Read Q'anjob'al 2 R 19 Bible Online

2 R 19 - Q'anjob'al bible

2 R 19

¹A yet max yaben cham rey Ezequías tzet max al-lay tu', max tzilontok is pichil. Max yaon oc el pichilej yin yuj is bilc'ulal, axa toj txajloj bay yul templo Jehová.

²Cax max chekontok Eliaquim yilomal yatut cham rey yetok Sebna, tz'ibem abix, c'al yetok eb yajawil eb sacerdote. Ayoc el pichilej yuj eb yuj bilc'ulal, max toj eb yilon cham Isaías c'ajol Amoz, is chekbej Dios.

³Max bet yalon eb tzet chi yal cham rey: A tinani' ayon oc yin yailal, yin cusc'ulal c'al yin q'uixwilal. Axca junok ix ix lanan watx'ji c'ul yuj unin cax chi cancan yin tol c'amxa yip, caywal tu' jayji tinani'.

⁴Matawal max yab Jehová co Diosal tzet max yal jun chekbej cham reyal Asiria yet max buchwaj yin Cham co Diosal tol iquis, cax chi alay oc yailal yiban yuj Cham, yuj tzet max yal tu'. Txajlan wal juj mac on chonto cani, ẍitek Ezequías, ẍi eb.

⁵A yet max yaben cham Isaías tzet max yal is chekbej cham rey Ezequías,

⁶max chekon cham yal bay eb is yajawil axca ti': Axca wal ti' yalon Jehová: Manchak ex xiw bay tzet max yal jun chekbej reyal Asiria tu', caw wal yob tzet max yal win, tol c'am chi je' in colwaj yaloni.

⁷Ayin chi wala' tol ok waoc junok xiwc'ulal yin, xan a yet ok yaben junok abix, ok meltzoj bay is conob, cax ok wak' yunej tol ok tzoc'lay cam bay tu', ẍi Jehová, ẍitok cham Isaías.

⁸Max yaben is chekbej cham reyal Asiria tol c'amxa ec' cham bay conob Laquis. Yuj tu' xan max meltzoji, max chalen ba yetok cham rey tu' bay conob Libna, lanan yak'on cham owal yin.

⁹A bay tu' max yab cham reyal Asiria tol a rey Tirhaca chi tit yetok is soldado bay Etiopía ul yak'on owal yetok. Yuj tu xin, max yatok cham reyal Asiria is chekbej yilon cham rey Ezequías junelxa.

¹⁰Max yalontok axca ti': A a Diosal chi alon ayach tol man ok ayc'ay Jerusalén yul in k'ab, palta manchak aoc yin a c'ul tzet chi yal a Diosal tu'.

¹¹Tol wal chi cam aben tzet max yun jetnentok ayon reyal Asiria on ti', juntzanxa conob, cax okto wal ach colchaj ach ti' aloni.

¹²¿Tokwal max colchaj eb anima yuj is diosal yul is k'ab eb wichmam xin, eb aj Gozán, c'al eb aj Harán, Resef c'al anima ay bay Bet-edén c'al eb ay bay yul yet Telasar?

¹³¿Baytal ay eb reyal conoblak Hamat, Arfad, Sefarvaim, Hena c'al Iva tinani'? ẍitok cham reyal Asiria.

¹⁴Max cha' cham rey Ezequías tx'an carta max yatek cham reyal Asiria, max yilon cham tx'an. Max lajwi tu' max toj cham bay templo cax max jakon cham tx'an satak Jehová.

¹⁵Cax max txajli: Mamin Jehová, ach co Diosal ayon israel on ti', ayach ec' nan xol eb querubín, asannej ach Dios ach yiban masanil nacionlak bay yulyibank'inal ti', ach max a watx'nej satcan c'al tx'otx' tx'otx'.

¹⁶Ocan t'anan win Mamin, cax chabeni; ocan wal t'anan win cax chelon wal tzet max yaltek Senaquerib en; caw wal ya' yoc tzet max yaltek en tu', ach Dios iquis.

¹⁷Wal yel xiwil nacionlak c'aybilxa el yuj eb reyal Asiria tu'.

¹⁸Max ak'lay tz'a is diosal eb yuj. Yel toni a juntzan tu' man ton diosok, te' toni, ma ch'en tol watx'nebil yuj anima, xan max je' yetnentok.

¹⁹A tinani' xin, Jehová ach co Diosal, colon el yul is k'ab jun rey tu', yet chi yojtaknej el masanil nacionlak tol asannej ach Dios ach, ẍi cham rey Ezequías.

²⁰Max lajwi tu' cax max yalontok cham Isaías c'ajol Amoz bay cham rey Ezequías: Axca ti' yalon Jehová co Diosal ayon israel on ti': Max wab a txaj yuj tzet chi yal Senaquerib reyal Asiria, ẍi Cham, ẍi cham Isaías.

