Read Q'anjob'al 2 S 11 Bible Online

2 S 11 - Q'anjob'al bible

2 S 11

¹A yet junxa abil yet is tiempoal toj eb rey yin owal, max yatok cham rey David Joab yetok masanil eb yajawil eb soldado, yetokc'al masanil eb soldado israel yin owal, cax max c'ayon el eb eb amonita, c'al yoyon ba eb yin conob Rabá. Maj tok cham rey yetok eb, palta max can bay Jerusalén.

²A yet jun k'ekbintakil xin, max aj wan cham rey David bay sat is tx'at, cax max eltok ec'jab bay pananil yiban is yatut. A yet lanan yec'jab tu' max yilontok jun ix ix lanan yachinwi, caw wal watx'xac'al yili ix max yiltok.

³Ayman max chek toj k'anlej mactxel jun ix ix tu', cax max al-layi tol a ix Betsabé is cutz'in Eliam, is yistzil Urías heteo ix.

⁴Ayman max bet yak' tit ix yuj is chekbej, cax max way yetok ix. Max lajwi tu' max sakbanen ba ix, max meltzoj bay yatut.

⁵Axa max yunej max occan ix yobixal, xan ayman max yatok ix k'anej bay cham rey David.

⁶A yet max yaben cham axca tu', max yaontok k'anej bay Joab tol chi meltzojtek Urías heteo. Cax max yiken Joab jun k'anej tu'.

⁷Axa yet max tx'oxon ba Urías bay satak cham rey, max k'anlen cham ta watx' c'ul Joab yetok eb soldado, c'al tzetbil yayji owal.

⁸Max lajwi tu' cax max chekontok cham tu' bay yatut xewok. Maxc'al wal eltok Urías bay yul yatut cham rey, cax max chekon cham tu' yilaytok loj caw wal watx' bay.

⁹Palta maj tok Urías tu' bay yatut. A tu' max cancan way yetok eb soldado chi taynen despacho tu'.

¹⁰Axa yet junxa c'ual max al-lay bay cham rey David tol a Urías maj apnok way bay yatut yet jun ak'bal tu', xan max k'anlej cham bay: —¿Tzet yuj xan maj ach tok way bay atut, ilab tol ayxatax max ach tojcanok? ẍi cham rey tu' bay.

¹¹Max tak'wi Urías bay: —¿Tom ok je' in c'ul ok in apnok bay watut ok in lowok c'al in way yetok wistzil xin? Ilab te caẍail trato yet Jehová, eb wet soldadoal aj israel, c'al eb aj Judá, xaklak te' ch'an ay aj yiban eb nak, ac'ala' in yajawil Joab c'al eb yet yajawilal, sat ac'al chi way eb. C'amc'al chi jal jun tu' mamin rey, c'amc'al chi je' in c'ul tol watx'xac'al bay ok in wayok, ẍi Urías.

¹²Max yalon cham rey David tu' bay: —Canan yet junxa ak'bal ti', yet yecal cax chach toji, ẍi bay. Axca tu' max cancan Urías junxa ak'bal tu' bay Jerusalén.

¹³Max yawtej rey David tu' low yetok, cax max uc'wi an yuj. Max c'ay c'ul Urías tu' yuj an, palta man yujok tu' max toj way bay yatut, axac'al tu' max can way yetok eb soldado junelxa.

¹⁴Axa yet max k'inibi aj yet junxa c'ual max tz'ibentok rey David jun carta bay Joab, max chekon yitok Urías tu' tx'an.

¹⁵Max yalontok yul tx'an: Aek oc Urías satak bay caw wal ow yak'on owal cax chex el c'atan yet watx' chi cami, ẍitok cham rey David.

¹⁶Yuj tu xin, a yet max yoyon ba Joab yetok is soldado yin jun conob tu' yin owal, a bay ayic' eb ajc'ul tol caw wal jelan, a tu' max yaoc Joab tu' Urías.

¹⁷Axa max eltek eb ajc'ul tu' bay yul is conob yin eb yet Joab, ay eb soldado max cami, cax max cam Urías xol eb nak tu'.

¹⁸Ayman max yatok Joab is chekbej bay rey David yuj yalon tzetbil max yun yeloc owal.

¹⁹Max yalon bay: A yet ok lajwok alon bay cham rey yuj tzet max yun yoc owal tu',

²⁰talaj chi tit yowal cax chi yaloni: ¿Tzet wal yuj xan max e jitzxac'al oc e ba c'atan eb ajc'ul tu'? ¿Tom man e yojtakok xin tol suboj bekon aytek eb junok tzet yetal e yiban bay yiban muralla?

²¹¿Tom man e yojtakok yabixal tzet max yun jun ix ix bay Tebes, max bekaytek ix jun ch'en ch'en yet molino yiban jolom Abimelec is c'ajol Jerobaal? Xan mata maj e jitzxac'al oc e ba, ta ẍi, cax chaloni tol max cam c'apax Urías hitita, ẍi Joab.

²²Cax max toj jun chekbej tu xin, max yalon bay cham rey David axca max yun yalon Joab.

²³Max yalon jun chekbej tu' bay cham rey David: —Caw wal ow max yun yelol eb ajc'ul tu' jin, ijan wal max on ayc'ay yuj eb, palta xin max uj meltzoj eb yintak juj on, masantac'al max on apni yintak eb bay puertail is conob eb tu'.

²⁴A yiban muralla max julwajtek eb nak ajc'ul tu' yin eb a chekbej, yuj tu' max cam jaywan eb nak soldado, cax max cam c'apax Urías heteo, ẍi jun chekbej tu'.

²⁵Max yalon cham rey David bay jun chekbej tu': —Al bay Joab tol c'amokab chi oc yin bilc'ulal yuj jun tu'. Cac'alta' tu' yin owal ti', ayc'alta' mac chi cami. C'amokab chi pax wanajok, tol yelc'ulal che yi e yip, masantac'al chi yal yayc'ay eb e yuj, cachi, caytu' chi yun eptzen Joab tu', ẍi rey David bay jun chekbej tu'.

²⁶A yet max yaben aj ix yistzil Urías tol mayal cam yichamil, max oc ix yin cusc'ulal yuj.

²⁷A yet max lajwi yec'tok c'ual is cusc'ulal ix xin, axca ta is beybal eb, cax max yak'on rey David toj tit ix bay is yatut, max yaon oc yistzilok, cax max alji yune' ix. Palta xin, maj cha c'ul Jehová tzet max yun cham rey David tu'.