Read Q'anjob'al 2 S 10 Bible Online

2 S 10 - Q'anjob'al bible

2 S 10

¹A yet mayal ec'c'al el tiempo xin, max cam Nahas, a ton is reyal eb amonita, axa is c'ajol chi yik Hanún max occan yin reyal.

²Xan max na' cham rey David tol yowalil chi camc'ulnelay Hanún is c'ajol Nahas yuj, axca wal max yun camc'ulnelay David yuj cham Nahas tu', xan max chektok cham rey David juntzan is chekbej bay Hanún yuj mimanc'ulnelayi yuj camichal is mam tu'. Palta a yet max apni oc eb chekbej bay is conob eb amonita,

³a eb cham yajaw conob yayji bay tu' max yal eb bay Hanún is reyal eb: ¿Tom chaoc yin a c'ul tol a juntzan winak max chektek cham rey David ti' tol chach ul yak' mimanc'ulal eb? ¿Chi mi a na' tol mimanxac'al yelapnok a mam tu' yul sat cham rey David tu', mamin rey? ¡A jun rey tu' tol max chektek juntzan winak ti' yet chi ul yil eb tzetbil yili jun co conobal ti', cax ok ul yak'on lajwok! ẍi eb bay.

⁴Yuj tu xin, max chekon Hanún tu' mitx'lay eb chekbej cham rey David, max tzuklay el nanok xil ti' eb, max c'uplay el tel is pichil eb masantac'al yin chop eb, max lajwi tu' max chekon pax eb.

⁵A yet max yaben cham rey David axca tu', max cheklay toj chalay eb yujtol caw wal chi q'uixwi eb, max al-lay bay eb tol chi cancan eb bay Jericó masantac'al chi yal ch'ib xil ti' eb, catatu' chi je' meltzojtek eb.

⁶Axa eb amonita xin, max nachaj el yuj eb tol yob max can eb yul sat cham rey David, xan max tojlanej eb 20,000 soldado yet Siria bay yul yet Bet-rehob c'al yul yet Soba, bay reyal Maaca max tit mil soldado, max tit c'apax 12,000 soldado aj Is-tob.

⁷Palta max yab David jun tu', xan max chektok Joab yetokc'al eb soldado.

⁸Max eltek eb amonita, max watx'nen oc ba eb yin owal bay ti' conob eb tu', yak'ban a eb soldado yet Siria bay yul yet Soba, c'al eb max tit bay Rehob, c'al eb soldado yet Is-tob, c'al eb max tit bay Maaca, max watx'nej c'apax ay ba eb bay najat ay el ti' conob tu'.

⁹Axa yet max yilon cham Joab xin, tol lananxa jayoc jun makan eb bay is satak, c'al junxa makan bay yintak, max sic'on el cham eb soldado caw wal jelan cax max oc eb yin owal yin eb sirio.

¹⁰Axa juntzanxa eb soldado xin, max yaoc yul k'ab Abisai is yuẍtak, yet watx' a ton eb tu' chi toj yin eb amonita.

¹¹Max yalon bay eb axca ti': Tatol a eb sirio yelxac'al ok je' yuj eb wintak, ach ti' ok ach jayoc colwaj wetok. Tatol a eb amonita yelxac'al ok je' yuj entak ach ti', ayinxa ok in tok colwaj etok.

¹²Ak' ep xin, co tec'baj co ba yuj co colon co conob ayon is conob on co Diosal ti'. Yunokab Cham bay chi yochej c'ul, ẍi cham Joab.

¹³Lajwi tu' max toj cham Joab yak'on owal yin eb sirio yetok is soldado, axa eb tu' max elaj eb satak cham Joab.

¹⁴A yet max yilon eb amonita tol mayal elaj eb sirio, cax max el c'apax aj eb satak Abisai, caytu' max yun yoctok eb colon ba bay yul is conobal tu'. Yuj tu' xan max bek cham Joab yak'on owal yin eb amonita, max meltzojtek bay Jerusalén.

¹⁵A yet max yilon eb sirio tol max ayc'ay eb yuj eb israel, max wajban ba eb junelxa.

¹⁶Max awtelaytek eb sirio yuj rey Hadad-ezer, a ton eb ay bay junxa k'axepaltok a' Éufrates, cax max apni oc eb bay conob Helam. A cham Sobac babel satak eb, a ton yajawil eb soldado yet rey Hadad-ezer.

¹⁷Palta max al-lay juntzan ti' bay cham rey David, xan max yun toj pax yetok eb soldado israel max k'axpoj ec'tok eb bay a' Jordán, max apni oc eb bay Helam. A bay tu' max tec'baj ba eb sirio satak cham rey David, max yak'on eb owal yin.

¹⁸Axa max yun xin, max elaj eb satak eb israel. Max mak'on cam cham rey David 40,000 eb soldado ayoc yiban chej, c'al yetok 700 eb ayoc yul carruaje, cax max cam c'apax Sobac yajawil eb soldado sirio yuj bay tu'.

¹⁹A yet max yilon masanil eb rey ayoc yetok rey Hadad-ezer tol mayal ayc'ay eb yuj eb israel, max yaoc ba eb yin junc'ulalil yetok eb israel, xan max canxac'al can eb yalan yikbej rey David. Ataxc'al yet tu' max xiwxac'al aj eb sirio tu', c'amxa chi yaoc ba eb colwaj yetok eb amonita junelxa.