Read Q'anjob'al 2 S 7 Bible Online

2 S 7 - Q'anjob'al bible

2 S 7

¹A yet max octok rey David bay yul is yatut, yet mayal yaoc Jehová junc'ulal xol David tu' yetok eb ajc'ul oyan oc yinlak,

²max yalon cham bay Natán is chekbej Jehová: —Ti wal ojtak tol yinc'al tzalojc'ulalil chi yun woctok bay yul watut, bay naba c'ute' ayoc yin, axa pax te caẍail trato yet Dios xin, asanc'al yul mantiado ayoctok, ẍi rey David.

³Yuj tu' xan max yal Natán: —Yunokabc'al bay chi cha a c'ul, yujtol chi colwajc'al Jehová etok, ẍi Natán.

⁴A yet jun ak'bal tu' max k'anjab Jehová bay Natán:

⁵Asi', k'anjaban yetok in chekbej David tu', cax chaloni tol ayin Jehová in ti' chi wala': ¿Tom ok a watx'nej aj junok templo bay ok in ayjok?

⁶Yettaxc'al max ex wieltek ayex israel ex ti' bay Egipto masantac'al tinani', c'amc'al bay max in ayji yul junok na. Ilab tol asanc'al yul mantiado ayin.

⁷Yet max in beyc'altek, c'am junelok max in k'an bay eb anima max wac'al oc yin yicham winakilok e conob junok templo tol naba c'ute' ayoc yin bay chin ayji, cachi bay.

⁸Al c'apax bay: Ayin Jehová Yajaw in yin masanil chi wala': Ayin max ach wiel yin iloj calnel cax max ach waon oc yajawilok in conob israel.

⁹Tzanc'al bay chach eq'ui ayinc'al oc etok. Max in c'ayil masanil eb ajc'ul oc en, cax max wion aj can a mimanbilal axca eb mimek winak bay yulyibank'inal ti'.

¹⁰Yetok c'apaxok, max wak' jun e tx'otx' bay ok ex ayjok ayex in conob ex ti'. C'amxa mac ok ex ion elok; c'amxa ajc'ul ok ex etnenok axca max yun beyc'altek tiempo ti',

¹¹yet max waon oc eb yicham winakil conob tu' yilomalok in conob. Caw wal c'amxa tzet ok a na', c'amxa mac ajc'ul oc en. Cax chi walon abej tol ayc'al enatil ok occ'al yin reyal.

¹²Axa yet ok ajapnok tiempoal a cam xin, ayin ok wacan oc junok a c'ajol a q'uexelok yin reyal, cax ok waoncan oc masanil yul is k'ab.

¹³A junok ok waoc tu', a' ok watx'nen aj in templo, cax ok waonc'al oc jun ikbej ti' yul k'ab is yinatil yin tojbalk'inal.

¹⁴Tol is mam nak ok wunej, cax in c'ajol ok yun nak. Ta ay bay ok oc is mul, ok waoc yailal yin axca wal chi yun yalay oc yailal yin tzanc'al mac chi oc is yobtakil.

¹⁵Palta caw wal man ok wiel in camc'ulal yin nak tu', man axcaok max yun wion el in camc'ulal yin Saúl, xan max wiel yin yopiso yuj ach waoncan oc q'uexelok.

¹⁶Ayin ok wak'c'al beytok ikbej yin enatil yin tojbalk'inal, ẍi wal Jehová, cachi bay, ẍi Cham.

¹⁷Axca wal max yun yalon Jehová, axca tu' max yun yalon Natán bay cham rey David.

¹⁸A yet max yaben cham jun k'anej tu', max oc ijan yalon bay Jehová: Mamin Jehová, tok ay wal jabok welapnok tamwal ay yelapnok eb wichmam. ¿Mac in txel xin xan miman ikbej mayal ak' ayin?

¹⁹¿Tom txennej wal yayji oc jun ti' cha na' Mamin Jehová, yuj tu' xan max ala' tzet ok yun yel oc winatil yet bak'in? Tok wal axca beybal eb anima a beybal ti'.

²⁰¿Tzetto wal junokxa chin teyej wal a satak Mamin Jehová? Ach ti' ojtak tzetbil yayji oc in nabal ayin a chekbej in ti'.

²¹Masanil tzet yetal tol c'ayubtakxac'al yoqui, asannej ach chonej atac'ala' bay chochej, cax chak'on wojtaknej elok.

²²Yuj wal tu xin, c'amxa yalbanil yayji oc a may a k'ak'al Mamin Jehová. Caw wal c'am junokxa mac chi je' lajlen ba etok, c'am junokxa dios axca ach, asannej ach Dios ach, atac'ala' chi yun jabeni.

²³A pax a conob Israel ti xin, c'am junokxa conob lajan yetok. Yujtol asannej wal jun nación bay sat tx'otx' ti', max a colcan el yul k'ab eb ajc'ul yujc'al wal yoccan a conobok. Yuj a camc'ulal yin, yetok yuj a mayk'ak'al, c'al yuj tzet yetal tol c'ayubtak max onej, max eon eltek a conob tu' bay Egipto, cax max a beson el juntzan nación c'al comon dios yulak be yuj a mimanbilal,

²⁴yujtol ach max con aoc a conobok yin tojbalk'inal, xan ach max ach occan co Diosalok.

²⁵Yuj wal tu xin, Mamin Jehová, yunokabc'al tzet yetal max al win ayin a chekbej in ti', yetokc'al yin masanil winatil. Axcaokab tu' chi yun yion ba tzet max ala'.

²⁶Yet watx' mimanbil ach yin tojbalk'inal, cax chi yalon eb anima tol ach Jehová Dios, Yajaw ach yin Masanil, ach ton co Diosal ayon israel on ti'. Ac'ala' axca tu' ok yun yocc'al winatil yin reyal a satak.

²⁷Ach Mamin Jehová, Yajaw ach yin Masanil, co Diosal ach, ach wal chak' wojtaknej elok tol ok occ'al winatil yin yajawilal. Yuj tu' xan chin tec'baj in ba in k'anon jun ti' ayach.

²⁸Ach ti' Mamin Jehová, Dios ach, a tzet chala' chic'al yunej, yelxac'al watx' tzet max ak' a ti' ak'on ayin.

²⁹Elokab yin a c'ul chak' a watx'c'ulal yin winatil yet chi tec'bajc'al ba a satak. Ach wal max alcan jun ti' Mamin Jehová, xan a yuj a watx'c'ulal, watx'c'al ok yuncan winatil yin tojbalk'inal, ẍi David.