Read Q'anjob'al 1 R 4 Bible Online

1 R 4 - Q'anjob'al bible

1 R 4

¹Max oc cham Salomón yin reyal xol masanil eb yet israelal.

²A eb mimek yopiso yetok, a ton eb ti': Azarías, a ton is c'ajol cham Sadoc, ayoc yin sacerdoteal;

³Elihoref c'al yetok Ahías, is c'ajol Sisa a ton eb chi tz'iben yabixal tzet chi yun cham rey. Josafat, is c'ajol Ahilud, yajtz'ib cham rey yayji ocok.

⁴Benaía is c'ajol Joiada, a' ayoc yajawilok eb soldado; axa cham Sadoc yetokc'al Abiatar, sacerdote yayji eb;

⁵Azarías c'ajol Natán, a yajaw yayji xol eb gobernador; axa Zabud is c'ajol c'apax cham Natán, sacerdote yayji, c'al ak'om nabalej bay cham rey.

⁶Ahisar, a jun tu' mayordomo yayji bay is despacho cham rey, c'al Adoniram, is c'ajol Abda. A chi ilon eb mulnajwom tol yowalil chi mulnaji.

⁷A Salomón tu' ay lajcawan is gobernador yul masanil is makbej Israel, a yopiso juntzan tu', tol junjun eb chi yitek eb is gasto cham rey yetokc'al eb cajan yetok bay yatut yin junjun xajaw yul abil.

⁸A lajcawan eb gobernador tu' a ton eb ti': Ben-Hur ay bay siquilal tx'otx' yet Efraín;

⁹Ben-Decar bay Macaz, Saalbim, Bet-semes, Elón c'al Bet-hanán.

¹⁰Ben-Hesed, bay Arubot yetok c'apax bay Soco c'al bay masanil yul yet Hefer;

¹¹Ben-Abinadab, bay masanil yul makbej Dor; a is yistzil jun tu' a ton xal Tafat is cutz'in Salomón;

¹²Baana, is c'ajol Ahilud, bay Taanac, Meguido c'al bay masanil yul yet Bet-seán; a jun tu' junej ay yetok Saretán, bay yalan aytek Jezreel, chi tojtac'al bay Bet-seán masantac'al chi apni bay Abel-mehola bay sataktok Jocmeam.

¹³Ben-Geber, bay Ramot yul yet Galaad, a ton jun tu' chi ilon masanil juntzan aldea yet Galaad, a ton juntzan tu' yet Jair is c'ajol Manasés, c'al yul is makbej Argob; a ton tu' ay c'apax yul yet Basán. A bay tu' ay 60 mimek conob tol ayoc is murallail, naba bronce ayoc yijulok is puertail;

¹⁴Ahinadab, is c'ajol Ido bay Mahanaim;

¹⁵Ahimaas, a ton jun tu' max nupay yetok xal Basemat is cutz'in cham Salomón, bay yul yet Neftalí.

¹⁶Baana, is c'ajol Husai, bay yul yet Aser c'al bay Alot;

¹⁷Josafat, is c'ajol Parúa, bay yul yet Isacar;

¹⁸Simei, is c'ajol Ela, bay yul yet Benjamín;

¹⁹Geber, is c'ajol Uri, bay yul yet Galaad, a ton bay is conobben Sehón reyal amorreo, c'al Og reyal Basán. Asan jun tu' yajaw yayji bay jun makan tx'otx' tx'otx' tu'.

²⁰A Judá yetok Israel c'amxa chi bischaj conoblak ay yul is makbej, lajanxac'al axca arena ay bay tilak a' mar. Xiwilxa loj c'al uq'ueja', caw wal chi yajawbi tzalojc'ulal.

²¹A cham Salomón tu', rey yiban masanil juntzan conoblak tu': Chi tittac'al bay a' Éufrates masantac'al chi jayoc bay is conobal eb filisteo c'al bay mojonal yet Egipto. A masanil juntzan tu' max yak'c'al eb tojlabal bay cham Salomón yet iquis ec' cham.

²²A masanil is gasto cham Salomón, yin junjun c'u, ay 70 quintal harina caw wal coc' yayji. Ay c'apax junxa 140 quintal harina bioj yayji,

²³lajonc'on no toro caw wal bak'ech, junc'al no toro bekan yul potrero, c'al 100 no calnel, tx'ok pax yel no tx'ucchej, no sakchej, no gamusa c'al no tz'iquin tol bak'ech.

²⁴Max yajawbi cham Salomón bay yiban tx'otx' yayubc'ual a' Éufrates, chi tittac'al bay Tifsa masantac'al bay Gaza. Yajaw yayji yiban masanil juntzan reyal junjun conoblak tu', cax ayc'al junc'ulal yetok juntzan nación ay yinlak.

²⁵A yet iquis ec' cham Salomón, masanil yul yet Judá c'al Israel chi tittac'al bay Dan masantac'al bay conob Beerseba, yinxac'al junc'ulalil ay eb masanil, junjunxac'al ay is yawoj c'al te satnom te' awbil yuj, yinlak yatut.

²⁶A Salomón tu', ay c'apax 4,000 is caballeriza bay ayic' no chej chi oc yin carruaje yet owal. Ay c'apax 12,000 chej chi oc eb soldado yiban.

²⁷A masanil eb gobernador mayal binaji, a eb chi iontek is gasto cham rey Salomón yetok masanil mactxel ayic' yetok yin junjun xajaw. Chi cam wal yilon eb tol c'am tzet chi majax ajok.

²⁸A mac ayoc is turno yiontek tu', chi yitek ixim cebada c'al an zacate yet no chej chi tok'wi carruaje, c'al yet juntzanokxa no chej bay yowalil chi jayi.

²⁹C'amxa yalbanil is jelanil cham Salomón max ak'lay yuj Dios.

³⁰A is jelanil cham Salomón tu' yelxac'al ec'ban yintak yet eb aj Egipto c'al yintak yet eb ay bay yichcan.

³¹C'amxa junokxa winak lajan is jelanil yetok. Yelxac'al jelan yintak Etán, is yinatil Ezra, yintak Hemán, yintak Calcol c'al yintak Darda, a ton eb c'ajol Mahol. Max bey wal toj is k'umal bay masanil nacionlak bay yinlak tu'.

³²Max yalcan el cham Salomón 3,000 k'anejal yet jelanilal, max watx'nen c'apax 1,005 bit.

³³Max yaltek k'anej yinlak te te' c'al yinlak awoj. Max chatac'al el yich k'anjab yin te c'ute' bay Líbano masantac'al yinlak an hisopo chi ch'ibaj yichlak pared. Max k'anjab c'apax yinlak no no' axca yin no tz'iquin, yinlak no no' chi ec' bay sat tx'otx' ti', c'al yin no txay ay bay yulak a' aej.

³⁴Bay masanil nacionlak bay max ablay k'umal cham Salomón yetok is jelanil, max chektek eb rey eb chi ul abxalwok bay.