Read Q'anjob'al 2 R 10 Bible Online

2 R 10 - Q'anjob'al bible

2 R 10

¹Ay 70 is c'ajol camom Acab bay Samaria. Caytu' max yun tz'iben Jehú carta bay eb yicham winakil conob, c'al bay eb yilomal eb c'ajol Acab tu'. A yin tx'an max yaltok axca ti':

²A ayex tu' a tu' ayic' eb is c'ajol e yajawil, yetok is chej, c'al is carruaje yet owal, c'al jun conob tol caw wal watx' yayji, c'al jantak is yarma. Yuj tu' a yet ok apnok oc jun carta ti' ayex tu',

³siq'uek el junok is c'ajol e yajawil tu' caw wal watx', tol is moj wali. Che yaon oc yin reyal cax che yak'on owal yuj beyc'altoj yikbej e yajawil tu', ẍitok bay eb.

⁴A yuj jun k'anej tu' caw wal max xiwaj eb, max yalon eb axca ti': Ilab tol a cawan rey majxa je' tec'ban ba eb satak Jehú, akxa ayon ¿tzet wal ok yun co tec'ban co ba satak? ẍi eb.

⁵Axa jun mayordomo yayji bay yatut cham rey, yetokc'al jun gobernador yayji bay conob tu', c'al yetok masanil eb yicham winakil conob, c'al yetok eb max ilon ch'ib eb c'ajol Acab tu', a eb tu' max alontok bay Jehú: Ayon ti' ayon ec' yul a k'ab. A masanil tzet ok ala' ok jikej, palta man ok jaoc junokxa yin reyal. Yunokabc'al bay chi cha a c'ul ach ti', ẍitok eb.

⁶Max tz'iben paxtok Jehú junxa tx'an carta yet is cayelal, max yaloni: Ta che yochej tol chex oc wetok cax ok e yiken tzet chi wala', a yet yecal che yitek jolom eb is c'ajol e yajawil tu', cax chin ul e yilon bay Jezreel ti', ẍitok Jehú. A eb 70 c'ajol is reyal eb tu', junej ay eb yetok eb mimek winak max ilon ch'ib eb bay conob Samaria tu'.

⁷A yet max chaon eb yajawil conob c'al eb icham winak junxa tx'an carta tu', max mitx'on eb eb 70 c'ajolej tu', max mak'on cam eb. Max yaon aytok eb jolom eb tu' yul juntzan motx, max yaontek eb bay Jehú bay Jezreel.

⁸Axa yet max apni oc jun chekbej bay Jehú, max yaloni: —Mayal ilaytek is jolom eb c'ajol cham rey, ẍi nak. Max yalon Jehú: —Cab bulan che yutay bay chon octok bay yul conobal ti'. A bay tu' chi cani masantac'al yet yecal, ẍi bay.

⁹Axa yet junxa c'ual max eltok Jehú, max oc waanok, max yalon bay masanil conob: —Ayex ti' c'am e mul. Ayin max in mak' cam cham co reyal yuj wion el yin yopiso, palta ¿mactxel max mak'on cam masanil juntzan ti'?

¹⁰A tinani' chi cam wal e yojtaknen elok, tol a masanil tzet max yalcan el Jehová yin is yinatil Acab, c'am junok tol man ok yunej. Lanan wal yunen masanil tzet yetal max chek Cham yalcan el Elías is chekbej, ẍi cham Jehú.

¹¹A bay Jezreel tu' max mak'xac'al cam Jehú juntzan is yican Acab, a ton eb winak tol mimek winak yayji ocok, c'al eb yamigo, c'al eb ayoc yin sacerdoteal yuj. C'amxa junok max can yin yiquisal.

¹²Lajwi tu' max toj cham Jehú bay Samaria. A yet ayoc yul be tu' max apni oc bay jun lugar bay chi ayjic'alta' eb ilom calnel.

¹³A bay tu' max chalej ba yetok juntzan eb yican camom Ocozías reyal Judá, max k'anlen Jehú bay eb: —¿Mac ex txel ayex ti'? ẍi bay eb. Max tak'wi eb bay: —Ayon ti' jican co ba yetok Ocozías, tol chon jayoc ul jak'on cawil c'ul eb nak c'ajol cham rey, yetokc'al eb yune' xal reina Jezabel, ẍi eb.

¹⁴Max yalon Jehú bay eb ajun yetok: —Mitx'ek ay eb yin yiquisal, ẍi bay eb. Axa eb ajun yetok tu' max mitx'on ay eb, max mak'on cam eb bay ti a' uc'bala' bay chi ayjic'alta' eb ilom calnel tu'. 42 eb yin masanil, c'amxa junok max can yin yiquisal.

¹⁵Axa yet max el Jehú bay tu' max chalen ba yetok Jonadad, is c'ajol Recab, tol lanan toj yil-lay Jehú yuj. Max yak'on Jehú tu' cawil is c'ul, max yaloni: —¿Watx' mi a nabal win, axca in nabal en? ẍi bay. —Ja', watx' toni, ẍi Jonadab tu' bay. —Tatol axca tu', itek a k'ab ayin, ẍi Jehú tu' bay. Cax max yun yak'on Jonadab tu' is k'ab bay Jehú, axa yilay ajtok yuj Jehú, bay yul carruaje tu'.

