Read Q'anjob'al 1 R 7 Bible Online

1 R 7 - Q'anjob'al bible

1 R 7

¹Max watx'nej c'apax aj cham Salomón jun is yatut, 13 abil max yak' yin watx'neni.

²Max watx'nen c'apax aj jun miman salón max yak' yik Salón K'akte' yet Líbano. A jun tu' ay 45 metro is k'atil, ay 22 metro yetok nan yul txiquin, ay c'apax nan is can lajoneb metro ay aj is tel can. Ayoc can txol te oy naba c'ute' yin. A jolomlak te oy tu', a tu' ayajtok te patzab naba c'ute'.

³A juntzan te patzab tu' ay 45 te', ox txol*fn* max yun toj te' yibanlak te oy tu', 15 te' yin junjun txol, axa te c'ute' ayoc yiban te patzab.

⁴Ox txol yayji oc is wentenail bay junjun is paq'uil yetc'ulal c'al ba bay ay.

⁵Can tzalan yayji marcoal te puerta c'al te wentena. Oxox puerta ayoc bay junjun yul txiquin, yetc'ulalc'al ba bay ayocok.

⁶Max watx'ji c'apax jun miman salón tol oyc'al ayoc yin. Ay 22 metro yetok nan is k'atil, yetok nan is can lajoneb metro yul txiquin. A bay is ti' jun tu' ay is tentail, ay c'apax aj is patil.

⁷Max watx'nej c'apax junxa salón is despachook, bay chi oc beyc'ulal, ac'ala' te c'ute' max oc satak pared bay yul tu', max tojtac'al bay yich masantac'al bay patzabil.

⁸A pax yatut cham Salomón bay cajan xin, a tu' ay bay yamak'il yintak juntzan salón tu'. Lajanc'al cawxi axca juntzan salón tu'. Max yak'on watx'jok c'apax aj junxa na yet xal is cutz'in cham reyal Egipto, a ton xal tu' max yi' yistzilok, lajanc'al cawxi axca juntzanxa tu'.

⁹A masanil juntzan na tu' axcac'al max yun tit cimientoal yich, caytu' chi yun lajwican bay is chon, ac'ala' caytu' bay is satak, cay c'apax tu' bay jun miman amak', ac'al ch'en ch'en tol caw wal yatak cawxi, ac'al ch'en ayoc yin, josbilc'al ch'en atac'ala' yechel, palta a is tz'eyil chi oc yul c'al yin, c'upbil yetok sierra.

¹⁰Ac'ala' c'apax cimientoal, a ch'en ch'en caw wal yatak cawxi ayoc yin, caw wal mimek ch'en ay ocok. Ay ch'en yin nan is so' metro is tel, ay pax ch'en yin oxeb metro yetok 60 centímetro.

¹¹A bay yiban cimientoal tu' ayoc ch'en ch'en watx'nebil, tol josbil ch'en axca wal is yechel, ay c'apax oc te c'ute' yetok.

¹²A bay yinlak jun miman amak' tu', ayoc ox txol ch'en ch'en tu', ay c'apax oc jun txol te patzab naba c'ute', cac'al tu' max yun yajc'al can, cay c'apax tu' cawxi jun amak' bay cawilal yinlak templo, yetokc'al jun cuarto bay ti' templo bay chon octok.

¹³Ay jun winak aj Tiro chi yik Hiram, max awtelaytek yuj cham rey Salomón.

¹⁴A jun tu' yune' jun xal ix camnak yichamil titnak yin is tribual Neftalí. Axa is mam Hiram tu' aj Tiro cham, caw wal jelan mulnaj yin watx'nej bronce. Cay c'apax tu' Hiram, caw wal aj nabal, caw wal yojtak chi watx'nej tzanc'al tzet mulnajilal yetok ch'en bronce. Max jayoc satak cham rey Salomón yuj yoc yin jun mulnajil tu'.

¹⁵Max watx'nej ay cab mimek telan bronce, waxakeb metro wal is tel junjun juntzan ch'en tu', nan is wak metro wal yin ch'en.

¹⁶Max watx'nej c'apax cab makilej naba bronce, yet max oc bay chon juntzan mimek oy bronce maxax watx'ji tu'. A is tel juntzan makilej tu' max aji, cab metro yetok 25 centímetro.

