Read Q'anjob'al 2 S 18 Bible Online

2 S 18 - Q'anjob'al bible

2 S 18

¹Lajwi tu' cax max c'oli yilon cham rey David masanil eb is soldado, axa yaon oc is yajawilal junjun mil c'al junjun cien soldado.

²Ox makan max yun pojaxtok eb soldado tu' yuj. A Joab max oc yajawilok jun makan, axa junxa makan, a Abisai is yune' Sarvia, yuẍtak Joab max oc yajawilok. Axa junxa makan xin, a Itai aj Gat max oc yajawilok. Max lajwi tu xin, max yalon cham rey David bay masanil is soldado: —Ayin jun ok in tok e yetok yin owal tu', ẍi.

³Cax max tak'wi eb nak: —C'amak mamin rey, manchak ot axca tu', yujtol a eb ajc'ul tu' ach chach yuktej eb, a pax ayon ti' ta chon colchaji ma chon cam nanok on yuj eb, c'am jelapnok on, tol ec'ban ach yintak lajonebok mil on ayon ti'. Yuj tu' xan yelxac'al watx' tol chach cancan bay yul conob ti', ach ok atok tz'akil eb soldado ayon, ẍi eb.

⁴Yunokab xin, ok wikej bay tzet che yal tu, ẍi cham. Max lajwi tu xin, max bet oc lecan bay ti' puertail conob cax chi yilon yeltek eb soldado yin bulquiẍtakil, yin junjun mil c'al yin junjun cientoal yeltek eb.

⁵Cax max cam c'ul cham rey yalon bay eb is yajawil eb soldado, a ton Joab, Abisai, c'al Itai tol yujc'al cham xan camokab tzet chi utlay Absalón. A jun max yal tu', masanil eb soldado max abeni.

⁶Lajwi tu' max toj eb masanil yin owal yin eb ayoc yetok Absalón. A tu' max chalej ba eb bay xol k'aktelak yet Efraín.

⁷Max ayc'ay eb ayoc yetok Absalón yuj eb ayoc yetok cham rey David. Caw wal xiwil eb max cam yet jun c'ual tu', 20,000 eb max cami.

⁸A xol masanil k'aktelak tu' max oc owal, cax yelxac'al miman anima max cam yuj max c'aytok xol k'aktelak tu' yintak eb max tzoc'lay camok.

⁹Ayajtok Absalón yiban jun no mula. A yet max chalen ba yetok eb soldado cham rey David, max meltzoj yintak, axa yec'tok no chej tu' yalan is k'ab jun te matx'ji, cax max oc cantok jek'naj is nuk' nan xol is k'ab te', max can t'unanok, axa no chej tu' max tojc'al no'.

¹⁰C'uxanc'al ay jun nak max iloni, max toj yalon bay Joab axca ti': —Jekan cantok is nuk' Absalón yul nan is k'ab jun te matx'ji, max wiloni, ẍi.

¹¹Max tak'wi Joab bay: —Tatol max el axca tu', ¿tzet yuj xan maj a watx' mak'nejxac'al camok? Yetok wal masanil in c'ul cax chi wak'on lajonebok siclo ch'en plata ayach yetok jun cinturón, ẍi Joab.

¹²Max tak'wi nak tu' axca ti': —Caxc'al mi chak' milok ch'en plata tu' ayin, majc'al waoc in k'ab yin is c'ajol cham rey, yujtol max jab wal tzet max yut yalon cham rey tu' ayach c'al bay Abisai c'al bay Itai, tol c'am chi mak'lay cam Absalón.

¹³Yetok c'apaxok ta max in mak' camok, chi mi low win yujtol c'am junok tzet yetal tol man ok yojtaknej el cham rey, tamwal tol ok into a colil ach ti', ẍi bay.

¹⁴—¿Tzet wal chi oc chi ec' in tiempo etok? ẍi Joab. Cax max yiontok oxeb coc'tak lanza cax max bet tek'on oc yin pixan Absalón, yujtol iquisto.

¹⁵Lajwi tu' max jitzon oc ba lajonwan is soldado Joab, cax max watx' mak'nenxac'al cam eb Absalón.

¹⁶Max lajwi tu xin, cax max yalon Joab tol chi xulay trompeta yet chi oc wanaj eb soldado tzakloj yintak eb yet israelal eb.

¹⁷Max lajwi tu' max yiontok eb is mimanil Absalón cax max bet yaon aytok eb bay yul jun olan bay xol k'aktelak tu', cax max tojcan jun miman bulan ch'en yiban yuj eb. Axa pax eb is soldado maxto can xin, max el eb, axa paxcantok eb bay yatut junjun.

