Read Q'anjob'al 2 S 24 Bible Online

2 S 24 - Q'anjob'al bible

2 S 24

¹Max tit yowal Jehová yin conob Israel, max yaon oc Cham yin is nabal cham rey David tol chi yila' jantak bisil eb israel c'al eb aj Judá.

²Max yalon cham rey bay Joab, yajawil eb soldado ayoc yetok cham: —Ec'an xol masanil is tribual israel, chi tittac'al bay Dan masantac'al bay conob Beerseba, cax cheon aj is bisil eb anima, axca tu' ok yun wojtakneni jantak anima yin masanil, ẍi bay.

³Cax max tak'wi Joab: —Mamin rey, aokab Jehová co Diosal chi ion aj can bisil eb anima, cien elto ec'ban yintak tinani', cax oktoc'al ela', palta xin, ¿tzet wal yuj xan chochej chi aj is bisil eb anima ti'? ẍi Joab.

⁴Palta max tenxac'al oc cham rey yiban Joab yetok is yajawil eb soldado tol chi ilay aj bisil anima. Yuj tu' max eltek eb satak cham rey, max yiken eb toj bay max al-layi.

⁵A yet max ec'cantok eb bay yul a' Jordán max watx'nej aj eb is campamento bay Aroer bay tz'eyil ec'tok conob bay jobeal Gad, max lajwi tu' cax max toj eb bay Jazer.

⁶Lajwi tu' max toj eb bay Galaad c'al bay k'axanil tx'otx' chi yik Hodsi. Lajwi tu' max toj pax eb bay Dan, catatu' max meltzoj eb tilak yet Sidón.

⁷Max toj pax eb bay miman conob Tiro bay is conob eb heveo, yetokc'al is conob eb cananeo. Lajwi tu' max toj eb bay conob Beerseba bay Néguev yul yet Judá.

⁸Max lajwi yec' eb bay yul is nación tu' masanil, yinxa baloneb xajaw yetok junc'al c'u, catatu' max meltzoj eb bay Jerusalén.

⁹Max yak'on Joab bisil eb anima bay junjun conob bay cham rey: 800 mil winak tol tiempo yoc yin owal bay israel, ay pax 500 mil eb nak bay Judá.

¹⁰Max lajwi yion cham rey David is cuenta yin jantak anima bay yul conobal, cax max oc yin bilc'ulal, max yalon bay Jehová axca ti': —Caw wal max oc in mul yuj jun max wun ti'. A wal tinani' Mamin Jehová, chin tewi wal ayach tol cheil jun in mul tu' wiban, caw wal yob tzet max wun chi wabej, ẍi cham rey David.

¹¹Axa yet max sakbi aj yet junxa c'ual, max yalon Jehová bay Gad is chekbej, aom oc nabalej c'apax yayji bay cham rey David:

¹²Asi', al bay David: Axca ti' yalon Jehová: Oxeb tzet yetal ok waltej ayach, cax ok a sic'leni baytal ay junok ok ochej, cax ok wak'oni, ẍi Jehová, cachi.

¹³—Inye, ẍi Gad, cax max ul yalon bay cham rey David axca ti': —¿Chi mi je' a c'ul chi jay ukebok abil wajil bay yul a conob ti'? ¿Ma chi cha' a c'ul chak' elilal oxebok xajaw bay eb ajc'ul oc en? ¿Ma a oxebok c'ual ilya' cax chi cam anima yul a conobal ti'? Na' wal xin, cax ok aloni. Lajwi tu' ok tok walon pax bay Jehová Cham max in chekontek, ẍi bay.

¹⁴Axa max yun yalon cham rey bay Gad: —Caw wal chi somchaj in c'ul tinani' yuj tzet chi wut waloni. Watx' chon ayc'ay yul k'ab Jehová, mimanokab is cusc'ulalil Cham jin, manokabnak yul k'ab eb anima chon ayc'ayi, ẍi.

¹⁵Yuj tu xin yet-xac'al jun k'inibalil tu', max yatek Jehová jun owal ilya' yiban israel, masantac'al max tz'aknaj c'ual max al-layi. Yuj tu' max cam 70,000 anima bay yul masanil nación tu', max tittac'al bay Dan masantac'al bay conob Beerseba.

¹⁶Axa wal yet max yaontok jun ángel is k'ab yiban Jerusalén yet chi yak' lajwok eb anima bay tu' yaloni, max cusc'ul Jehová yuj tzet max uj tu', xan max yal bay jun ángel tu': K'okbilxa tu', ocan waanok, ẍi Jehová. A wal tu' ayic' jun ángel tu' bay tec'bal trigo yet Arauna jebuseo.

¹⁷A yet max yilon cham David jun ángel chi ec' ak'on lajwok conob tu', max yalon cham bay Jehová: —Ayin ay in mul, ¿tzet wal is mul juntzan eb anima ti'? Chin k'an ayach tol a wiban yetok yiban winatil chi oc jun miman yailal ti', ẍi.

¹⁸A yet jun c'ual tu' max jay Gad ul yalon bay cham David: —Ajantok bay tec'bal trigo yet Arauna jebuseo, cax cha watx'nen junok altar bay Jehová,*fn* ẍi bay.

¹⁹Cax max toj cham David axca max yun yalon Gad yuj Jehová.

²⁰Max yilontek Arauna tol lanan yapni oc cham rey yetok eb is chekbej tol t'inan chi yuttok ba eb bay ayic'ok, xan max ay nojan sat tx'otx' satak cham.

²¹Max yalon Arauna: —¿Tzet wal yuj xan chach jayoc ayin mamin rey? ẍi bay. Max tak'wi bay: —A yuj in manon jabok lugar bay a tec'bal trigo ti', cax ok in watx'nen aj junok yaltar Jehová cayti', yet watx' ok oc wanaj cam anima bay yul conob ti', ẍi cham David.

²²Max yalon Arauna bay cham rey David axca ti': —Yunokab mamin, watx'nej, cax chak'on xajanbal bay Jehová, axca wal chi yochej a c'ul. Ay no wacax chi je' ak'on yin xajanbalil cayti'; ay te mak'bal trigo c'al te yugo chi je' yoc te' yin sial.

²³Ayin ti' chi wak' masanil juntzan ti' ayach. ¡Chok wal el yin c'ul Jehová ok cha yab tzet ok ala'! ẍi bay.

²⁴Max yalon cham rey bay Arauna: —C'amak, tol chin man masanil juntzan tu' ayach, yujtol maj je' wak'on bay Jehová co Diosal tzet yetal tol man wetok, ẍi cham David. Yuj tu' max man cham jun lugar bay tec'bal trigo, yetokc'al no wacax yin 50 siclo plata ch'en tumin.

²⁵Max watx'nen can aj cham David jun altar bay Jehová bay tu', cax max yak'on tz'a xajanbal c'al xajanbal yet junc'ulalil bay Cham. Catatu' max yun yaben Jehová tzet max k'an yuj camich chi uj yulak conob Israel, cax max oc wanaj ilya' tu'.