Read Q'anjob'al 1 R 22 Bible Online

1 R 22 - Q'anjob'al bible

1 R 22

¹Oxeb wal abil c'am jabok owal xol conob Israel yetok eb sirio.

²A yet is yox abil tu', max apni oc Josafat, reyal Judá yilon Acab, reyal Israel.

³Max yalon cham reyal Israel tu' bay masanil eb ayoc yin opiso yetok: —Caw wal e yojtak ayex ti', tol a conob Ramot yul yet Galaad jetc'alta' yayji. ¿Tzet yuj xan tol c'am chi jican ec' bay cham reyal Siria? ẍi bay.

⁴Max k'anlen cham bay Josafat: —¿Chi mi je' a c'ul a colwaj wetok yin co chaon oc owal yetok Ramot yul yet Galaad? ẍi. Cax max tak'wi Josafat: —Ayin ti', yetok eb in soldado, c'al jantak in chej yet owal, chon colwaj etok.

⁵Palta a yet c'amto chi oc owal tu', elok wal yin a c'ul chi co k'anlej bay Jehová, ẍi Josafat.

⁶Max yawtentek cham reyal Israel tu' 400 eb chi yaloc ba chekbejok Dios, max k'anlen bay eb: —¿Chi mi in chaoc owal yetok conob Ramot ma c'amak? ẍi bay eb. Max tak'wi eb axca ti': —Ak' owal yetok. A Cham Jajawil ok aon oc yul a k'ab, ẍi eb.

⁷Max k'anlen Josafat: —¿C'amxam wal junok chekbej Jehová cayti' bay chi co k'anlej? ẍi.

⁸Max tak'wi cham reyal Israel tu' bay: —Ayto wal jun cham chi je' k'anjab yetok Jehová, a ton Micaías is c'ajol Imla. Asan xin, caw wal chi chichon in c'ul yin, yujtol c'am junelok watx' k'anej chi yal win, yobc'al tzet chi yal win, ẍi bay. Max yalon Josafat bay: —Manchak al axca tu', ẍi bay.

⁹Max lajwi tu' max yawten cham Acab junok is chekbej, max yalon bay: —Asi', awtej Micaías is c'ajol Imla yin aymanil, ẍi bay.

¹⁰A cham rey Acab yetok Josafat reyal Judá, ayoc is pichil eb yet reyal yuj. Max ay chotan eb bay yul trono bay jun tec'bal trigo cawilal ti' puertail conob Samaria. Masanil eb chi yaloc ba chekbejok Dios tu', chi yal eb tzet ok eloc satak eb rey tu'.

¹¹Axa pax Sedequías is c'ajol Quenaana max watx'nej juntzan ch'en ch'en axca yuc'a' wacax, chi yaloni: Axca ti' max yal Jehová: A yetok juntzan axca yuc'a' wacax ti' cax ok a tekon cam eb aj Siria masantac'al ok yal cam eb oj, ẍi Cham, ẍi bay.

¹²Jun lajanxac'al chi yun yalon eb masanil, chi yalon eb bay cham rey: ¡Asi', ak' owal yin Ramot yujtol ok yaoc Jehová jun conob tu' yul a k'ab! ẍi eb masanil.

¹³Axa pax jun chekbej max toj ion cham Micaías tu', max yal bay cham axca ti': —Masanil eb chekbej Dios max aloni tol watx' ok eloc cham rey, yuj tu' al pax ach ti' axca chi yun yalon eb tu', ẍi jun chekbej tu' bay.

¹⁴Max tak'wi cham Micaías bay: —Max wak' in ti' satak Jehová Cham iquis, tol asan tzet chi yala', a' ok wala', ẍi cham bay.

¹⁵Maxc'al jayoc bay satak cham rey tu', max k'anlen bay: —A tinani' Micaías, ¿tom chi co chaoc owal yetok conob Ramot yul yet Galaad ma c'amak? ẍi bay. Max tak'wi cham Micaías: —Ocan yin owal tu', ok je' oj. A Jehová ok aon oc jun conob tu' yul a k'ab, ẍi cham, palta toc'al max yal axca tu'.

¹⁶Max yalon cham rey bay: —Xiwil wal el max wal ayach, tol a tzet yetal yel chal ayin, yin is bi Jehová, ẍi bay.

