Read Q'anjob'al 2 R 15 Bible Online

2 R 15 - Q'anjob'al bible

2 R 15

¹A yet 27 abil yoc Jeroboam yin reyal bay Israel, a yet tu' max chaon el yich Azarías c'ajol Amasías yak'on reyal bay Judá.

²16 abil is k'inal yet max oc yin reyal tu'; 52 abil max yak' reyal bay Jerusalén. A is txutx chi yik Jecolías, aj Jerusalén xal.

³A tzet max yun Azarías tu' watx'c'al satak Jehová, axcac'al max yun Amasías is mam.

⁴Palta xin, majc'al yiel juntzan lugar yet ayilal bay can ay ajok, maxto yak'c'al eb anima xajanbal c'al yak'on tz'a eb incienso bay tu'.

⁵Max yaoc Jehová jun ilya' chi yik lepra yin cham rey tu' masantac'al max yal cami. Yuj tu xin, majxa ayjok ec' cham rey bay is despacho, tx'ok bay max ayji, axa Jotam is c'ajol, a' ayoc yilomalok yatut cham rey c'al yak'on yajawilal yiban jun nación tu'.

⁶A janic'okxa is yabixal Azarías c'al masanil tzet max yunej, a tu' tz'ibbilcan ay bay yul tx'an un yet is yabixal eb reyal Judá.

⁷A yet max cam Azarías, a tu' max mukay bay conobal David bay mukan eb is yichmam, xan max ocxac'al Jotam is c'ajol yin reyal.

⁸A yet 38 abilxa yoc Azarías yin reyal bay Judá, axa Zacarías c'ajol Jeroboam, max chaon el yich yak'on reyal bay Israel, wakeb xajaw max yak' reyal bay Samaria.

⁹Caw wal yob tzet max yun satak Jehová, axca wal max yun eb is yichmam; majc'al bekcan is yobtakil Jeroboam is c'ajol Nabat, cham max ikbantok eb yet israelal yin yobtakil.

¹⁰Axa Salum is c'ajol Jabes max oc ajc'ulal yin Zacarías tu'. Max oc yak'on owal yin bay Ibleam. A bay tu' max mak' cam satak conob, axa max occan yin reyal is q'uexelok.

¹¹A janic'okxa is yabixal Zacarías, a tu' tz'ibbilcan ay bay yul tx'an un yet is yabixal eb reyal Israel.

¹²Caytu' max yuncan el tzet max yal Jehová bay cham rey Jehú, yet max yaloni tol a eb yinatil ok occ'al eb yin reyal bay Israel masantac'al yet is can makan yinatil.

¹³A Salum tu' c'ajol Jabes, max chail yich yak'on reyal yet wal 39 abilxa yoc Azarías yin reyal bay Judá, palta a jun tu', jun ch'an xajaw max yak' reyal bay Samaria.

¹⁴Axa Manahem is c'ajol Gadi, max tit bay Tirsa, max apni bay Samaria ak'on owal yin Salum. A yet mayal cam yuj, axa max occan yin reyal is q'uexelok.

¹⁵A jantakto is yabixal Salum yetokc'al tzet max yun meltzoj oc yin Zacarías, a tu' tz'ibbilcan bay yul tx'an un yet is yabixal eb reyal Israel.

¹⁶A yet jun tiempoal tu' max el Manahem yetok eb is soldado bay Tirsa, cax max oc yak'on owal yin conob Tifsa. Max mak'on cam eb masanil anima ay bay tu', yetokc'al masanil anima ay yul is makbej. Max c'uplaytok eb ix yobix yuj, max yiontok masanil tzet yetal ay bay tu'. Max yun axca tu' yujtol maj yal c'ul eb aj lugar tu' max cha' bay is conob.

¹⁷A yet 39 abilxa yoc Azarías yin reyal bay Judá, axa Manahem is c'ajol Gadi, max chael yich yak'on reyal bay Israel. Lajoneb abil max yak' reyal bay Samaria.

¹⁸Palta caw wal yob tzet max yun satak Jehová, yujtol maj bekcan beybalnen axca yobtakil max beybalnej Jeroboam c'ajol Nabat, cham max ikbantok eb yet israelal yin yobtakil.

¹⁹Axa Pul reyal Asiria max yak' owal yin nación Israel, xan max yak' Manahem 750 quintal ch'en plata bay Pul tu' yuj yoc yetok yet watx' tec'an yayji yin is yikbej.

