Read Q'anjob'al 2 R 20 Bible Online

2 R 20 - Q'anjob'al bible

2 R 20

¹A yet jun tiempoal tu' caw wal ow max yun jun ilya' yin cham Ezequías, toxa chi cami. A Isaías chekbej Dios, c'ajol Amoz max bet ilonok, max yalon bay axca ti': —Mayal yal Jehová tol chalcan tzet ok yuncan masanil tzet yetal ay ayach, yujtol ok ach camxac'al, manxa ok jay a c'ul, ẍi bay.

²Toxac'al max meltzoj octok acan cham Ezequías yich tx'at cax max txajli bay Jehová, max yaloni:

³Mamin Jehová chin tewi ayach, tol chin a natek yuj tzet max ach wut wak'on serbil, c'al wiken ayach wal yin yel, max in watx'nej tzet yetal tol chi cha a c'ul, ẍi. Cax max ok' wal sic'libil.

⁴Axa max yun xin, a yet c'amto wal chi elapnok cham Isaías bay nan yamak'il yatut cham rey tu', max jay pax k'anej Jehová bay, max yaloni,

⁵tol chi meltzoj bay Ezequías yajawil is conob cax chi yalon bay: Axca ti' yalon Jehová co Diosal, Diosal c'apax echmam David: Mayal wab a txaj c'al a ok'ilal. Ok wak' jay a c'ul, a yet cabej tinani' cax ok ach tok bay in templo.

⁶Okto wak' junokxa 15 abil a k'inal. Ok ach in colc'al yul k'ab reyal Asiria yetok conob Jerusalén ti'. Ayin ok in taynej jun conob ti', yujc'al in mimanbilal, c'al yuj in ti' max wak' bay in chekbej David, ẍi Jehová, ẍi cham chekbej Dios tu'.

⁷Max chekon cham Isaías chil-lay poj janic'ok sat te higo, max alay oc yin sat bay ayoc jun ilya' tu', axa jaycan c'ul Ezequías tu'.

⁸Axa cham rey Ezequías toxa maxax k'anlej bay cham Isaías axca ti': —¿Tzet wal yechelejal ok wila' yet ok nachaj el wuj tol a Jehová ok ak'on jay in c'ul, yetok ta a yet cabej tinani' chixa in toj bay templo Cham? ẍi bay.

⁹Max tak'wi cham Isaías: —A ton jun yechelej ok tx'ox Jehová ayach ti' yet watx' ok nachaj el oj tol ok yun is k'anej chi yala'. Ach chala' ta chi babji junok lajoneb makan jun enelej chi tx'oxon hora yin sat ch'en reloj, ma chi meltzoj lajoneb makanok yintak, ẍi cham Isaías.

¹⁰Max tak'wi Ezequías bay: —A toj enelej satak, man yatakok, a meltzoj yintak, a jun tu' yatak, ẍi.

¹¹Yuj tu' max tewi cham Isaías bay Jehová, axa Jehová max ak'on meltzoj yintak lajoneb makan jun enelej chi ec' yin sat reloj camnak Acaz.

¹²A yet jun tiempoal tu' a rey Merodac-baladán, c'ajol Baladán, reyal Babilonia, a jun tu' max aben yal-layi tol max yabi ay Ezequías, xan max chektek juntzan is chekbej ul yak'on carta c'al junok sabalej bay.

¹³Caw wal max chalay juntzan chekbej tu' yuj Ezequías, cax max tx'oxon masanil tzet c'uan yuj bay eb, axca plata c'al oro, yetok perfume c'al aceite caw wal watx', c'al yetok bay wajan ec' arma, c'al yetok jantak tzet yetal wajan ec' yuj, c'amxa junokxa tzet yetal ay bay is despacho c'al bay yul is makbej tol maj tx'oxo'.

¹⁴Lajwi tu xin, max toj cham Isaías chekbej Dios bay cham Ezequías, max k'anlen bay axca ti': —¿Baytal max ca titoc juntzan winak tu'? ¿tzet ẍi eb ayach? ẍi. Max tak'wi cham Ezequías bay: —Max tit eb bay jun nación caw wal najat, a ton bay Babilonia, ẍi cham.

¹⁵Max k'anlen pax cham Isaías: —¿Tzet yetal max yil eb bay yul a despacho ti'? ẍi. Max tak'wi pax cham Ezequías: —Masanil tzet yetal max yil eb, c'amxa jabok tzet yetal wajan ec' ti' maj yil eb, masanil max in tx'oxo', ẍi.

¹⁶Caytu' max yun yalon cham Isaías bay cham rey Ezequías axca ti': —Ab tzet ẍi k'anej Jehová ti xin:

¹⁷Ok apnok wal c'ual tol a masanil tzet yetal ay bay a despacho c'al yetok masanil tzet yetal max wajbajcan eb echmam, ok ilaytok masanil bay Babilonia, c'amxa jabok tzet yetal ok canok.

¹⁸Toltax eb enatil ok ilaytok eb bay Babilonia tu', ok ilay el yetbeyom is winakil eb, mosejal wal ok yun eb bay is despacho eb rey bay tu', ẍi Cham, ẍi cham Isaías.

¹⁹Axa cham rey Ezequías max yal bay cham Isaías: —A jun k'anej max al ayin yuj Jehová ti' caw wal watx', ẍi cham. Max yal axca tu' yujtol max na tol ay junc'ulalil yak'ban iquisto ec'ok.

²⁰A janic'okxa yabixal cham Ezequías, c'al tzet miman yelapnok max yunej, mawal axca tzet max yun watx'nen jun najab, c'al tzet max yun yiontek a' aej bay yul conob, a tu' tz'ibbilcan bay yul tx'an un yet yabixal eb reyal Judá.

²¹A yet max cam Ezequías tu', a Manasés is c'ajol max occan yin reyal is q'uexelok.