¹⁸A yet iquisto ec' Absalón tu' max yak'on watx'jok jun monumento bay jun lugar chi yik jobeal yet eb cham rey. Is bi max yaoc yin, yujtol c'am junok is c'ajol chi ak'on can binajok; masantac'al tinani' chito binaji tol is monumento Absalón.

¹⁹Axa Ahimaas c'ajol cham Sadoc, max yal bay Joab: —Chi wal ayach, cha in tok yet chi toj wal bay cham rey tol a Jehová mayal colon el yul k'ab is yajc'ul, ẍi Ahimaas.

²⁰Max yalon Joab bay axca ti': —Maj je' a toji, man a mojok ach ok tok al jun k'anej tu', yamita yet junokxa tiempoal ok ach tok, palta tinani' c'amak, yujtol a wal caw is c'ajol cham rey max cami, ẍi Joab bay.

²¹Max lajwi tu xin, max yalon Joab bay jun soldado aj Etiopía: —Asi', al bay cham rey tzet max el tu', ẍi Joab. Max ay nojnaj nak etíope tu' satak Joab, max lajwi tu' max toj lemnaj yalon bay cham rey tu'.

²²Max yalon pax Ahimaas bay Joab: —Elok wal yin a c'ul, cha in tok yintak nak etíope tu', ẍi bay. Max tak'wi pax Joab axca ti': —¿Tzet wal yuj xan chochejxac'al chach toji, tokwal ay tzet ok e' yin jun k'anej tu'? ẍi Joab.

²³—C'am yelapnok, caxc'al c'am tzet chi wi' yin, palta chin toj lemnajok, ẍi bay. —Asi xin, ẍi Joab. Yet wal jun bek tu' cax max toj lemnaj Ahimaas, bay ac'al, max babjitok satak nak etíope tu'.

²⁴A tu' chotan ay cham rey David bay nan xol puertail conob, axa pax jun makwajwom xin, a tu' ayic' bay pananil yiban muralla bay ayoc puerta tu'. T'anantok jun tu' max yilon tit jun winak tx'oklil yin anejbail.

²⁵Ayman max awji yin ipejal, max yaloni tol ay jun winak chi jayi. Max yalon cham rey: —Tatol is tx'oklil, alom watx' abix chi yal tu', ẍi cham. Yak'ban cawilxa jayoc nak tu xin,

²⁶max yilon nak makwajwom tu' tit junxa winak yin anejbail, cax max awji bay nak taynem puerta: —Ay wal junxa winak chi tit yin yanej, ẍi. —Ac'ala' junxa tu' abix chi ul yala', ẍi cham rey.

²⁷Max yalon nak makwajwom: —A jun babel tu' axca wal bey Ahimaas is c'ajol Sadoc chi wila', ẍi. Axa tak'wi cham rey tu': —Ta a nak tu', watx' is nabal nak, watx' mi tzet ok ul yala', ẍi cham.

²⁸A yet max jayoc Ahimaas satak cham rey max ay nojanok cax max yak'on cawil c'ul, max yalon axca ti': —Al-layokab watx' k'anej bay Jehová co Diosal mamin rey, yujtol mayal c'aylay el yuj Cham eb max meltzoj oc ajc'ulal en, ẍi.

²⁹—¿Watx' mi is c'ul Absalón max ela'? ẍi cham rey. Max tak'wi Ahimaas axca ti': —Toxac'al chi bululi anima yet max in cheklaytek yuj a chekbej Joab, majxa wabej tzet max uji, ẍi.

³⁰Max lajwi tu' max yalon cham rey: —Ec'antok bay jun pac'xa ti'. A tu' chach occan lecan bay tu', ẍi David. Max yiken yoccan lecan bay tu'.

³¹Lananto wal tu' max apni oc nak etíope, max yalon axca ti': —Mamin rey, cha' jun watx' abix chi ul wal ayach: Mayal paktzej Jehová bay eb max meltzoj oc ajc'ulal en, ẍi nak.

³²Cax max k'anlen cham rey bay nak: —A pax nak ach'ej Absalón ¿watx' mi c'ul nak? ẍi cham rey. Max tak'wi nak: —Mamin rey, tolok wal chi cam masanil eb ajc'ul oc en axca max yun lajwi el nak tu', ẍi nak.

³³Max oc pitz'an yin c'ul cham rey David, max toj bay yul junxa cuarto can bay yiban puertail conob tu'. Yak'ban chi bey yajtok, chi yaloni: ¡Ay ach in c'ajol Absalón! ¡Ayinok wal max in cam a q'uexelok! ¡Ay ach in c'ajol Absalón! ẍi cham.