Read Q'anjob'al 1 R 5 Bible Online

1 R 5 - Q'anjob'al bible

1 R 5

¹A yet max yaben Hiram reyal Tiro tol a Salomón max oc yin reyal q'uexelok is mam, ayman max yatok is chekbej k'anjab yetok Salomón yujtol yamigo ba Hiram tu' yetok camom David.

²Yuj tu' xan max ya c'apaxtok Salomón k'anej bay Hiram:

³Ojtak wali, tol maj uj watx'nencan aj in mam junok templo yet Jehová co Diosal on yujtol miman tiempoal max yak' owal, masantac'al max yaoc Jehová eb ajc'ul oc yin tu' yul is k'ab.

⁴A tinani' xin, mayal yak' Jehová junc'ulalil ayon israel on ti', c'amxa jajc'ul, tamwal junokxa uchlejbail ay co xol.

⁵Yuj tu xin, xan mayal in na' tol ok in watx'nej aj junok is templo Jehová co Diosal on, axca max yun yalon Cham bay in mam tu', tzetbil tol a junok is c'ajol chi occantok bay yul is trono is q'uexelok, a' chi watx'nen aj junok templo Jehová.

⁶Yuj tu xin, elok yin a c'ul cha chek c'uplay is teal, a ton te c'ute' bay witzlak Líbano. Ok watok eb in chekbej colwaj yetok eb a chekbej tu', ok in tojlanej c'u eb nak a chekbej tu' atac'ala' jantak cha k'ana', yujtol ojtak wali tol c'am junok on jojtak chi co c'up te' axca ex aj Sidón ex tu', ẍitok Salomón.

⁷A yet max yaben Hiram jun k'anej max yaltok Salomón, caw wal max tzaloji. Max yaloni: Al-layokab watx' k'anej yin Jehová, yujtol max yak' Cham jun is c'ajol David caw wal aj nabal max occan is q'uexelok yikban jun miman conob ti', ẍi.

⁸Yin aymanil max paktzej Hiram is k'anej Salomón: Mayal in cha' a k'anej max altek, ti' chin chek ilay el te c'ute' yetok te k'uk'taj axca max al tu', cax ok waontok te' ayach.

⁹Ok yiaytek eb nak in chekbej te' bay jolom witz Líbano cax ok ayapnok te' bay ti a' mar, axa yoc te' yiban a' tu', caytu' ok yun yapni oc te' bay chi yochej a c'ul. A bay tu' ok e cha' te' axa e yiontok te' tu', axa ach xin, ok atek tzet ok in lo yetok eb anima bay watut ti', ẍitok Hiram.

¹⁰Cayton tu' max yun yak'on Hiram te c'ute' c'al te k'uk'taj max oc yopiso yuj Salomón,

¹¹cax max yak'on Salomón jantak tzet chi oc yuj Hiram: 75,000 quintal ixim trigo c'al 115,000 galón aceite yet olivo yin junjun abil.

¹²Caytu' max yun yak'on Jehová jelanil is nabal Salomón axca max yun yaloni. Cax max watx'nencan Hiram is trato yetok Salomón yin yamigonen ba eb; cayton tu' max yun yoccan junc'ulalil xol eb.

¹³Max yal cham Salomón, tol a eb tx'ok conobal aytocan xol conob Israel, tol yowalil chi toj eb mulnaj yin ioj eltek te' bay Líbano. A is bisil eb tu' 30,000 eb winak yin masanil. 10,000 eb chi cheklaytok yin junjun xajaw, jun xajaw chi bet eb mulnaj bay Líbano; cab xajaw chi cancan eb nak bay yatut. A Adoniram ayoc yajawilok eb nak 30,000 tu'.

¹⁵Ay pax 70,000 eb nak iktzom, cax ay 80,000 eb mak'om poj ch'en bay siquilal tx'otx' yul yet Israel.

¹⁶Cax tx'ok pax yayji 3,300 ayoc yin caporalil yilon mulnajil tu'.

¹⁷Max yalon cham rey Salomón tol chi mak'lay eltek ch'en mimek ch'en tol watx' chi yun yeltek, ok oc yichok templo yet Jehová, yetokc'al ch'en tol chi joslayi ok oc yin is cajonal.

¹⁸Eb is mulnajwom Salomón, yetokc'al eb is mulnajwom Hiram, yetokc'al eb cajan bay Gebal, max c'up eb te te' c'al joson eb ch'en ch'en max oc yin templo Jehová.