¹⁶Max yalon Jehú bay axca ti': —Ton wetok, ok el wali tzetbil chi yun wak'on wip yin tzet max yal Jehová, ẍi bay. Xan max yitok yetok yul is carruaje tu'.

¹⁷A wal yet max octok bay yul conob Samaria, max mak' cam Jehú masanil eb yinatil Acab, a ton eb maxtocan yin yiquisal. Pilan max lajwi yuj masanil, atac'ala' max yun yaloncan el cham Elías yuj Jehová.

¹⁸Max lajwi tu' max wajban oc Jehú masanil conob, max yaloni: —A Acab janic'nej max yun yoc ayilal bay Baal, a pax ayin ti' caw wal miman ok yun woc ayilal bay.

¹⁹Yuj tu' xan awtejek masanil mac chi occ'alta' ayilal bay, c'al yetok masanil eb sacerdote yayji bay Baal tu'. C'amxa junok tol c'am chi jayi, yujtol ok in watx'nej jun miman xajanbal yuj wion aj can Baal. A mactxel tol c'am chi jayi, yowalil ok low yin, ẍi cham. Palta a Jehú toc'al max yal jun ti', yujtol ok yak' lajwok masanil eb chi oc ayilal bay Baal.

²⁰Yuj tu' max chekon al-lay elok tol ay jun miman k'in yuj yilay aj can Baal; axca ton tu' max yunej.

²¹Lajwi tu' max yaontok Jehú chekbej yuj yal-lay el bay masanil yul yet Israel tol yowalil chi apni oc masanil eb chi oc ayilal bay Baal bay is templo. C'amxa junok mactxel maj apnok. Axca tu xin, a templo yet Baal tu' caw wal teq'ueq'uixac'al max yunej.

²²Max yalon Jehú bay eb sacerdote ilom pichilej tol chi ilay eltek pichil eb chi occ'alta' ayilal bay Baal, xan max yikej eb chi taynen an pichilej tu'.

²³Lajwi tu' max octok Jehú yetok Jonadab bay yul templo Baal tu', max yalon Jehú bay eb chi oc ayilal bay Baal tu': —Chi cam e yiloni tol c'am mi mac chi oc ayilal bay Jehová ayic' e xol ti', palta tol asan mac chi oc ayilal bay Baal, ẍi bay eb.

²⁴Xan max octok eb ayilwom bay Baal tu' bay yul templo tu' max yak'on eb xajanbal tol chi tz'a'i, c'al juntzanxa xajanbal. Yak'ban tu' max yaon oc Jehú 80 eb soldado bay yina, max yalon bay eb tol c'am junok mactxel chi cha' eq'uel eb: —Tatol ay junok mactxel chi bekon eq'uel junok eb tu', axa chi camcan is q'uexelok, ẍi cham.

²⁵A yet max lajwi yak'on tz'a Jehú jun xajanbal tu', max yalon cham tol chi octok eb chi ilon bay tu' yuj, c'al yetok eb capitán cax chi mak'lay cam masanil eb ayilwom tu' yuj eb, c'amxa junok chi elcanok. Xan masanil eb max mak'lay cam yuj eb is soldado Jehú tu' yetok espada, max ilay c'apax eltek eb camnak tu' yina yuj eb. Axa yoctok eb bay is lugar Baal yul templo tu'.

²⁶Max yion eltek eb jun k'oj ya' yili yuj eb bay tu', max yak'on tz'a eb.

²⁷Max mak'on poj eb altar c'al is lugar Baal tu'. Masanil max uchlay lajwok, yinxac'al txuljubal max yuncantok, masantac'al tinani'.

²⁸Caytu' max yun c'ayon el Jehú ayilal bay Baal xol conob Israel.

²⁹Palta maj yak' c'ayil jun ayilal max tz'uncan Jeroboam is c'ajol Nabat, cham max ikban eb israel yin yobtakil, a ton ayilal chi oc bay juntzan yechel wacax tol oro bay Betel c'al bay Dan.

³⁰Max yalon Jehová bay Jehú: Yujtol watx', c'al tojol tzet max on in satak, yuj max ekej ak'on c'ayil is yinatil Acab axca wal max yun waloni, a enatil ok occ'al yin reyal masantac'al yin yet is can makan, ẍi Jehová.

³¹Caxc'al mi axca tu', palta maj wal yaxac'al oc Jehú tu' yin c'ul yiken is ley Jehová Diosal Israel, yujtol majc'al pojil ba yin yobtakil max yun Jeroboam yin yikban conob Israel yin yobtakil.

³²A yet jun tiempoal tu' max c'olic'al yion ec' Jehová is tx'otx' eb israel. A Hazael reyal Siria max yiec' tx'otx' bay yichcanil a' Jordán max tittac'al bay mojonal is tx'otx'al masantac'al max apni oc bay conob Aroer bay tilak a' aej chi yik Arnón.

³³A yin tx'otx' max yiec' tu' ayoc tx'otx' Galaad c'al Basán. A ton bay tu' max ayji ec' eb yet tribual Gad, Rubén c'al nan yet Manasés yet yalantok.

³⁴A janic'okxa is yabixal Jehú, c'al yetok tzet max yunej, a tu' tz'ibbilcan ay bay yul tx'an un yet is yabixal eb reyal Israel.

³⁵Max cam cham Jehú, max muklay bay Samaria, axa Joacaz is c'ajol max occan yin reyal is q'uexelok.

³⁶28 abil max yak' Jehú reyal yiban Israel bay conob Samaria.