Read Q'anjob'al 2 R 12 Bible Online

2 R 12 - Q'anjob'al bible

2 R 12

¹A yet ukebxa abil yoc Jehú yin reyal bay Israel max oc Joás yin reyal bay Judá. Cawinak abil max yak' reyal bay Jerusalén. A is txutx chi yik Sibia, aj conob Beerseba.

²A masanil tzet max yun Joás caw wal watx' satak Jehová, yak'ban max ak'lay nabal yuj cham sacerdote Joiada.

³Palta xin, majc'al ilay el juntzan lugar yet ayilal bay can ay ajok, maxto yak'c'al eb anima xajanbal c'al yak'on tz'a eb incienso bay tu'.

⁴A yet jun c'ual max yal cham rey Joás bay eb sacerdote: —Wajek ch'en tumin c'al ch'en ofrenda chi ilaytek bay templo Jehová, axca ch'en tol yowalil chi yak' junjun anima, c'al jantak ch'en ofrenda toc'al chi el yin c'ul eb yak'oni. Junjun exc'al ok e yak' ch'en tumin ok e cha' yuj ca watx'nelay templo, ẍi cham rey Joás bay eb.

⁶Palta a yet max apni 23 abil yoc Joás yin reyal, c'amtoc'al janic'ok chi ca watx'nej eb sacerdote bay templo,

⁷xan max awtelay cham sacerdote Joiada yetokc'al juntzanxa eb sacerdote yuj cham rey Joás, max yalon bay eb: —¿Tzet yuj xan c'amtoc'al chi ca watx'nelay templo janic'ok? Axa tinani' yet ok beytok ti', c'amxa chi can ch'en tumin che cha' bay eb anima e yetok. A jantak ch'en che cha' yowalil che yak' ch'en yuj is ca watx'nebilal templo, ẍi cham.

⁸Max cha c'ul eb sacerdote tu' yet c'amxa chi cha' eb janic'okxa tumin bay eb anima, cax c'amxa c'apax yalon yet eb yin ca watx'nebilal templo Jehová.

⁹Xan max yitek cham sacerdote Joiada jun caẍa, max yolon cham yiban is makil, max yaon octok yetc'ulal co watx' bay altar, yet chon octok yul templo tu'. A bay tu' max ya c'apax aytok eb sacerdote masanil ch'en tumin chi cha' bay eb anima chi apni oc bay templo.

¹⁰A yet max yilon eb tol mimanxa tumin ay yul te caẍa tu', a yet tu' max apni jun yajtz'ib cham rey yetok cham sat sacerdote, cax max bison eb ch'en tumin ayxa bay yul templo Jehová. Lajwi tu' max yaon aytok eb bay yul juntzan tx'uy.

¹¹A yet mayal bischaj yuj eb tu' max yak'on eb ch'en bay juntzan eb tol ayoc yilomalok mulnajil bay templo, yet chi tojlanelay eb josom te', eb meẍtol yin mulnajil tu',

¹²eb albañil, c'al eb josom ch'en. Cax max manlay c'apax te te' c'al ch'en mak'bil pojok yet chi oc yin ca watx'nebilal templo. Max occ'al ch'en tumin tu' yin juntzanokxa gasto chi oc yin jun mulnajil tu'.

¹³A juntzan tumin max ilaytok bay templo tu' maj k'anlay yin watx'nelay vaso, plato, ch'en ibal el tanil mecha, mimek sec' c'al trompeta, tamwal yin juntzanokxa mitx'k'abej tol oro c'al plata.

¹⁴Palta tol a masanil juntzan tu' max ak'lay bay jun mactxel ayoc yiban yilon jun mulnajil yet is ca watx'jubal templo Jehová tu'.

¹⁵Majc'al k'anlay cuenta bay mactxel mitx'nej tumin tu', tamwal yilay cuenta yin tzetbil max yun tojlanelay eb mulnajwom, yujtol caw wal watx' is nabal juntzan eb mitx'on tumin tu'.

¹⁶Axa pax ch'en tumin max apni oc yuj tojlanelay mulej c'al yuj yak'lay tan mulej, maj ilaytok ch'en bay templo, palta a ch'en tu' yet eb sacerdote ch'en.

¹⁷A yet jun tiempoal tu' a Hazael reyal Siria, max toj yak'on owal yin Gat, max ayc'ay jun tu' yuj, lajwi tu' max toj pax yin Jerusalén.

¹⁸A pax cham Joás reyal Judá xin, max wajbaj aj masanil tzet yetal tol max yak' eb yichmam cham bay templo Jehová, a ton cham rey Josafat, cham rey Joram, c'al cham rey Ocozías. Max wajon c'apax aj juntzan tol a' max ak'on bay templo tu' yetokc'al masanil oro ayxa ec' bay tu' c'al masanil ay bay yatut. A masanil juntzan tu' max yatok bay Hazael yet watx' c'amxa chi jayoc yak'on owal yin Jerusalén.

¹⁹A janic'okxa yabixal cham Joás c'al masanil tzet max yunej, a tu' tz'ibbilcan bay yul tx'an un yet yabixal eb reyal Judá.

²⁰Ac'al oc eb is chekbej max wajnanen eb tzet chi yun eb yin cham. Max mak'on cam eb bay jun na bay mukbil el jun jobe bay ti' be chi aytek bay Sila.

²¹A eb max mak'on cam tu', a ton Josacar is c'ajol Simeat, c'al Jozabad is c'ajol Somer. A yet max cam tu' max mukay bay conobal David. Max lajwi tu', axa is c'ajol chi yik Amasías max occan yin reyal is q'uexelok.