Read Q'anjob'al 2 S 3 Bible Online

2 S 3 - Q'anjob'al bible

2 S 3

¹A eb ayc'alta' oc yetok eb yinatil Saúl caw wal najatil max yak' eb owal yetok eb ayoc yetok David, palta yak'ban axca tu' max ajc'al can yion yip eb yet David, axa pax eb ayc'al oc yetok yinatil Saúl xin, max ayc'ayc'al eb.

²A eb c'ajol cham David max alji yet ayic' bay Hebrón, a ton eb ti': A jun babel, a ton Amnón is yune' xal Ahinoam, xal aj Jezreel.

³Axa jun yet is cab, a ton Quileab, yune' xal Abigail, xal yistzilben Nabal aj Carmel. Axa jun yet is yox, a ton Absalón yune' xal Maaca is cutz'in Talmai, reyal Gesur.

⁴Axa jun yet is can, a ton Adonías is yune' xal Haguit. Axa jun yet is so', a ton Sefatías, is yune' xal Abital.

⁵Axa jun yet is wak, a ton Itream, yune' xal Egla a ton junok eb xal yistzil cham David. A ton juntzan eb is c'ajol ti' max alji yet ayic' cham bay Hebrón.

⁶Yak'ban a owal lananc'al yajcan xol eb yet David yetok eb yican Saúl, a cham Abner junjunc'al c'u chi yic'al yip yiban eb yet Saúl tu'.

⁷A cham camom Saúl tu' ay junxa xal yistzil chi yik Rizpa, is cutz'in cham Aja. Ay jun c'ual max yal cham Is-boset bay cham Abner: —¿Tzet yuj xan max ach way yetok jun xal yistzil camnak in mam?*fn* ẍi bay.

⁸A yuj max yal Is-boset axca tu' xan caw wal max tit yowal cham Abner; yuj tu' max yal axca ti': —¿Tom tx'i in chela', tokwal lanan waon oc in ba yetok eb ajc'ul yet Judá ti'? Ayin ti' caw wal watx'c'al max wut in ba bay Saúl, camnak a mam, bay masanil eb yican c'al bay eb yamigo, maj c'apax ach waoc yul k'ab David, ¿achxa chal tinani' tol max oc in mul yetok jun ix tu'?

⁹A Jehová max yak' is ti' bay David tol chi ilay ec' ikbej bay Saúl c'al bay eb yinatil, cax chi occan David tu' yin reyal bay israel, c'al bay Judá, chi tittac'al bay conob Dan masantac'al bay conob Beerseba. Titokab yowal c'ul Jehová wiban tatol c'am chi wak' wip yunen tzet max yal Cham tu', ẍi Abner.

¹¹Caw wal majxa je' yalon Is-boset junokxa belan k'anej bay Abner yujtol caw wal chi xiw bay.

¹²Lajwi tu' max yaontok cham Abner k'anej bay cham David: Tokwal mayinnak ay wikbej bay yul jun nación ti'. A tinani' jak' junok co laj k'anej cax chin oc etok yin masanil bay jantak bay ok je' wuj masantac'al chi yal yoc masanil eb wet israelal etok, ẍitok cham.

¹³Max paktzen cham David: Chi cha in c'ul chin watx'nej in trato etok, palta yowalil chojtaknejcan el jun k'anej ti': C'am chach jayoc in satak tatol c'am chetek ix Mical is cutz'in Saúl, ẍitok David.

¹⁴Max yaon c'apaxtok cham David k'anej bay Is-boset, max yalon axca ti': Atek ix Mical, ix wistzil, a ton ix max wi' yuj max wak' 100 jolom is winakil eb filisteo yuj tojolok ix bay a mam, ẍitok cham.

¹⁵Xan max yal Is-boset, tol chi ilay ec' xal bay Paltiel, is c'ajol Lais, a ton jun tu' is yichamil xal yayji ocok.

¹⁶Axa Paltiel xin, max toj yintak xal, chi ok'i, masantac'al max apni oc bay Bahurim. A bay tu' max yal cham Abner bay Paltiel tol chi meltzojcan bay tu'. Caytu' max yun meltzoji.

¹⁷Axa yin c'ojanc'ulalil max k'anjab cham Abner yetok eb yicham winakil is tribual israel, max yalon bay eb axca ti': Ayxa tiempoal max e na ayex ti' tol a cham David chi oc e reyalok.

¹⁸A tinani' xin, mayal apni tiempoal yet chi oqui, yujtol a Jehová max yak' is ti' tol a yuj cham David tu' ok col is conob bay yul k'ab eb filisteo, c'al bay yul k'ab masanil juntzan eb ajc'ul oc jin, ẍi cham Abner.

¹⁹Max k'anjab c'apax cham Abner yetok masanil eb yet Benjaminal, lajwi tu xin, max toj bay Hebrón k'anjab yetok cham David yuj tzet max yal eb yet israelal eb, c'al tzet max yal masanil eb yet Benjaminal.

²⁰Max apni oc yetok junc'alwan winak bay Hebrón, bay ayic' cham David. Caytu' max yun chekon watx'jok cham David jun miman loj yuj Abner c'al yuj eb ajun yetok.