²⁰Max yaoc Manahem jun tojlabal yiban masanil eb beyom bay Israel yin tol chi yak' eb 50 siclo ch'en plata junjun, yet watx' chi je' tojlanen jun tojlabal tu' bay reyal Asiria. Caytu' max yun meltzojtok jun reyal Asiria tu' bay is tx'otx'al, majxa mayjok bay yul nación Israel.

²¹A janic'okxa is yabixal Manahem yetokc'al jantakto tzet max yunej, a tu' tz'ibbilcan yul tx'an un yet is yabixal eb reyal Israel.

²²Lajwi tu' max cami, axa Pekaía is c'ajol max occan yin reyal is q'uexelok.

²³A yet 50 abilxa yoc Azarías yin reyal bay Judá, a yet tu' max chaon el yich Pekaía c'ajol Manahem yak'on reyal bay Israel. Cab abil max yak' reyal bay Samaria.

²⁴Caw wal yob tzet max yun satak Jehová, yujtol ac'ala' max beybalnej yobtakil axca tzet max beybalnej Jeroboam c'ajol Nabat, cham max ikbantok eb yet israelal yin yobtakil.

²⁵Palta a Peka is c'ajol Remalías capitán yayji, a' max meltzoj oc yin, max yaon oc ba 50 eb winak aj Galaad yetok. Caytu' max yun mak'on cam eb Pekaía yetok Argob c'al Arié bay cuartel bay despacho bay Samaria. A yet max lajwi tu', ac'al oc jun Peka tu' max occan yin reyal is q'uexelok Pekaía tu'.

²⁶A janic'okxa is yabixal Pekaía yuj tzetak max yunej, a tu' tz'ibbilcan ay yul tx'an un yet yabixal eb reyal Israel.

²⁷A yet 52 abilxa yoc Azarías yin reyal bay Judá, a yet tu' max chaon el yich Peka c'ajol Remalías yak'on reyal bay Israel. 20 abil max yak' reyal bay Samaria.

²⁸Palta caw wal yob is beybal satak Jehová, ac'ala' max beybalnej yobtakil axca max beybalnej Jeroboam is c'ajol Nabat, cham max ikbantok eb yet israelal yin yobtakil.

²⁹A yul tiempoal yet ayoc Peka yin reyal bay Israel, a yet tu' max apni oc Tiglat-pileser reyal Asiria, cax max ayc'ay juntzan conob ti': Ijón, Abel-bet-maaca, Janoa, Cedes, Hasor, Galaad, Galilea c'al yetok masanil is makbej Neftalí. A masanil eb cajyom bay tu' max yitok preso bay Asiria.

³⁰Lajwi tu xin, axa pax Oseas is c'ajol Ela max meltzoj oc yin Peka c'ajol Remalías, max mak'on camok. Axca tu' max yun yoccan yin reyal is q'uexelok, a ton yet 20 abilxa yoc Jotam is c'ajol Azarías yin reyal bay Judá.

³¹A janic'okxa is yabixal Peka c'al jantakto tzet max yunej, a tu' tz'ibbilcan ay bay yul tx'an un yet yabixal eb reyal Israel.

³²A yet cabxa abil yoc Peka c'ajol Remalías yin reyal, a yet tu' max chaon el yich Jotam c'ajol Azarías yak'on reyal bay Judá.

³³Ay 25 abil is k'inal yet max oc yin reyal tu', 16 abil max yak' reyal bay Jerusalén, a is txutx chi yik Jerusa, is cutz'in cham Sadoc.

³⁴A masanil tzet yetal max yun Jotam caw wal watx' satak Jehová, axca wal is beybal Azarías is mam.

³⁵Max watx'nej oc is puertail templo Jehová bay yiban, palta maj yiel juntzan lugar yet ayilal bay can ayajok, maxto yak'c'al eb anima xajanbal c'al yak'on tz'a eb incienso bay tu'.

³⁶A jantakto is yabixal Jotam c'al jantak tzet max yunej, a tu' tz'ibbilcan ay bay yul tx'an un yet is yabixal eb reyal Judá.

³⁷A yet jun tiempoal tu' max c'oli chekontek Jehová, Rezín reyal Siria yin Judá yetokc'al yin Peka c'ajol Remalías.

³⁸A yet max cam Jotam, a tu' max muk eb bay conobal David is yichmam. Lajwi tu' max occan Acaz is c'ajol yin reyal is q'uexelok.