¹⁷Max yalon cham Micaías: Max wil masanil eb israel max saklemtok eb bay jolomlak witz axca no calnel c'am is yilomal. Max yalon Jehová: A juntzan eb ti' c'am yilomal eb, meltzojokab eb bay yatut, ẍi Jehová, ẍi cham.

¹⁸Max yalon Acab bay Josafat: —Ila wal xin, ¿tom maj wal ayach tol a jun cham ti' c'am tzet watx' chi yal win, asanc'al yobal? ẍi bay.

¹⁹Max yalon pax cham Micaías: —Ab wal is k'anej Jehová. Max wila' tol chotan ay Jehová yul is trono, yetok masanil mac ayic' bay satcan tu' lecan oc eb yinlak Cham.

²⁰Max lajwi tu' max yalon Jehová: ¿Mac ok ak'on yun Acab yet chi toj yin owal yetok conob Ramot yul yet Galaad, yet watx' chi toj cam bay tu'? ẍi cham. Tx'ok tx'okc'al max yun yalon eb bay.

²¹Axa max yunej, ay jun espíritu max apni oc bay satak Jehová tu', max yaloni tol chi toj yak' yunej. Max k'anlen Jehová bay yuj tzet ok yutej.

²²Max yalon jun espíritu tu' tol chi yiptzej is nabal juntzan chekbej Acab tu' yet chi yak'c'al eb lek'tial. Yuj tu' xan max yal Jehová: Asi' xin, wojtak tol ok je' oj ak'on ayc'ayok, ẍi Cham.

²³Yuj tu xin, max chatek Jehová jun espíritu yet lek'tial bay eb a chekbej ti' yet chi yalon eb axca tu', yet watx' chi lowxac'al en, ẍi cham Micaías tu' bay cham rey.

²⁴Yet wal jun bek tu' cax max jitzon oc ba Sedequías is c'atan cham Micaías, max mak'ontok is sat cham, max yaloni: —¿Tzet chi yun yel jun espíritu petoj bay Jehová tu' win, cax chi k'anjab pax ayach? ẍi.

²⁵Max tak'wi cham Micaías axca ti': —Okxa abej yet ok ach ec' a c'ubaj el a ba bay tilak junjun na, ẍi cham.

²⁶Max lajwi tu' max yalon cham rey Acab: —Mitx'ek ay Micaías ti' cax che yiontok bay Amón is gobernadoral conob ti', c'al bay Joás in c'ajol.

²⁷Alek bay eb tol ayin chi wala' tol chi alay octok yul preso, jab jabokab ch'an is lobej chi ak'layi, c'al jab jab ch'an aej chi ak'lay yuq'uej, masantac'al chin meltzoj yin tol c'am tzet chin oni, ẍi cham.

²⁸Max yalon cham Micaías jay belanxa k'anej axca ti': Ta watx' ok yun a meltzoji, manak Jehová chi k'anjab ayin chi yal tu'. Chi cam e naon jun ti' ex wet conob, ẍi cham.

²⁹Max lajwi tu' cax max toj cham reyal Israel tu' yetok Josafat reyal Judá, yin owal bay Ramot yul yet Galaad.

³⁰Max yalon Acab bay Josafat: —Comon pichilej yet eb soldado ok waocok, cax ok in oc xol owal tu', axa pax ach xin, ayokabc'al oc a pichil yet reyal ti', ẍi bay. Max q'uexon el is pichil cax max toj xol owal tu'.

³¹A pax cham reyal Siria xin, maxax yal bay eb 32 is capitán: C'am chex oc yin junokxa mactxel, palta asannej yin cham reyal Israel chex oqui, ẍi.

³²Axa yet max yilon oc eb capitán tu' Josafat, max yoyon ba eb yin. A yalon eb tol a is reyal Israel tu', yuj tu' xan max aj yaw Josafat.

³³Axca tu' max yun nachaj el yuj eb tol manak reyal Israel tu', cax max el eb yin.

