Read Q'anjob'al 2 R 1 Bible Online

2 R 1 - Q'anjob'al bible

2 R 1

¹A yet mayal camtok cham rey Acab, max yiel ba Moab yul is k'ab conob Israel.

²A cham Ocozías max elc'ay bay jun wentenail is yatut, bay yelxac'al can, bay Samaria. Caw wal miman max yun lajwitok cham, xan max chektok is chekbej yet chi toj k'anlej yab eb bay Baal-zebub, is diosal eb aj Ecrón, tatol okto watx'jok.

³Palta a jun ángel yet Jehová max yal bay Elías aj Tisbe: Asi', chi toj a chaon is chekbej cham Ocozías, reyal Samaria, cax cha k'anlen bay eb: ¿Xin ta c'am Dios bay Israel, yuj tu' xan atoc'al bay Baal-zebub, diosal Ecrón chi toj e yak' e k'anlebal? cachi bay eb.

⁴Cax chalon c'apaxok tol ayin Jehová in chi wal bay jun rey tu' tol: Majxac'alta' ach aj wanok, palta tol ok ach camxac'al, ẍi Jehová, cachi, ẍi jun ángel tu'. Lajwi tu' max toj cham Elías, max yikej axca max al-lay bay tu'.

⁵Axac'al bay tu' max meltzojtek eb chekbej tu' satak cham rey, xan max k'anlej cham bay eb: —¿Tzet yuj xan max ex meltzoj ayin yin aymanil? ẍi cham bay eb.

⁶Max tak'wi eb bay cham: —Mamin rey, ay jun winak max eltek co satak bay yul be. A' max alon ayon: Meltzojanek bay cham max ex chekontek tu' cax che yalon bay: Tolab wal axca ti' yalon Jehová: ¿Tom c'am Dios bay a conob ti', xan tol ata bay Baal-zebub diosal Ecrón cha chektok ablayok? Yuj wal jun tzet max a na ti', xan manxa ok ach aj wanok, ok ach camxac'al, ẍi Jehová, ẍi jun winak tu' ayon, ẍi eb.

⁷Max k'anlen cham rey bay eb axca ti': —¿Tzetbil yili jun winak max eltek e satak max alon ayex tu'? ẍi cham.

⁸—A jun winak tu' mamin rey, ayoc jun pichilej tol ay xil yuj, yetok jun tz'um c'alilej ayoc yuj, ẍi eb bay. —A jun tu' a ton Elías aj Tisbe, ẍi cham rey tu'.

⁹Lajwi tu' max chekontok cham rey tu' jun capitán yetok 50 soldado yet chi toj ilayok. A yet max apni oc eb, a Elías chotan ay bay jun tzalan. Cax max yalon jun capitán tu' bay: —Ach chekbej Dios, a cham rey chi aloni tol chach aytek, ẍi bay.

¹⁰Max tak'wi cham Elías bay: —Tatol chekbej Dios in ayin ti', titokab k'ak'ej bay satcan cax chach tz'atok yetok 50 a soldado tu', ẍi. A wal yet jun bek tu' max ayol k'ak'ej cax max tz'aay eb masanil.

¹¹Lajwi tu' max chekontok cham rey junxa capitán yetok junxa 50 soldado. Max toj eb xin, max yalon bay cham Elías: —Ach chekbej Dios, ayantek yin aymanil ẍi cham rey, ẍi jun capitán tu'.

¹²Max tak'wi cham Elías: —Tatol chekbej in Dios, titokab k'ak'ej bay satcan cax chach tz'aay yetok eb 50 a soldado tu', ẍi. Yet wal jun bek tu' max ayol k'ak'ej bay satcan, max tz'aay eb.

¹³Lajwi tu' max chekontok cham rey junxa capitán yetok junxa 50 eb soldado yet yoxelal. Palta a jun capitán tu' max ajtok bay ayic' cham Elías, max ay jajan satak, cax max tewi oc yin: —Mamin chekbej Dios, elokab yin a c'ul chak' mimanc'ulal win yetok eb nak 50 soldado a chekbej ti'.

¹⁴Yujtol a juntzan eb capitán yetokc'al is soldado, eb max babji jay ayach, max tz'aay eb yuj k'ak'ej max tit satcan. A pax ayin xin, chin tewi ayach tol chak' mimanc'ulal win, ẍi.

¹⁵Axa jun yángel Jehová max alon bay cham Elías: —Asi' yetok, c'am chach xiwi, ẍi bay. Xan max aytek cham Elías, max toj yetok jun capitán tu', axa toj yil-lay cham rey tu' yuj.

¹⁶Max yaloni: —Axca wal ti' yalon Jehová: Yujtol max a chektok a chekbej bay Baal-zebub diosal Ecrón yet chi toj a k'anlej a nabal, axcaxac'al tol a bay Israel ti' c'am Dios bay chi je' co k'anlen co nabal, xan majxac'al ach aj wan, palta tol ok ach camxac'al, ẍi Cham, ẍi cham Elías.

¹⁷Axca ton tu' max yunej, max camxac'al cham Ocozías axca wal max yun yalon cham Elías yuj Jehová. Yujtol a Ocozías tu' c'amc'al junok is c'ajol, xan a jun yuẍtak, a ton Joram, max oc yin reyal is q'uexelok. A ton yet cab abilxa yoc Joram is c'ajol Josafat reyal bay Judá.

¹⁸A janic'okxa is yabixal Ocozías c'al jantaktoc'al tzet max yunej, a tu' tz'ibbil bay yul tx'an un yet is yabixal eb reyal Israel.