Read Q'anjob'al 2 S 6 Bible Online

2 S 6 - Q'anjob'al bible

2 S 6

¹Max wajban oc rey David eb soldado caw wal tol jelan bay xol eb israel, ay 30,000 eb.

²Max toj bay Baala yul yet Judá, tzakan oc masanil is soldado tu' yintak. Max naon q'uexon bay aycan is caẍail trato Jehová Dios, Cham Yajaw yin Masanil, a ton caẍa bay chi binaj Jehová, Cham ayoc yiban eb querubín.

³A bay yul yatut Abinadab, ay ajtok bay jun tzalan, a bay tu' ay is caẍail trato tu'. A yiban jun carreta caw wal ac', a tu' max yitek eb te caẍa tu'.

⁴A cawan is c'ajol Abinadab, a ton Uza c'al Ahío, a eb chi ikban te carreta bay ay ajtok te', a Ahío babel satak.

⁵Axa David yetok masanil eb conob Israel, yetok wal masanil is c'ul eb chi bitni eb c'al yaj t'uklabok eb canalwi satak Jehová yak'ban chi oc arpa c'al salterio, panderos, castañuelas c'al platillo.

⁶A yet max apni oc eb yetok is caẍail trato Dios bay is tec'bal trigo Nacón, cax max yaon oc Uza tu' is k'ab yin te caẍa tu' yaloni, yujtol max telc'ojtok no buey tok'nej oc te carreta tu'.

⁷Xan max tit yowal Jehová yuj max toj lacnaj Uza tu' yin te caẍa tu', yuj tu' max camxac'al bay c'atan te caẍa tu'.

⁸Max tit yowal David yujtol max mak'lay cam Uza yuj Jehová, yuj tu' xan max yikcan jun lugar tu' Pérez-uza*fn* yuj, ac'ala' axca tu' bi tinani'.

⁹A yet jun c'ual tu' max xiwcan aj rey David satak Jehová. Yuj tu' xan max yal David: ¿Tzet xan okto witok te caẍail trato yet Jehová bay cajan in? ẍi.

¹⁰Max naon ba c'ul David, majxac'al yitok te caẍa tu' bay is conob. Yuj tu' xan max yala' tol chi ilaycantok te' bay yatut Obed-edom aj Gat.

¹¹Oxeb xajaw max can te' bay tu', caw wal max yak' Jehová is watx'c'ulal yiban Obed-edom yetokc'al eb cajan yetok bay yatut.

¹²A yet max al-lay bay rey David tol yuj te caẍail trato Jehová xan ay yaxilal yiban Obed-edom yetok eb cajan yul yatut, c'al yetok masanil tzetak yetal ay bay, yuj tu' xan max toj yitek. Caw wal max tzaloji, max yiontek bay yul is conob.

¹³A yet max c'oli bey toj eb inej oc te caẍa tu' janic', cax max yak'on David jun no toro c'al jun no calnel bak'ech yin xajanbalil bay Jehová.

¹⁴A jun pichilej yet sacerdote naba lino ayoc yuj David, cax max aj t'uknaj canalwi yetok masanil is c'ul satak Jehová.

¹⁵Axca ton tu' max yun David yetok masanil conob Israel. Mimek k'in max cha eb yet max yiontek eb te caẍail trato tu' bay Jerusalén, chi xulay trompeta c'al aw yet tzalojc'ulal.

¹⁶A yet max apni oc te caẍail trato yet Jehová tu' bay conob David, t'anan eltek xal Mical is cutz'in Saúl bay yul wentena, max yiloni tol a rey David toxc'a chi aj t'uknaj canalwi satak Jehová, cax max intaknelay el cham yuj xal.

¹⁷A yet max apni oc te caẍail trato tu' yuj eb, cax max ilaytek bay yul jun mantiado watx'nebil yuj rey David. Max lajwi tu' cax max chekon David tu' yak'lay xajanbal tol chi ak'lay tz'aok, c'al xajanbal yet junc'ulalil yetok Jehová.

¹⁸A yet max lajwi yak'lay xajanbal tu', cax max yalon watx' k'anej yiban conob Israel yin bi Jehová Cham Yajaw yin Masanil.

¹⁹A jantak israel wajan ec' bay tu', eb winak c'al eb ix, max ak'lay junjun ixim pan bay eb, yetok jabjab bolbil chibej c'al takin uva. Max lajwi tu xin, cax max meltzoj eb bay yatut.

²⁰Ac'ala' c'apax rey David max meltzoj bay yatut yuj yalon watx' k'anej yiban eb cajan bay yatut. Max eltek xal Mical is yistzil ul chaoni, max yalon xal: —A tinani' watx'xac'al mi max ot a ba ach reyal israel. Max a tx'oxxac'al el a ba satak eb ix is chekbej eb nak chi mulnaj etok. Q'uixwiltakxac'al max ot a ba axcaxac'al junok comon anima, ẍi xal.

²¹Cax max tak'wi David: —Wal yel max in canalwi, palta satak Jehová, yujtol a Cham max in sic'on oc yin yajawilalok conob is q'uexelok a mam c'al q'uexelok eb a nuej. Yuj tu' xan ok in canalwokc'al bay satak Jehová.

²²Toltax chi je' wion ay in ba janic'okxa, cax chi el in q'uixwil axca alon tu', palta a eb ix ix chal tu', miman welapnok yul sat eb ix, ẍi rey David tu'.

²³Axa xal Mical, cutz'in Saúl, c'amxac'al junok yune' max yila'.