Read Q'anjob'al 1 R 10 Bible Online

1 R 10 - Q'anjob'al bible

1 R 10

¹A xal reinail Sabá max yab xal k'umal cham rey Salomón tol yelxac'al mimanbil cham yuj yilay aj can Jehová, xan max toj xal bay Jerusalén yuj yak'on porobal xal ta chi je' paktzen cham juntzan k'anlebal xal yelxac'al yatak yayji ocok. Xiwil chekbej xal ibil oc yuj, max jayoc yetok no camello, al yet no' yuj perfume; caw wal miman oro, c'al juntzanxa ch'en watx' yili ibil oc yuj xal. A yet max apni oc satak cham rey Salomón, max k'anlen jantak tzet nabil yuj.

³Max tak'wi cham Salomón bay masanil is k'anlebal xal, c'am wal junok is k'anlebal tu' tol maj nachaj el is paktzebal yuj cham.

⁴A yet max yilon xal reinail Sabá jantak is jelanil cham rey Salomón, toxac'al max c'aycan aj c'ul xal yuj. Max yilon oc xal is yatut cham max watx'nej, c'al tzet chi lo' bay is meẍa, c'al na eb is chekbej cham ayxa may yili. Tx'okxa yili c'apax is pichil eb is chekbej, c'al eb batxomaltek is copa cham, c'al juntzan xajanbal chi yak' tz'a bay templo Jehová,

⁶xan max yal xal bay cham rey axca ti': A tzet yetal max wab bay in conob yuj masanil tzet yetal cha watx'nej, c'al a jelanil chi binaji, caw wal yel man toc'alok chi ali.

⁷A wal tinani' chi waoc yin in c'ul yujtol ayin wal caw mayal wila'. Wal yel man tz'akanok nan juntzan ti' max al-lay wabej. A a jelanil yetokc'al masanil tzet yetal ay ayach yelxac'al ec'ban yintak axca tzet max wabej.

⁸Yelxac'al tzalojc'ulal ay eb chi mulnaj etok, yelxac'al tzalojc'ulal ayic' juntzan a chekbej ayic' etok ti' yet chi yaben eb a jelanilal.

⁹Al-layokab watx' k'anej yin Jehová a Diosal, tol chi tzaloj etok xan max yak' makbej Israel ti' ayach. Yuj ayc'alta' camc'ulal Jehová yin Israel, xan max ach yaoc yin reyal yet cha watx'nej beyc'ulal yin tojolal, ẍi xal.

¹⁰Lajwi tu xin, max yak'on c'apax xal 87 quintal oro, yetok xiwil perfume, yetok ch'en ch'en watx' yili bay cham Salomón. C'amxa junelokxa max jayoc miman perfume bay Israel axca jantak max sa' xal reinail Sabá bay cham.

¹¹Tx'ok pax yayji juntzan max tit yul barco yet cham Hiram, max yitek eb oro bay Ofir, xiwilxa te sándalo max tita, c'al ch'en ch'en manxa watx'ilok.

¹²A yetok te sándalo tu' max watx'nej cham rey Salomón baranda bay yul templo Jehová, c'al yin is despacho cham rey tu'. Max oc c'apax te' yin arpa c'al yin salterio yet eb sonlom. C'amxa junelokxa max jayoc bay Israel xiwilok te sándalo axca yet tu'.

¹³Axa pax cham rey Salomón xin, max yak' cham bay xal reinail Sabá masanil tzet max yochej c'ul max k'ana', tx'ok pax tzet yetal max el wal yin c'ul saon bay xal. Lajwi tu xin, max meltzoj xal bay is conob yetok eb is chekbej ajun yetok.

¹⁴A ch'en oro chi cha' cham rey Salomón yin junjun abil, chi apni oc yin 500 quintal.

¹⁵Palta c'am oc is tojlabal eb txonjom c'al is tojlabal eb rey bay Arabia c'al yetok yet eb gobernador bay yul makbej Israel tu' is tz'akilok.

¹⁶Max chek cham rey Salomón watx'nelay 200 mimek jenan oro makbal julbalej, 15 libra oro max oc yin junjun.

¹⁷Lajwi tu' max chekon c'apax watx'nelay junxa 300 coc'tak makbal julbalej, txenxa man canebok libra oro ayoc yin junjun. A tu' max yaoctok bay jun salón chi yik Salón K'akte' Líbano.

¹⁸Max chekon c'apax watx'nelay jun miman trono naba marfil, max oc oro caw wal watx' yin.

¹⁹A jun trono tu' wak txol yayji sat is k'ochal. Ay lajcaweb yechel coj, wakeb bay jun pac' jun k'och tu', wakeb bay jun pac'xa. A k'elub yichin tol xoyan yayji, ay is k'ab bay junjun is tz'eyil; a bay junjun tz'eyil tu' ayoc junjun yechel coj. C'am junokxa rey max watx'nej yet axca jun tu'.

²¹A masanil is copa cham rey, oroc'al elok, yetokc'al jantak ẍalu c'al xij chi k'anlay bay Salón K'akte' Líbano. C'am junok mitx'k'abej tu' tol plata, yujtol a yul tiempoal cham Salomón tu', a ch'en plata tu' man mimanok yelapnok ch'en;

²²yujtol ay juntzan is mimek barco Salomón chi ec' yetok mimek barco yet Hiram. Yin oxox abil chi jayoc eb bay Israel, ibil oc oro, plata, marfil, no maltin c'al no pavo real yuj.

²³Caytu' max yun yajc'al can cham rey Salomón yintak juntzanxa rey bay yulyibank'inal ti' yuj is jelanil c'al yuj is beyomal.

²⁴Masanilxac'al anima bay yulyibank'inal ti' chi yochej eb chi yila' c'al yaben jelanil Dios max yak' bay cham rey tu'.

²⁵Masanil anima chi yitek is sabal yin junjun abil bay; a ton ch'en plata, oro, pichilej can tojol, arma, c'al tzet yetal tol suk'uk'i yoc jabil, yetok no chej c'al no mula.

²⁶Max wajbaj ec' cham rey Salomón tu' xiwil carruaje yet owal c'al no chej. Ay 1,400 carruaje yetok 12,000 no chej ikom soldado. Ay carruaje c'al no chej ayic' bay juntzan conoblak tol yetc'alta' juntzan tu' yayji ocok. Ay c'apax juntzanxa carruaje tu' ayic' yetok eb soldado chi taynen cham rey bay Jerusalén.

²⁷Manxa jantakok plata max waj cham rey bay Jerusalén, axcaxac'al comon ch'en yayji, manxa jantakok c'apax te c'ute' axcaxac'al te yichlakil teal higo bay pananil yichlak witz cayxac'al tu' yayji te'.

²⁸A no chej cham rey Salomón, a tu' chi tit no' bay Egipto c'al bay Cilicia, yujtol a eb txonjom cham rey tu' chi manon eb no' bay tu'.

²⁹A junok carruaje chi manlaytek bay Egipto 600 siclos plata is tojol axa junok no chej 150 is tojol. Axa pax eb reyal hitita c'al reyal sirio chi manon pax eb bay is txonjom cham rey Salomón.