Read Q'anjob'al 1 R 19 Bible Online

1 R 19 - Q'anjob'al bible

1 R 19

¹Max k'anjab Acab yetok xal Jezabel yuj tzet max yun cham Elías c'al tzet max yun mak'on cam cham eb chekbej comon dios.

²Yuj tu xin, xan max yatok xal is chekbej bay cham Elías: Titokab yowal c'ul eb in dios ti' win, ta c'am chach wut axca max ot a mak'on cam eb chekbej in diosal tu' yet yecal yab axca ti', ẍi xal.

³Max nachaj el yuj cham Elías tu' tol ay is may yayji ocok, cax max beson el ba yet watx' c'am chi cami, cax max tojcan bay Beerseba, yul yet Judá. A bay tu' max yak'can is chekbej.

⁴Axa cham xin, max tojc'al bay takin tx'otx', junto c'ual max bey toji. Max c'unbi aj xin, cax max xew bay yich jun te te'. A bay tu' max yochej max camxac'al. Yuj tu' xan max yal cham: K'okbilxa Mamin Jehová. Ak' inxac'al camok, yujtol man yelokxac'al watx' in yintak eb wichmam, toltax max cam eb, akxa ayin, ẍi cham.

⁵Max ay telan cham bay yich te te' tu', max wayajok. Axa max yun xin, max apni oc jun ángel xibten el is wayan, max yaloni: Ajan wanok cax chach lowi, ẍi bay.

⁶Axa max yiloni, a bay is jolomtak, a tu' ay jun ixim pan k'anbinak xol tzak'ak' yetok jun ẍalu aej. Max ay chotan cham xin, cax max lowi c'al yuq'uena'. Lajwi tu' max ay pax telan junelxa wayi.

⁷Max jay pax jun ángel tu' xibten el wayan cham junelxa, max yaloni: Ajan wanok, lowan, yet watx' c'am chach c'unbi ajok, yujtol najatto toj bay ok ach apnok, ẍi bay.

⁸Max aj pax wan cham, max lowi. Caw wal max oc yip yuj tzet max lo' tu'. Cawinak c'u c'al cawinak ak'bal max bey cham, cax max apni oc bay witz Horeb bay tx'oxnak ba Jehová.

⁹A yet max apni oc bay tu', max octok bay yul jun ch'en nach'en. A tu' max ec' ak'bal yuj cham. A bay tu' max k'anjab Jehová bay, max yalon axca ti': ¿Tzet chon cayti'? ẍi Jehová.

¹⁰Max tak'wi cham: Mamin Jehová, Yajaw ach yin Masanil, caw wal max tit yowal in c'ul yuj tzet chach utlay yuj eb wet conob Israel, yujtol max bekcan eb a trato, max yuchon ec' bulnaj eb a altar, max mak'on cam eb eb a chekbej. Asanxanej in max in colchajcan elok, palta lanan in saylay ec' yuj eb yet chin mak'lay cam yuj eb yaloni, ẍi cham.

¹¹Max yalon Jehová bay cham: Elantok bay tu' cax chach oc lecan in satak bay jolom witz ti', yujtol ok in ec'tok bay tu', ẍi Jehová. Max yaontek jun miman cak'ek' tol chi pojtoj ch'en yuj bay jolom witz tu', max pojtoj ch'en mimek ch'en satak Jehová, palta maj tx'ox ba Cham xol cak'ek' tu'. Max lajwi yec'tok jun miman cak'ek' tu', cax max yak'on jun quixcab, palta majc'al tx'ox ba Jehová xol quixcab tu'.

¹²Max lajwi yec'tok jun quixcab tu', max tit pax jun k'ak'ej, palta majc'al tx'ox ba Jehová xol k'ak'ej tu'. Yet max lajwi yec'cantok k'ak'ej tu', yinxac'al c'ojanc'ulal max yun yaben cham Elías yoc jun k'anej.

¹³A yet max yaben cham tu', max yaon oc is jokan pichil yenelok is sat, max eltek cham, max oc lecan bay ti' ch'en nach'en tu', cax max yaben cham yoc jun k'anej, max yaloni: ¿Tzet chon cayti', Elías? ẍi.

¹⁴Max tak'wi cham: Mamin Jehová, Yajaw ach yin Masanil, caw wal max tit yowal in c'ul yuj tzet chach utlay yuj eb wet conob Israel, yujtol max bekcan eb a trato. Max yuchon ec' bulnaj eb a altar, max mak'on cam eb a chekbej. Asanxanej in, max in colchajcan elok, palta lanan in saylay ec' yet chin mak'lay cam yuj eb yaloni, ẍi cham.

¹⁵Max yalon Jehová bay cham: Asi', meltzojan yul a be bay takin tx'otx' cax chach tojcan bay Damasco, cax chaon oc Hazael reyal bay Siria,

¹⁶c'al aon oc Jehú is yinatil Nimsi is reyalok Israel, c'al Eliseo is c'ajol Safat aj Abel-mehola, a' chaoc in chekbejok a q'uexelok.

¹⁷A mac chi colchajcan el yul is k'ab Hazael, axa Jehú ok mak'on camok, axa mac chi colchajcan el yul is k'ab Jehú, axa Eliseo ok mak'on camok.

¹⁸Palta ayto ukebokxa mil eb israel mitx'bil waay wuj, tol majc'altac'a oc eb yin ayilal bay Baal, tamwal chi tz'ubil eb ti', ẍi Jehová.

¹⁹Max meltzoj cham Elías xin, max jay bay ayic' Eliseo is c'ajol Safat. Lanan k'uwi tx'otx' cham, yetok jaywanxa chi mulnaj yetok, 12 mojan wacax chi k'uwi tx'otx', axa cham inej oc jun mojan no' tzunanxac'al. Max tit cham Elías, max apni oc c'atan cham Eliseo, ayman max yatok cham Elías is jokan pichil yiban cham.

²⁰A wal yet jun bek tu' max bekoncan cham Eliseo no wacax tu', cax max oc tzakan yintak cham Elías, max yaloni: —Cha in tok in tz'ubcan el ti' in mam c'al in txutx cax chin tak'encan eb. Chi lajwi tu xin, cax chin tojcan etok, ẍi cham Eliseo. —Chi je' chach toji, palta cha natek tzet max ach wutej, ẍi cham Elías.

²¹Max toj cham Eliseo xin, max mak'on cac'on no wacax tu'. A yetok te yugo max bol no chibej tu', cax max yak'on low eb anima chi mulnaj yetok. Max lajwi tu' max toj cham yintak cham Elías.