Read Q'anjob'al 1 R 15 Bible Online

1 R 15 - Q'anjob'al bible

1 R 15

¹A Abiam max chael yich yak'on reyal bay Judá yet wal 18 abilxa yoc Jeroboam is c'ajol Nabat yin reyal bay Israel.

²Oxeb abil max yak' reyal bay Jerusalén. A is txutx chi yik Maaca, is cutz'in Absalón xal tu'.

³A Abiam tu' max oc pax is mul axcac'al yet is mam, caw wal man watx'ok is nabal yin Jehová is Diosal. Maj yikej bay Cham yin masanil is c'ul axca wal max yun cham rey David, a ton is yichmam.

⁴Palta xin, a yuj is camc'ulalil Jehová yin cham rey David, xan maj tanxac'al el is yinatil. Maxto occan is yinatil tu' yin reyal bay Jerusalén, maxto colcan el jun conob tu',

⁵yujtol a cham rey David caw wal watx' max yut ba satak Jehová, yujtol majc'al yiel ba yin tzet yetal max yal Jehová bay, asan wal is mul max oc yin nak Urías hitita.

⁶Max occ'al owal nan xol Roboam yetok Jeroboam a ton yet iquisto ec' Roboam tu', max oc c'apax owal xol Abiam yetok Jeroboam. A janic'okxa is yabixal Abiam, yuj masanil tzet max yunej, a tu' tz'ibbilcan ay yul tx'an un is yabixal eb reyal Judá.

⁸A yet max cam Abiam, max mukon eb bay conobal David. Lajwi tu' axa is c'ajol chi yik Asa max occan yin reyal.

⁹A Asa max chael yich yak'on reyal bay Judá yet wal 20 abil yoc Jeroboam reyal bay Israel.

¹⁰41 abil max yak' reyal bay Jerusalén, Maaca yoc bi is txutx ixnam a ton is cutz'in Absalón.

¹¹A tzet max yun cham rey Asa tu' caw wal watx' satak Jehová, axca wal max yun cham rey David is yichmam.

¹²Max yuktej el masanil juntzan winak bay yul nación tu' tol chi yun ajmulal yetok yet winakil bay chi oc ayilal, max yion el masanil juntzan yechelej max watx'nej eb yichmam.

¹³Max yion c'apax el is mimanbilal xal Maaca is txutx ixnam yujtol max yak' watx'jok xal jun yechelej Asera yajbejtak. Max yuchaj cham jun yechelej tu', max yak'on tz'a bay ti a' aej chi yik Cedrón.

¹⁴Caxc'al maj yiel masanil juntzan lugaril ayilal bay can ayajok, palta caw wal watx' max yutc'al cham is nabal satak Jehová masanil is k'inal.

¹⁵Max yaon c'apax octok bay yul templo Jehová ch'en oro c'al ch'en plata c'al juntzan mitx'k'abej max yak' yetok is mam bay Jehová.

¹⁶Ayc'al owal nan xol rey Asa yetok Baasa reyal Israel.

¹⁷A yet max toj Baasa yak'on owal yin Judá, max watx'nej oc conob Ramá yin is miman cuartelok yet chi makchej be yet watx' c'amxa mactxel chi je' yapni oc bay Judá.

¹⁸Yuj tu' xan max yieltek cham rey Asa masanil ch'en oro c'al ch'en plata ay bay templo Jehová, c'al bay yatut, max chekon eb mimek yopiso bay yul is makbej toj yak'oncan eb ch'en bay Ben-adad reyal Siria. A jun tu' is c'ajol Tabrimón, is yitxiquin Hezión, ayoc yin reyal bay Damasco. A yetok juntzan tumin tu', max yaontok junok carta yuj yalon axca ti':

¹⁹Co watx'nej junok co trato, axca max yun eb jichmam. Ti chi watok oro c'al plata in sabalok ayach. Ak' lajwok a trato yetok Baasa, reyal Israel, caytu' ok yun bekon yak'on owal win, ẍitok bay.

²⁰Max cha' c'ul Ben-adad tzet yetal max yal cham rey Asa, xan max chektok eb is soldado yak'on owal yin Israel, cax max ayc'ay masanil juntzan conob ti': Ijón, Dan, Abel-bet-maaca, yetok masanil Cineret yetokc'al masanil is makbej Neftalí.

²¹A yet max yaben Baasa axca tu', max bekon watx'nen aj conob Ramá, axa meltzoj bay conob Tirsa.

²²Yuj tu' max yawtej cham rey Asa masanil eb aj Judá, c'amxa junok tol maj apnokocok, max yiontok eb tzetak yetal ay bay Ramá, ch'en ch'en, yetokc'al te te' lanan yaon oc Baasa yin watx'jubalok aj conob tu'. Axa yetok juntzan tu' max watx'nej aj cham rey Asa cuartel bay conob Geba yul yet Benjamín, c'al bay conob Mizpa.

²³A jantakto is yabixal cham Asa, c'al is mimanbilal, c'al masanil tzet max yunej, c'al juntzan conoblak max watx'nej ajok, a tu' tz'ibbilcan bay tx'an un yet is yabixal eb reyal Judá. Yinxa yicham winakil cham rey Asa max yabi ay; a yin yakan max oc yailal tu'.

²⁴A yet max cami, max mukon eb bay mukan eb yichmam bay conobal David. Lajwi tu' max occan Josafat is c'ajol yin reyal.

²⁵A yet cabxa abil yoc Asa yin reyal bay Judá, max chaon el yich Nadab c'ajol Jeroboam yak'on reyal bay Israel, cab abil max yak' reyal.

²⁶Caw wal yob tzet max yun satak Jehová: axca max yun is mam yin yikban eb yet conob Israel yin yobtakil.

²⁷Palta a pax Baasa is c'ajol Ahías, titnak yin yinatil Isacar, max aj wan yin ajc'ulal yin cham Nadab, max mak'on cam bay Gibetón. A jun tu' conobal eb filisteo oybil aj yuj Nadab yetok masanil eb soldado yet Israel.

²⁸A yet oxebxa abil yoc Asa yin reyal bay Judá, a yet tu' max mak'lay cam Nadab yuj Baasa, axa max occan yin reyal is q'uexelok.

²⁹A yet max oc yin reyal tu', max mak' cam masanil is yinatil c'al yican Jeroboam, axca wal max yun yalon cham Ahías is chekbej Jehová aj conob Silo. Junelnej max yak' lajwok Baasa tu' masanil, c'amxa junok max can yin iquisal.

³⁰Caytu' max yun yuj is mul Jeroboam max yaocok. A max tx'emontek yowal c'ul Jehová yujtol max yikbajtok eb yet israelal yin yoc yobtakil eb satak Dios.

³¹A janic'okxa yabixal Nadab c'al masanil tzet max yunej, a tu' tz'ibbilcan ay bay yul tx'an un yet is yabixal eb reyal Israel.

³²A rey Asa yetok Baasa reyal Israel ayc'al owal max yun eb.

³³A yet oxebxa abil yoc Asa yin reyal bay Judá, a yet tu' max chaon el yich Baasa c'ajol Ahías yak'on reyal bay conob Tirsa yiban masanil Israel. 24 abil max yak' reyal.

³⁴Palta a masanil tzet max yun Baasa tu' caw wal yob satak Jehová, max yaoc is yobtakil axca max yun Jeroboam tol max yikbaj eb Israel yin yobtakil.