²¹Axca wal ti' max yun yalon Jehová yin reyal Asiria tu': A eb ix k'opoj aj conob Sión c'am elapnok yul sat eb, toc'al chi tzewi eb en, ach Senaquerib. A eb aj Jerusalén toc'al chi yak' bil eb jolom cax chi buchwajtok eb entak.

²²¿Mactxel jun max a buchu' c'al a xibteni? ¿Mactxel bay mimanxac'al max ot yul a nuk' c'al entaknen elok? Ayin ti' asanxanej in ocok, tol is Diosal in conob Israel.

²³A eb a chekbej max in bet buchon oj. Ach max ala': Max in ajtok bay jolomlak witz yetok xiwil in carruaje, bay jolomlak witz can ay aj bay yul yet Líbano. Max in tzoc'on aj te c'ute' tol najat ay aj is tel, c'al te q'uisis tol manxa watx'ilok. Max in ajtac'al apnok bay jolomlak witz tol can ay ajok, bay caw wal pimxac'al te k'ajte'lak.

²⁴Bay tx'ok nacional max jot eb in soldado uc'bala', max yuq'uen a' eb. Max on ec'c'altok yulak is k'ablak a' aej bay Egipto axca tol tannak aj a', cachi.

²⁵Palta ¿tom man ojtakok tol ayin Dios in? Wuj xan chi yun masanil juntzan ti'. Atax yet payxa albilcan wuj tol chi yun jun ti'. A tinani' xin, lanan ton yunen wuj. Yuj tu' xan chi je' a c'ayon el eb conob caw wal ay yip cax chi aycan bulnaj oj, cha saklemnencantok mimek conob.

²⁶C'amxa yip eb anima bay yul is conobal, chi xiw eb, chi q'uixwi eb. Axcaxac'al coc'al eltzab, ma axcaxac'al an ac'un bay chi low no chej, axcaxac'al ac'un chi ch'ibaj yibanlak na cax chi takcan el yet c'amto chi k'inibi, axcaxac'al tu' yayji eb anima.

²⁷Wojtak tzetbil ayji, wojtak tzetakc'al chonej, cax wojtak tol caw wal aytek owal win.

²⁸Mayal wabej tol aytek owal win cax toxac'al cha mimanej a ba. Yuj tu' ok waoc jun argolla yin a txam c'al yetok jun freno yin a ti', cax chach wak'on meltzoj bay a be bay max ach tita, ẍi Jehová, ẍi cham Isaías.

²⁹Max yalon c'apax cham Isaías bay cham rey Ezequías: A jun ti' yechelej yayji yuj tzetak yetal ok ujok: ok e lo' ixim trigo toc'al chi yalnej aj ba yet jun abil ti' yetok junxa abil chi jayi, tol man awbilok e yuj. Axa wal yet is yox abil xin, ayexxa ok e yaw e trigo tu' cax ok e wajban ajok, c'al e yawon e yuva cax che loon sat an.

³⁰A eb anima cajanto can ec' bay Judá, lajan ok yuncan eb axca te te' tol watx' chi yun tojcan xe' yul tx'otx' cax chi yak'on sat.

³¹Axa jaywanokxa anima ok colcan el ba bay Jerusalén, a ton bay tzalan Sión. A jun ti' ok yun Jehová Cham Yajaw yin Masanil yuj is camc'ulal.

³²Chi yalon pax Jehová yin reyal Asiria: Man ok octok yul conob Jerusalén, c'am wal junok julbalej ok yaoc yin, man ok yak' owal yin, tamwal ok watx'nej aj is walub bay yinlak murallail conob ti'.

³³A bay be bay max tita, ac'ala' tu' ok meltzojok. Caw wal man ok je' yoctok bay yul conob ti'.

³⁴Ayin Jehová in chi wala' tol ok in col jun conob ti', yuj in mimanbilal c'al yuj walben bay in chekbej David, ẍi Jehová, ẍitok cham Isaías.

³⁵A yet jun ak'bal tu' cax max betic' cham yángel Jehová mak'on cam 185 mil eb soldado asirio bay is campamento; camnakxa eb cax max sakbi el yet junxa c'ual.

³⁶Axca tu' max yun yion el Senaquerib is campamento bay tu', cax max tojcan bay Nínive.

³⁷A yet jun c'ual yet ayoc yin ayilal bay is dios chi yik Nisroc bay yul is templo, a tu' max mak'lay cam yuj eb is c'ajol, a ton Adramelec c'al Sarezer. Lajwi tu' max tojcan eb is c'ajol tu' bay yul yet Ararat, axa Esarhadón is c'ajol, max occan yin reyal is q'uexelok.