek Noé yuj Dios, c'al yetok masanil no no' ayoctok yetok yul te barco, cax max yaontek Cham jun miman cak'ek' yiban aej tu', yet watx' chi tanay a'.

²Max makay nuk'lak aej, max ajol yulak tx'otx', c'al jantak mimek aej max aytek sequecok satcan, cax max oc wanaj yak'on nab.

³Oyebxa xajaw yayji ec' a', catatu' yin c'ojanc'ulalil max ay tananok a'.

⁴Uklajonebxa c'u waay yet is suk xajaw, cax max can batxan te barco bay chonlak witzal Ararat.

⁵Tananic'al yay a' aej tu'. A yet babel c'ual yet is lajoneb xajaw txequelxac'al chonlak witz can ayajok.

⁶Yinxa cawinak c'u max jakon cham Noé wentena watx'nebil yuj yin te barco tu',

⁷cax max bekon eltok cham jun no joj, max ec'c'al jenenok no' yiban a' yin yechbanen no' yet chi tanaj a' sat tx'otx'.

⁸Max bekon pax eltok Noé jun no paloma, yet chi yila' ta takinxa sat tx'otx'.

⁹Axa no' tu' max meltzoj bay te barco tu' junelxa, yujtol c'am bay chi je' yoc pakan no'. Caw wal nojnaktoc'al el sat tx'otx' yuj a' aej tu'. Max yaon eltek cham Noé is k'ab yet chi chaon octok cham no' yul barco tu'.

¹⁰Maxto yechbanej Noé ukebxa c'ual, max bekon pax eltok cham no paloma tu' junelxa.

¹¹Numumixac'al k'ekbi yet max meltzoj no', cax nac'bilxa oc jun xak te olivo yaxto yuj no'. Axca tu' max yun nachaj el yuj cham Noé, tol ipanxa tak tx'otx' tx'otx'.

¹²Ukebto pax c'u max yechbanej cham, catatu' max bekon pax eltok cham no' junelxa, palta majxa meltzoj no'.

¹³601 abil is k'inal cham Noé, yet max can tx'otx' tx'otx' ti' yin takinal. Yet babel c'u yul babel xajaw, cax max yion el cham Noé tu' is patil yiban te barco tu', max yilon cham tol mayal tak tx'otx'.

¹⁴Axa yet 27xa c'u waay yet is cab xajaw, caw wal takinxa tx'otx' tx'otx' sic'libil.

¹⁵Axa yalon Dios bay Noé tu':

¹⁶Elantek yul barco yetok etbi, yetok eb a c'ajol c'al eb ix alib.

¹⁷Cax cheon c'apax eltek masanil pojanil no no' ayoctok etok: no tz'iquin, no jobbejal no', no xolakteal no', no' chi jutx c'ul. Uninwokokab no', cax chi yak'on nojil no' sat tx'otx', ẍi Cham.

¹⁸Lajwi tu xin, max eltek cham Noé yetok yetbi, yetokc'al eb is c'ajol c'al eb is yalib yul te barco tu'.

¹⁹Axa yel c'apaxtek no no' tu' masanil yin makquiltakil.

²⁰Lajwi tu', max watx'nen aj cham Noé jun altar satak Jehová, cax max yiontek cham no no' tol watx' yul sat Jehová tu', c'al no tz'iquin, no' tol chi occ'alta' yin xajanbalil. Yin junjun makan no' tu', max yiel Noé no' max yak' tz'a yin xajanbalil, satak Dios.

²¹Chabejtak yoc jab no xajanbal tu', max yab Jehová. Axa naon Cham axca ti': Majxa in catabnej tx'otx' tx'otx' ti' yailok mul eb anima, yujtol yettaxc'al unin anima eb, asanc'al yobtakil chi yochej eb chi yunej; tamwal yuj tu' okto wak' cam masanil iquis, axca max wut yet junel ti'.

²²Yak'ban ayto ec' yulyibank'inal ti', ok oc awoj, ok wajlay sat awoj; ay tiempoal k'ak', ay tiempoal sic; ay nabil k'inal, ay waresma, ay c'ualil, ay c'apax ak'balil, ẍi Jehová.