¹⁷A yinlak cab makilej tu' ayoc cadena bronce watx'nebil axca yili txim. Ukeb ayoc yin junjun makilej tu'.

¹⁸Max watx'nej c'apax ca txol axca yechel granada max oc yin juntzan cadena tu', yet chi oc yinlak junjun makil chon oy tu', lajanc'al max yun yet cabil.

¹⁹A juntzan ayoc jolom oy tu' axca mi wal cabok metro ay ajok, lajan yili axca an lirio.

²⁰A bay jolom oy ayoc jun c'olan yayji axa yiban jun tu', a tu' ayoc jun makil oy tu'. A bay chi ayol cadena yinlak jun c'olan yayji tu', a tu' ayoc 200 yechel granada, ca txol yayji ocok.

²¹Max yaoc Hiram cab oy tu' bay satak templo. A yet max watx'nen oc bay is lugar, a jun oy max oc bay yetc'ulal co watx' yet chon eltek yul templo, max yak' yik Jaquín,*fn* axa junxa oy max yaoc bay yetc'ulal co q'uexan, max yak' yik Boaz.

²²A bay is chon juntzan oy tu' lajan yili axca xumaquil an chochol. Caytu' max yun watx'jican el juntzan oy tu'.

²³Max lajwi tu' max watx'nej Hiram jun miman pila naba bronce. A bay jun tu' chi wajay a' aej, toc'al suyan yayji max yunej, nan is so metro max yun yechel max tittac'al bay jun pac' is ti' masantac'al bay jun pac'xa. A pax tel max aj can xin, cab metro yetok 25 centímetro, axa pax yel suyan xin, ay nan is canlajoneb metro.

²⁴A yalan ti' jun pila tu', ayoc ca txol yechel satlak te' axca yili tzima, lajoneb max oc yin junjun 45 centímetro, junej max yun watx'ji yetok jun pila tu'.

²⁵A jun ti' ayoc yiban 12 yechel toro naba bronce. A juntzan tu' ay oxeb t'anantok bay yetc'ulal sur, axa oxebxa t'anantok bay yetc'ulal norte, axa oxebxa t'anantok bay yetc'ulal yichcan, axa pax oxebxa xin, t'anantok bay yetc'ulal yayubc'u. A yakan juntzan tu' bay yintak ayoctok bay yalan jun pila tu', batxan oc yiban yichin juntzan tu'.

²⁶Ay waxakeb centímetro is pimal jun pila tu'. Miman yel etxan is ti' axca yili xumaquil an chochol. A yul jun pila tu' chi aytok 44,000 litro a' aej.

²⁷Max watx'nej c'apax lajoneb carreta naba bronce, junjunc'al juntzan tu' jun metro yetok 80 centímetro is tel, cay c'apax tu' max yun yechel sat, axa pax tel max aj xin, jun metro yetok 35 centímetro.

²⁸A juntzan carreta tu' caywal ti' watx'ji axca ti': Ayoc is marcoal, makan c'apax el yulak is marcoal tu'.

²⁹A bay sat juntzan ayoc makil nanlak yul marco tu', a tu' ayoc yechel coj, yechel toro, c'al yechel querubín. A bay yiban, c'al bay yalan juntzan yechelej tu', ayoc yelbub yin is marcoal tu'.

³⁰Junjunc'al carreta tu' ay caneb rueda bronce ayoc yin, k'atan oc junjun ch'en bronce yul nan cabcab rueda tu'. A bay canebal is txiquin juntzan carreta tu' ay mitx'banil naba bronce chi mitx'on waay junok yaliẍ pila. A yin juntzan mitx'banil tu' ayoc yelbub.

³¹Axa yul jun carreta tu' ayoctok jun axca mimek tubo, ay 45 centímetro can ay aj yiban ti' carreta tu', 23 centímetro ayaytok yul carreta tu'. Ay c'apaxok yelbub yinlak jun miman tubo tu', axa makil is nanlak yul is marcoal ayocok man suyanok yayji, palta tol cuadrado yayji.

³²A caneb rueda ayoc yalan juntzan marco yetokc'al makil nanlak yul tu'. Ay pax juntzan ch'en chi ec'tok yul juntzan rueda tu', junejc'al yayji yetok marcoal, axa juntzan rueda tu' 68 centímetro ay aj can.

