Read Q'anjob'al 2 R 16 Bible Online

2 R 16 - Q'anjob'al bible

2 R 16

¹A yet 17 abilxa yoc Peka c'ajol Remalías yin reyal bay Israel, a yet tu' max chaon el yich Acaz c'ajol Jotam yak'on reyal bay Judá.

²20 abil is k'inal yet max oc yin reyal tu'. 16 abil max yak' reyal bay Jerusalén, palta caw wal man watx'ok tzet max yun satak Jehová, man axcaok yet David is yichmam.

³Palta ac'al is beybal juntzan eb reyal Israel max beybalnej, toltax max yak' tz'a is c'ajol yin xajanbalil. Lajan wal max yut ba axca wal is beybal juntzanxa nación max ilay el yuj Jehová satak eb israel.

⁴Yetok c'apaxok max yak' xajanbal c'al yak'on tz'a incienso bay juntzan lugar yet ayilal bay can ayajok, bay jolomlak witz c'al bay yichlak te te' tol pim xak.

⁵A yet jun tiempoal tu', a Rezín reyal Siria c'al Peka c'ajol Remalías reyal Israel, max toj eb yin Jerusalén yin yak'on eb owal yin cham rey Acaz. Max oc oyan eb yinlak Jerusalén tu', palta maj ayc'ay yuj eb.

⁶Ac'ala' yet jun tiempoal tu', a cham reyal Siria*fn* max ak'on ayc'ay conob Elat yuj yoccan yetok Siria, max yion el eb aj Judá cajan bay tu'. Caytu' max yun yapnican oc cajan eb aj Edom bay tu'. Ay toc'al ec' eb tinani'.

⁷A yet tu' max chekontok Acaz jaywan is chekbej bay Tiglat-pileser, a ton reyal Asiria, yet chi al-lay bay yuj axca ti': Chi waoc in ba yul a k'ab. Yuj tu' xan titan yet chin ul a col bay yul k'ab reyal Siria c'al bay reyal Israel. Yujtol chi yak' eb tu' owal win, ẍitok bay.

⁸Yuj tu' xan max yieltek Acaz ch'en plata c'al ch'en oro ay bay templo Jehová c'al yetok ch'en ay bay despacho, max yaontok yin sabalejal bay reyal Asiria.

⁹Max yikej reyal Asiria tu' bay tzet max yal xin. Caytu' max yun jayoc yak'on owal bay Damasco, max ayc'ay yuj, max yitok eb cajyom bay tu' bay Kir, max cam c'apax cham rey Rezín yuj.

¹⁰Lajwi tu' max toj rey Acaz bay Damasco chaon cham Tiglat-pileser tu'. A bay tu' max yil jun altar, max yaontok jun is planoal axca wal yayji bay cham sacerdote Urías bay Jerusalén.

¹¹Caytu' max yun watx'nen aj cham sacerdote Urías jun altar axca wal yayji oc is planoal max yatek cham rey Acaz tac'al bay Damasco. Watx'xa yayji yet max meltzojtek cham rey bay Damasco tu'.

¹²A yet max jayoc cham rey bay Jerusalén max yilon jun altar tu', max jitzon oc ba c'atan axa yak'on tz'a xajanbal.

¹³Max yak'on c'apax tz'a ixim trigo yin ofrendail, max secon ay vino yiban altar tu' yin ofrendail, max txijon c'apax ay chiq'uil no xajanbal yet junc'ulalil yiban altar tu'.

¹⁴A pax jun altar bronce ay bay satak templo Jehová xin, max yiel cham rey Acaz bay nan xol jun ac' altar yetok templo Jehová, max yaon ay bay yetc'ulal norteal jun ac' altar tu'.

¹⁵Max lajwi tu' max yalon Acaz bay cham sacerdote Urías tol asan bay yiban jun miman ac' altar tu' chi tz'a xajanbal yet k'inibalil yetokc'al ixim trigo chi ak'lay yet yayc'ualil, yetok c'apax xajanbal chi tz'a'i, c'al ixim trigo yofrenda cham rey, yetokc'al xajanbal chi tz'a'i c'al ixim trigo c'al vino chi yak' masanil eb conob. Max yalon c'apaxok tol chi txijlay ay chiq'uil no xajanbal chi tz'a'i c'al juntzanxa xajanbal yiban jun altar tu'. A pax jun altar naba bronce xin, yet-xac'al cham rey chi yuncanok yet ay tzet chi k'anlej cham bay Jehová.

¹⁶Max yikej cham sacerdote Urías masanil axca wal max yun yalon cham rey Acaz.

¹⁷Max chek cham rey Acaz tu', yilay el makil nanlak yul marcoal juntzan carreta naba bronce bay templo, max ilay el palangana ayoc yiban. Max yion c'apax el ch'en yechel toro naba bronce ayoc yalan miman pila, axa yiban ch'en ch'en bay sat tx'otx' max yayok.

¹⁸A yuj watx' chi can satak reyal Asiria, xan max yiel bay templo Jehová jun lugar yet eb rey watx'nebil aj yuj yet c'ual xewilal, c'al puertail bay yina tol yet cham rey yayji ocok.

¹⁹A jantakto is yabixal rey Acaz c'al jantak tzetak max yunej, a tu' tz'ibbilcan ay bay yul tx'an un yet is yabixal eb reyal Judá.

²⁰A yet max cami, a tu' max mukay yetok eb yichmam bay conobal David. Lajwi tu' axa Ezequías is c'ajol max occan yin reyal is q'uexelok.