Read Q'anjob'al 2 S 5 Bible Online

2 S 5 - Q'anjob'al bible

2 S 5

¹Max lajwi tu' cax max bet masanil eb is tribual israel k'anjab yetok David bay Hebrón. Max yalon eb: Ayon ti' aontoc'al oc etok.

²Caxc'al tol yel a Saúl max oc co reyalok, palta ach max ak' wal ep on ekban yin owal. Ac'ala' junxa, a Jehová max aloni tol ach ok on ekbaj, c'al oc yin reyal jin on bay co conobal ti', ẍi eb.

³Max betic' eb yicham winakil conob israel k'anjab yetok David bay Hebrón yuj watx'nencan eb is trato yetok, cax max yaoncan oc eb Jehová yin testigoal yin is trato eb tu'. Caytu' max yun yoccan David tu' yin reyalilok israel.

⁴30 abil is k'inal David tu' cax max chaon el yich yoc yin reyal, cax cawinak abil max yak' reyal.

⁵Nan is waxakeb abil max yak' reyal bay Hebrón yiban eb anima aj Judá. Max lajwi tu', max yak'on reyal yiban conob Israel yetok Judá yin 33 abil bay Jerusalén.

⁶A yet jun c'ual max wajbaj oc rey David eb soldado yuj yak'on owal yin eb jebuseo ay bay Jerusalén. Yujtol max na eb jebuseo tu' tol maj je' yoc David yul is conobal eb tu', yuj tu' xan max yal eb: Ach ti' maj je' octek cayti'. A eb c'am chi je' yilwani c'al eb chi ay beyi, man ok ach chaon octek cayti', ẍi eb.

⁷Palta maxax ayc'ay conob Sión yuj, xan a jun tu' chi yik Conob David tinani'.

⁸A yet jun el tu' max yal David bay eb is soldado: Mac chi chaon el yich owal yetok eb jebuseo, ocokabtok bay yul olan bay chi ca toj a' aej chi ocapnok bay yul conob, cax chi mak'on cam masanil eb c'am chi je' yilwani c'al eb chi ay beyi. A wal juntzan eb tu' caw wal chin yaj eb, ẍi. A tu' elnaktek jun k'anej chi ali: A eb c'am chi je' yilwi c'al eb chi ay beyi c'am chi je' yoctok eb yul na, ẍi.

⁹Max lajwi tu' cax max watx'nen aj David is cuartel bay jun conob tu', max yak'on yik Conob David, cax max bic'ojc'al watx'nen aj nalak yinlak, chi tojtac'al bay Milo.

¹⁰A Jehová Dios Cham Yajaw yin Masanil, a' ayoc yetok David, xan yelxac'al max aj can mimanbilal.

¹¹A Hiram reyal Tiro max chektok mulnajwom bay, yetok juntzan eb josom te' c'al yetok eb mak'om poj ch'en, ibil oc te c'ute' yuj eb, cax max watx'nen aj eb is yatut David.

¹²Caytu' max yun nachaj el yuj David tol a wal caw Jehová max aon oc yin reyal yiban conob Israel, max aj wal can is yikbej yujtol caw wal ochebil conob Israel yuj Jehová.

¹³Max lajwi yel David bay Hebrón cax max apnican oc bay Jerusalén, aytoc'al eb ix ix max yi' yistzilok, xan xiwiltoc'al yuninal yetok eb ix.

¹⁴A eb is c'ajol max alji bay Jerusalén tu' a ton: Samúa, Sobab, Natán, Salomón,

¹⁵Ibhar, Elisúa, Nefec, Jafía,

¹⁶Elisama, Eliada c'al yetok Elifelet.

¹⁷A yet max yaben eb filisteo tol mayal oc David yin reyalok israel, max aj nilnaj eb toj yin David, palta max yab cham xan max toj col ba satlak ch'en.

¹⁸Yelc'ulalxac'al chi apni oc eb filisteo watx'nen ay is campamento bay jobeal Refaim.

¹⁹Yuj wal tu' xan max k'anlej David bay Jehová axca ti': —¿Chi mi je' wak'on owal yetok eb filisteo? ¿Chi mi wal aoc eb yul in k'ab? ẍi rey David bay Jehová. Max tak'wi Jehová bay: —Asi', ak' owal yetok eb. Ayin ok waoc eb yul a k'ab, ẍi Cham.

²⁰Max apni oc David yetok eb is soldado bay Baal-perazim. A bay tu' max ayc'ay eb filisteo yuj. Yuj tu' xan max yala': Max pojtok Jehová jun be xol eb wajc'ul ti', axca wal chi yun toj tobnaj junok elom aej, ẍi David. Yuj tu' xan Baal-perazim*fn* max yikcan jun lugar tu'.

²¹A yet max elaj eb filisteo, max bekoncan bulan eb is diosal, axa David yetok eb ajun yetok, max ec' iontok.

²²Max apni pax eb filisteo bay jobeal Refaim junelxa.

²³Yuj tu' xan max k'anlej pax rey David bay Jehová, max yalon Jehová bay: —Manchak ach oc bay satak eb, palta yintak eb chach tita. A tu' chach apni oc bay ay xiwil te bálsamo.

²⁴A yet ok aben bil yec' xolak k'ablak te te' tu', cax chach oc yin eb yin aymanil, yujtol ayin ok in babjok a satak, cax ayin ok in mak' cam eb filisteo tu', ẍi Jehová.

²⁵Max yikej rey David bay max yal Jehová. Yuj tu' xan max ayc'ay eb filisteo yuj, max chatoktac'al bay Gabaón masantac'al bay Gezer.