³³Lajan cawxi juntzan rueda tu' axca yet carruaje yet owal. A junjun rueda tu' naba bronce, junnejc'al yayji.

³⁴A caneb mitx'banil bay txiquinlak tu', junnejc'al yayji yetok marcoal junjun carreta tu'.

³⁵A bay yiban juntzan batxlub yich tu', ay jun bijan tol suyan yayji, ay 22 centímetro yetok nan ay aj is pimal, junnejc'al yayji masanil.

³⁶A yin marco c'al yin makil juntzan nanlak yul marco tu', max yaoc Hiram yechel querubín, yechel coj, yechel palma, c'amxa jabok bay maj oc juntzan yechelej tu'. Ay c'apax oc yelbub bay yinlak junjun.

³⁷Cayc'al tu' max yun watx'ji lajoneb batxlub yich tu', lajanc'al max yun watx'ji, lajanc'al yechel masanil.

³⁸Max watx'nen c'apax lajoneb pila naba bronce. Lajanc'al yechel masanil, junjunc'al ay jun metro yetok 80 centímetro yul, junjunc'al juntzan tu' k'okbil chi aytok 200 galón aej yul, junjunc'al max oc yiban junjun carreta.

³⁹Oyeb juntzan carreta tu' max cancan bay yetc'ulal co watx' bay templo, axa oyebxa bay yetc'ulal co q'uexan. A jun miman pila tu', a tu' max cancan bay co watx' yet chon eltek yul templo, bay yetc'ulal yichcan.

⁴⁰Lajwi tu' max watx'nen c'apax Hiram xij, palas c'al mimek sec'. Caytu' max yun lajwi watx'ji masanil juntzan max chek cham rey Salomón watx'nelay yin templo Jehová.

⁴¹A ton juntzan max watx'nej ti': cab mimek oy, yetok cab makil chon, yetok juntzanxa cadena bronce watx'nebil axca txim ayoc yinlak makil chon oy tu';

⁴²yetok c'apax 400 yechel granada ayoc yin juntzan cadena tu', ca txol yayji oc yinlak cab makil jolom oy tu'.

⁴³Lajoneb carreta iknej lajoneb pila;

⁴⁴jun miman pila yet aej tu' yetok lajcaweb yechel toro ayoc bay yalan pila tu',

⁴⁵yetokc'al juntzan xij, yetokc'al juntzan pala, c'al yetok juntzan mimek sec'. A masanil juntzan mitx'k'abej ti' max watx'nej Hiram yuj cham rey Salomón yet is templo Jehová. A juntzan tu' bronce tol jopopi yili.

⁴⁶Max chek cham rey watx'nelay yin moldeal bay yac'alil bay ti a' Jordán bay tx'otx' ixcab tx'otx', nan xol Sucot yetok Saretán.

⁴⁷Caw wal xiwil mitx'k'abej tol naba bronce, xan majxa beyc'ulnej cham rey Salomón jantak yalil.

⁴⁸Max chekon c'apax cham rey Salomón watx'nelay masanil juntzanxa mitx'k'abej bay yul templo Jehová: jun altar naba oro, jun meẍa naba oro, bay chi alay ay ixim pan satak Jehová,

⁴⁹c'al juntzan batxlub candil naba oro, axca yechel xumac cawxi, a ton ayoc bay satak lugar tol asan Jehová ay yet. Ay oyeb bay yetc'ulal co watx', oyebxa bay yetc'ulal co q'uexan, a juntzan candil c'al tenaza naba oroc'al elok,

⁵⁰juntzan copa, juntzan ch'en ibal el tza k'ak'il mecha yet candil, juntzan mimek sec', juntzan mimek cucharón, c'al juntzan txayib yet incienso. A masanil juntzan tu' naba oroc'al elok. Oro c'apax bisagra ayoc yin puertail jun lugar asan Dios ay yet, a ton bay yul templo, yetokc'al yet is puertail templo tu'.

⁵¹A yet max lajwi masanil mulnajil, max chek cham rey Salomón watx'nelay bay is templo Jehová, max chek yilay cantok bay c'uanbal yet templo tu' masanil mitx'k'abej naba oro c'al plata max yak'can cham rey David is mam, bay Jehová.