³⁴Palta ay jun soldado comonc'al max julwaji. C'uxanc'al max toj txam is julbal tu' bay chi nublej ba ch'en pichilej ayoc yuj Acab tu', yuj tu xin, xan max yal bay jun nak inej oc carruaje bay ay ajtok tu': —I meltzoj no chej ti', cax chin eon el xol owal ti', yujtol caw wal miman max yun in lajwi, ẍi.

³⁵A yet jun c'ual tu' caw wal ow max yun yoc owal. Maxto lecbaj oc eb cham Acab tu' bay yul carruaje yet chito wal yak' eb yip yak'on owal yetok eb aj Siria tu'. Axa yet max ay c'u xin, max cami, tx'okxa yel sequecok is chiq'uil yul carruaje tu'.

³⁶Axa yet lananxa toj c'u max oc aw xol masanil eb soldado:

³⁷¡Paxanektok bay e conobal c'al bay e yatut junjun ex! ẍi. Max cam cham rey Acab tu' cax max ilaytek is mimanil bay Samaria. A tu' max mukayi.

³⁸Max tx'ajlay is carruaje tu' bay jun a' najab aej watx'nebil bay Samaria tu', bay chi tx'ajwi eb ix ajmul ix. A bay tu' max lek'lay is chiq'uil cham Acab tu' yuj no tx'i'. Caywal tu' max yun yeloc axca max yun yalon Jehová.

³⁹A jantakto is yabixal Acab tu' c'al tzet max yunej, c'al yabixal is yatut naba marfil, c'al mimek conob max watx'nej, a tu' tz'ibbilcan is yabixal bay yul libro yet is yabixal eb reyal Israel.

⁴⁰A yet max lajwi camtok Acab tu', axa Ocozías is c'ajol max occan yin reyal is q'uexelok.

⁴¹A yet canebxa abil yoc Acab yin reyal bay Israel, max chaon el yich Josafat is c'ajol Asa yoc reyal bay Judá.

⁴²Ayxa 35 abil is k'inal yet tu', 25 abil max yak' reyal bay Jerusalén. A is txutx chi yik Azuba is cutz'in Silhi.

⁴³A Josafat tu' watx'c'al tzet max yun axca max yun is mam, caw wal watx'c'al is yunben satak Jehová. Asan tol maj chek yilay el masanil txajlobal bay can ayajok bay chi yak' eb anima xajanbal c'al bay chi yak' tz'a eb incienso.

⁴⁴A Josafat tu' max watx'nej jun is trato yet junc'ulal yetok cham reyal Israel.

⁴⁵A jantakto is yabixal, c'al is mimanbilal, c'al owal max yak'a', a tu' tz'ibbil bay tx'an un yet is yabixal eb reyal Judá.

⁴⁶A Josafat tu' max yiel masanil juntzan winak chi mulji yetok yet winakil yin is ayilal bay yul is makbej, a ton juntzan maxto cancan yul is tiempoal Asa is mam.

⁴⁷(A yet tu' a bay Edom c'am rey ayocok, asan jun yajaw abil oc yuj cham Josafat.)

⁴⁸A Josafat tu' max watx'nej aj barco axca yet eb aj Tarsis, yet chi toj ioj oro bay Ofir, palta maj je' toji, yujtol max pojtok juntzan barco tu' bay Ezion-geber.

⁴⁹Lajwi tu xin, a Ocozías c'ajol Acab, max yal bay Josafat tol chi toj eb is mulnajwom yin barco yetok eb yet tu', palta a Josafat maj yal c'ul.

⁵⁰Max cam Josafat, max mukay bay conobal David, a ton is yichmam. Lajwi tu' axa Joram is c'ajol max occan yin reyal is q'uexelok.

⁵¹A yet 17 abil yoc Josafat yin reyal bay Judá, a yet tu' max chael yich Ocozías c'ajol Acab yoc yin reyal yiban Israel bay conob Samaria, cab abil max yak' reyal.

⁵²Palta a is yunben, caw wal yob satak Jehová, max beybalnejc'al is yob beybalil is mam c'al is txutx, c'al is beybal Jeroboam is c'ajol Nabat, cham max ikban Israel yin yobtakil.

⁵³Toltax max oc ayilal bay Baal, axcac'al max yun is mam yet yalantok. Caytu' max yun tx'emontek yowal c'ul Jehová Diosal Israel.