Read Q'anjob'al 2 R 2 Bible Online

2 R 2 - Q'anjob'al bible

2 R 2

¹Toxa chi apni c'ual yilaytok cham Elías yuj Jehová bay satcan xol jun cakxuchum cak'ek'. A yet tu' max tit cham Elías yetok cham Eliseo bay Gilgal.

²Cax max yalon cham Elías bay cham Eliseo: —Canan cayti' yujtol chin cheklaytok yuj Jehová bay Betel, ẍi cham. Cax max tak'wi cham Eliseo: —Chi wak' in ti' bay Jehová tol ok in tokc'al etok, ẍi cham. Yuj tu xin xan max toj eb cham cawanil bay Betel tu'.

³Cax max elul eb chekbej Dios ay bay Betel tu' chaon eb, cax max yalon eb bay cham Eliseo: —¿Ojtak mi tol ok ilay el a meẍtol ti' yuj Jehová ayach tinani'? ẍi eb bay. —Wojtakxa; c'amc'al tzet che yala', ẍi cham.

⁴Max lajwi tu', max yalon pax cham Elías bay cham Eliseo: —Canancan cayti' yujtol chin cheklaytok yuj Jehová bay Jericó, ẍi cham Elías. Cax max tak'wi pax cham Eliseo: —Chi wak' in ti' bay Jehová tol ok in tokc'al etok, ẍi cham Eliseo. Max lajwi tu' max toj eb cham cawanil bay Jericó.

⁵Cax max el pax ul eb chekbej Dios ayic' bay tu' chaon eb, cax max yalon eb bay cham Eliseo: —¿Ojtak xa mi tol ok yiel Jehová a meẍtol ti' ayach tinani'? ẍi eb cham. —Wojtakxa, c'amc'al tzet che yala', ẍi cham Eliseo.

⁶Max lajwi tu' cax max yalon pax cham Elías bay cham Eliseo: —Elok yin a c'ul chach cancan cayti' yujtol chin is chektok Jehová bay a' Jordán, ẍi cham. Max tak'wi pax cham Eliseo, max yaloni: —Tol chi wak' in ti' bay Jehová tol ok in tokc'al etok, ẍi cham Eliseo. Max lajwi tu' cax max toj eb cham cawanil.

⁷Max toj 50 eb chekbej Dios yetok eb cham; najat max oc waan eb tu' yiloni bay max oc waan eb cham cawan tu' bay is ti a' Jordán.

⁸Max lajwi tu' cax max pakon ay cham Elías is jokan pichil, max mak'on ay yiban sat a' Jordán. Cax max pojon ba a' cax max txecloj aj jun be takin, axa yec'tok eb yul jun be tu'.

⁹Maxc'al wal k'axpoj ec'tok eb cham xin, cax max yalon cham Elías bay cham Eliseo: —Al ayin tinani' tzet wal chochej chi wak' ayach yet c'amto chin ilay el a c'atan, ẍi cham Elías. Max yalon cham Eliseo: —Chin tewi ayach tol cab chi yun ak'oncan ekbej tu' ayin axcaok tol a babel c'ajol in, yet chin cancan a q'uexelok, ẍi cham.

¹⁰—Caw yatak yoc jun cha k'an tu'. Ta ok el tzetbil ok yun wilaytok, cax ok ak'lay ayach. Ta man ok el xin, man ok ak'lay ayach, ẍi cham Elías.

¹¹Yak'ban chi bey eb cham, cax chi k'anjab eb. Ayman max txecloj aj jun carruaje k'ak'ej yetok cac'on chej tol k'ak'ej c'apaxok. A' max pojon el cham Elías c'atan cham Eliseo, cax max ilaytok cham Elías tu' bay satcan xol jun cakxuchum.

¹²A yet max yilon cham Eliseo jun axca tu', cax max aj yaw max yaloni: ¡Ach mamin, mamin, mayal cach toji; axca wal ejército xiwil yip caywal tu' ayji xol conob Israel! ẍi cham. Ataxc'al yet tu' c'amxa bay max yil cham Eliseo yin cham Elías. Max yion el cham Eliseo is jokan pichil ayocok cax max tzilon ay nan is pichil bay satak yuj tx'oxon el is cusc'ulal.

¹³Max toj cham yioncan aj is jokan pichil cham Elías max aycan c'ayok. Axa meltzojcan cham bay a' Jordán tu', cax max oc lecan cham bay ti a' tu'.

¹⁴Max mak'on ay cham is jokan pichil cham Elías bay yiban sat a' aej tu', cax max aj yaw cham: ¿Baytal ayoc Jehová is Diosal cham Elías? ẍi cham. Maxc'al ayc'ay an pichilej tu' yiban a' aej tu', cax max pojon ba a'. Axca tu' max yun yec'tok cham Eliseo bay junxa is k'axepal a'.

¹⁵Cax max yalon eb cham is chekbej Dios ayic' bay Jericó najat lecan oc eb yiloni: A yikbej cham Elías ayoc yin cham Eliseo ti', ẍi eb. Cax max tit eb chaon cham, max ay nojan eb satak.

¹⁶Max yalon eb: —Mamin, iltonab co xol ayon a chekbej on ti', ay 50 eb caw wal tol tec'an. Ta chi je' a c'ul tokab eb sayon a meẍtol tu', talaj ay bay max k'oklaycantok yuj Yespíritu Jehová bay jolomlak witz ma yulak jobe xin, ẍi eb bay. Palta max yalon cham: —C'amak, c'am mac chi toji, ẍi cham.

¹⁷Max occ'al tean eb yin masantac'al max yal yin ak'bil puralil: Asek xin, ẍi cham. Cax max toj eb 50 tu' saywal yin oxeb c'ual. C'am mac max ilchaj yuj eb.

¹⁸Lajwi tu' max meltzoj eb bay Jericó. A tu' max cancan cham Eliseo, max yalon cham: —Max wal ayex tol c'am mac chi toji, quin chi, ẍi cham.

¹⁹Max yalon eb anima cajan bay jun lugar tu' bay cham Eliseo: —Ilab wal mamin, caw wal watx' jilon jun lugar ti', palta c'am tzet chi el sat tx'otx' yuj c'am watx'il a' aej ay bay, ẍi eb.

²⁰—Iektek atz'am atz'am yul junok miman ac' sec', ẍi cham Eliseo. Max yiontek eb jun sec' atz'am tu' bay cham,

²¹cax max toj cham secon aytok yul nuk' a' aej tu'. Max yalon cham: —Axca ti' yalon Jehová: Ayin chin watx'nej jun a' aej ti'. C'am bak'in ok yak' a' camich, cax c'am bak'in tol c'am tzet chi je' sat tx'otx' yuj a', ẍi Jehová, ẍi cham.

²²Axca tu' max yun watx'jican el a' masantac'al tinani', axca max yun yalon cham Eliseo.

²³Max lajwi tu xin, cax max ajtok cham Eliseo bay Betel. A yet lananc'al bey toji, cax max elol jun bulan eb nak ach'ej, chi bajwaj eb: ¡Ajantek petx jolom, ajantek petx jolom! ẍi eb.

²⁴Cax max toj t'anan cham Eliseo yin eb nak, max catabnelay eb nak yuj cham yin is bi Jehová. Ayman max elol cac'on no oso xol te', cax max coc'tzilnelaytok 42 eb nak yuj no'.

²⁵Ayman max toj cham Eliseo bay witzal Carmelo, a bay tu' max meltzojtok cham bay Samaria.