²¹Lajwi tu' max yalon cham Abner bay cham David: A tinani' mamin rey, yowalil chin toj in wajbaj masanil eb jet israelal, yet chi watx'nej eb junok trato etok, caywal tu' ok yun ak'on yajawil axca wal chi yochej a c'ul, ẍi Abner. —Asi' xin, ẍi cham David bay Abner. Axa toj yin tzalojc'ulalil tu'.

²²A yet jun bek tu' max apni oc Joab yetokc'al eb is soldado David, max betic' eb yin junok owal. Caw wal miman tzet yetal ibil oc yuj eb, a ton max bet yican ec' eb bay eb ajc'ul. Palta a Abner xin, c'amxa ec' yetok David bay Hebrón, yujtol mayal yal toj ba yin tzalojc'ulal bay cham David tu'.

²³A yet max apni oc cham Joab yetok masanil eb soldado ajun yetok, max al-lay bay tol a Abner c'ajol Ner max ayji ec' yetok cham rey, axa tinani' xin, mayal chalay meltzoj yuj cham rey yin tzalojc'ulal.

²⁴Lajwi tu' max toj cham Joab bay cham rey, max yaloni: —¿Tzet yetal max on, mamin rey? A Abner max ach ul ilonok, cax max a cha meltzoj toj yin cac'al tu'.

²⁵¿Tom man ojtakok mamin rey, tol a jun Abner tu' toc'al chi ul yiaytek a sat yak'ban chi yila' tzetak chonej c'al tzetbil ayji? ẍi Joab.

²⁶Asanc'al yet max lajwi k'anjab Joab yetok cham rey David, max chekon cham Joab tu' toj saylay Abner, yin tol man yojtakok cham rey David, ata tu' max bet yi' meltzoj eb chekbej Joab tu' bay a' uc'bala' yet Sira.

²⁷A yet max apni oc Abner bay Hebrón, a Joab max iontok bay jun pac' tz'eyil puertail conob, yet chi k'anjab yetok tx'oklil. A bay tu' max jektok ch'en espada yin is c'ul, cax max cami, yuj paktzen camichal Asael is yuẍtak Joab tu' bay.

²⁸Max lajwi tu xin yin, c'ojanc'ulalil max yabaj cham rey David, max yaloni: A satak Jehová ayin ti' yetokc'al masanil eb in chekbej c'am co mul max oc yin is camichal Abner, is c'ajol Ner.

²⁹Ayokab c'ay jun ti' yiban Joab yetokc'al yiban eb yican c'al yinatil. A bay xol eb tu' ayokabc'al mac ok yab yail yin tol ay tzet chi el yin is mimanil, ma ayokab c'apax mac ya'ay yuj lepra, ayokab mac ok ay beyi, ma ayokab mac ok mak'lay camok c'al mac ok yab yail wajil, ẍi David.

³⁰A Joab c'al Abisai max mak'on cam Abner, yujtol a yet max oc owal bay Gabaón, a Abner tu' max mak'on cam yuẍtak eb.

³¹Max lajwi tu xin, max yalon cham rey David bay Joab c'al bay masanil eb ajun yetok, tol chi tziltok eb pichil c'al pichon ba eb yetok el pichilej, cax chi oc eb yin cusc'ulal yuj is camichal Abner. Axa cham rey David xin, max oc tzakan yintak mac max batxontok mimanil Abner.

³²Max mukon eb is mimanil Abner bay Hebrón. A bay tu' max ok' cham rey yuj Abner bay max mukay tu', max ok' c'apax masanil eb anima ajun yetok,

³³xan max bitnej cham rey jun cusc'ulal ti' axca ti': ¿Tzet yuj xan caytu' max yun a cam ach Abner, axca chi yun cam eb yobtakwom?

³⁴Tokwal c'alan a k'ab, tamwal c'alan akan yetok cadena. ¡Axcaxac'al chi yun cam eb anima yul k'ab eb anima yob nabal, caytu' max yun a cami! ẍi cham David. Axa eb anima xin, max ok'c'al eb yuj is camichal Abner.

³⁵Lajwi tu' max tewi oc eb yin cham David tol chi low jabok yet c'amto chi ay c'u, palta max yak' cham is ti' satak Dios: —¡Aokab Cham chi aon oc yailal wiban tatol chi wablej jabok loj ma junokxa tzet yetal yet c'amto chi toj c'u! ẍi.

³⁶Masanil anima ayic' bay tu' max nachaj el jun ti' yuj eb, caw wal max cha c'ul eb, yujtol a masanil tzet chi yun David chi chac'al c'ul eb masanil.

³⁷A yet jun c'ual tu' max nachaj el yuj eb israel tu' masanil tol a cham rey David c'am wal jabok yoc yin is camichal Abner, is c'ajol Ner.

³⁸Max lajwi tu' max yalon cham rey bay masanil eb is chekbej: —Ayex ti', ti' wal e yojtak e masanil tol mayal cam jun sat yajaw co xol aon israel on ti'.

³⁹Yuj tu' xan caxc'al a Dios max quin sic'on oc yin reyal, palta caw wal chi pax wip chi wabej yuj yobc'ulalil eb yune' xal Sarvia. Aokab Jehová ok paktzen bay jun max unen jun yobtakil ti', ẍi cham.