Read Q'anjob'al Gn 9 Bible Online

Gn 9 - Q'anjob'al bible

Gn 9

¹Tix max yut k'anjab ba Dios ti' bay Noé, yetok eb is c'ajol yet max yak'on yaxilal yiban eb: Xiwilokab e yuninal, ak'ek noj tx'otx' tx'otx' ti'.

²Masanil no no' ay sat tx'otx' ti', ok xiw no' ayex, c'al no tz'iquin, c'al no' ay yulak a' mar. Ayokab e yikbej yiban no'.

³A tinani', chi je' che chi' masanil no no' ti'. Ayin chi wak' ayex axca max yun wak'on an itaj e chi'.

⁴Palta ay jun tzet yetal man ok e chi', a ton no chibej ayto oc is chiq'uil, yujtol a is chiq'uil no' tu', a' ayoc is k'inalok.

⁵Ayin ok in beyc'ulnej anima chi mak' cam yet animail, c'al no no' chi mak'wi cam anima, ok mak'lay cam c'apax no'.

⁶A mac chi mak'cam yet animail, anima c'apax ok on cam jun mactxel tu', yujtol a ayex anima ex ti' axca jayji ti', caytu' max ex jut co watx'neni.

⁷Xiwilokab e yuninal, nojokab el yulyibank'inal ti' e yuj, ẍi Dios.

⁸Max yalon c'apax Dios bay Noé c'al bay eb is yuninal axca ti':

⁹A tinani', ti' chi wak'can jun in trato ti' e yetok, c'al yetok masanil e yinatil,

¹⁰c'al yetok masanil no no' max eltek e yetok yul barco, no tz'iquin, no jobbejal no', c'al no xolakteal no', yetok masanil no no' ay yulyibank'inal ti'.

¹¹A jun in trato ok wak' e yetok ti', manxa ok in q'uexa'. Manxa ok in c'ayil anima, c'al no no' yetok owal aej mukwajwom junelxa. Majxa jay owal aej mukwajwom yuj yak'on lajwok el sat tx'otx' ti' junelxa, axca jun max ec' ti'.

¹²Tix ton yechel in trato chi wak'can e yetok ti' c'al yetok masanil no no' yin tojbalk'inal.

¹³Chi wacan oc jun mak'balnabich xol asun, a ton jun tu' yechel in trato bay sat tx'otx' ti'.

¹⁴A yet chi waontek asun cax chi txecloj aj jun mak'balnabich tu',

¹⁵a ton yin jun tu', chin natek in trato chi wak' e yetok, c'al yetok no no'; yuj tu' c'amxa owal aej mukwajwom ok ex c'ayon elok.

¹⁶A yet ay mak'balnabich xol asun chi wila', cax chin naontek tol ay jun in trato max wak' e yetok yin masanil tiempo c'al yetok masanil no no' ay yulyibank'inal ti'.

¹⁷A ton yechel in trato ti' max in watx'nej e yetok, c'al yetok jantak no no' ay sat tx'otx' ti', ẍi Dios bay cham Noé.

¹⁸A eb c'ajol cham Noé max eltek yul te barco yetok, a ton Sem, Cam c'al Jafet. A nak Cam tu' is mam nak Canaán.

¹⁹A eb ti' c'ajol Noé eb, axa yin yinatil eb max aj can ch'ib conoblak sat tx'otx' ti'.

²⁰Mulnajwom c'altac'a cham Noé sat tx'otx' tx'otx' ti'. A cham max babji c'oli yawon an uva.

²¹Ay jun c'ual max yuc' cham yal an uva tu', max toj an jolom cham; cax max c'ayc'ul yuj an. Max tzilil cham is pichil yin, cax max aj can pac'an cham yul is mantiado.

²²Axa max yilon Cam, is mam nak Canaán, tol t'iran el Noé tu'. Max tzeyej is mam tu', cax max toj yalon yab eb is yuẍtak tu' cawanil.

²³Maxc'al yab eb cawan tu xin, max yiontek eb jun an sábana jolom is xic'. Yintak eb max beyi, max apni oc eb bay is mam tu', cax max pichon ay eb yetok an. Tx'ok bay t'anantok eb, yet watx' c'am chi yil eb is mimanil is mam tu'.

²⁴Axa yet max el wayan cham Noé tu xin, max yaben cham tzet max yun nak Cam tu' yin,

²⁵xan max yal cham axca ti': ¡Catabnebil chi yuncan nak Canaán ti'! ¡Chekbej tol yaynakilxac'al ok yuncan nak bay eb is yuẍtak ti'! ẍi cham Noé.

²⁶Max c'olic'al yalon cham Noé tu' axca ti': Yak'okab Jehová co Diosal yaxilal yiban nak Sem, axa nak Canaán chi occan is chekbejok nak.

²⁷Yiokab aj can Dios nak Jafet; cax chi ayjic'al nak yul is conobal nak Sem, axa nak Canaán chi occan c'apax is chekbejok nak Jafet tu', ẍi cham Noé tu'.

²⁸Yet max lajwi yec' jun owal aej mukwajwom tu xin, 350 abil maxto ec' cham Noé,

²⁹xan 950 abil is k'inal cham yet max cami.