Read Q'anjob'al 2 R 23 Bible Online

2 R 23 - Q'anjob'al bible

2 R 23

¹Lajwi tu xin, max yawtej cham rey eb yajawil conob bay Judá c'al bay Jerusalén yet watx' chi wajbaj oc ba eb yetok.

²Ayman max toj cham rey yetok masanil eb anima ay bay Judá, yetok masanil eb ay bay Jerusalén, yetok eb sacerdote, c'al yetok eb chekbej Dios, chi yal elapnok masanil anima, eb c'am wal yelapnok c'al eb mimek yelapnok. Max toj eb masanil bay templo Jehová. A bay tu' max chek cham rey yawtelay aj tzet chi yal tx'an yunal trato Jehová max ilchaj bay is templo yab eb anima tu'.

³Max aj wan cham rey, max oc lecan c'atan jun miman oy bronce, max yak'on is ti' satak Jehová tol ok yikej, c'al beybalnen yin masanil is c'ul jun chekbanilej tu', yetokc'al is leyalil, c'al yiken masanil jantak yayji oc jun trato tz'ibbilcan yul tx'an un tu'. Ac'ala' masanil conob max yak' eb is ti' yin yikeni.

⁴Lajwi tu xin, max yalon cham rey bay cham sat sacerdote Hilcías yetokc'al eb yet is cab sacerdote, yetokc'al eb taynem puerta, tol chi yieltek eb masanil tzetak yetal ay bay yul templo Jehová, a ton mitx'k'abej yet chi oc ayilal bay Baal, c'al bay Asera, c'al bay tzektebalej ay satcan, max yak'on tz'a eb bay tiel conob Jerusalén bay ti a' Cedrón, cax ayman max ilaytok is tanil bay Betel.

⁵Max lajwi tu xin, max yion el cham eb sacerdote ak'bil yopiso yuj eb rey yin yak'on tz'a incienso bay chi oc ayilal bay can ay ajok ayic' bay Judá c'al bay tilak conob Jerusalén, c'al eb sacerdote chi ak'on tz'a incienso bay Baal, bay c'u bay xajaw, c'al bay masanil waycan, yetokc'al bay juntzan puj chi beyic' bay satcan.

⁶Max yion c'apax eltok bay tiel conob Jerusalén jun yechel Asera tol ayoctok bay yul templo Jehová. Max yak'on tz'a bay ti a' Cedrón, cax max tiẍontok is tanil tu' yiban bay mukan eb comon anima.

⁷Cax max yuchon c'apax ay is nalakil yet ajmulal xol eb winak, tol ayoc yul templo Jehová. A bay tu' chi chem c'apax eb ix ix an mantiado yet Asera.

⁸Max lajwi tu xin, max yaloni tol chi jayoc masanil eb sacerdote bay Jerusalén, a ton eb ay bay conoblak yul yet Judá, cax max yetnentok cham masanil altar can ayajok bay Geba masantac'al bay Beerseba, a ton bay max yak' tz'a juntzan sacerdote tu' incienso, cax max yuchon c'apax lajwok juntzan altar ay bay puertail conob, mawal bay puerta yet Josué, a ton yajaw yayji bay Jerusalén. A tu' chi cancan bay yetc'ulal co q'uexan yet chon octok bay yul conob tu'.

⁹Axa pax eb sacerdote max ak'on xajanbal bay chi oc ayilal bay can ay ajok, majxa apnok eb bay altar yet Jehová bay Jerusalén, asan tol chi lo eb ixim pan tol c'am yich yetok eb yet sacerdoteal.

¹⁰Caytu' max yun c'apax yetnentok cham Josías jun lugar chi yik Tofet bay jobeal Ben-hinom bay chi ak'lay tz'a unin yin xajanbalil. Yuj tu' c'amxa junok mactxel max je' yak'on tz'a is c'ajol ma is cutz'in bay jun yechelej chi yik Moloc.

¹¹Max yion el cham no chej ayoc yuj eb reyal Judá yet chi oc eb ayilal bay c'u. Max yak'on tz'a carruaje yet no chej tu'. A tu' chi cancan no' bay jun amak' bay is cawilal bay chon octok yul is templo Jehová, cawilal is cuarto jun winak ay yopiso chi yik Natan-melec.

¹²Cax max yuchon ay juntzan altar watx'nebil aj yuj eb reyal Judá bay pananil yiban is cuartoben rey Acaz, c'al juntzan altar watx'nebil can yuj rey Manasés bay cab yamak'il is templo Jehová, max mak' pojok, cax max k'okoncantok bay yul a' Cedrón.

¹³Max yetnejtok juntzan lugaril ayilal bay can ay ajok sataktok Jerusalén bay is tz'eyil yetc'ulal co watx' bay tzalan yet etnejtokbail. A juntzan tu' cannakcan yuj Salomón, reyal Israel bay Astarté is diosal eb aj Sidón jun tol yajbejtak; yetok c'apax Quemós is diosal eb moabita; yetok c'apax Milcom is diosal eb amonita. Masanil juntzan comon dios ti' yajbil yuj Jehová.

¹⁴Max mak'can poj ch'en ch'en ya' yili yuj eb, c'al k'akon aj is teal Asera, max saklemnentok bakil camnak bay tu'.

¹⁵Ac'ala' c'apax altar c'al templo bay Betel, watx'nebil can yuj rey Jeroboam, is c'ajol Nabat, a ton jun max ikbantok eb yet israelal yin yobtakil, max mak' c'apax poj Josías. Pokokxac'al max yunej, cax max yak'on tz'a yechel dios Asera tu'.

¹⁶A yet max meltzojtek Josías, max yilontok panteón bay tzalan, max yaloni tol chi ilay eltek bakil camnak ayoctok yul, cax chi yak'on tz'a bay satak altar yet chi yetnentok. Axca tu' max yun yion ba tzet max yal is chekbej Jehová max k'anjabcan el yin jun ti'.

¹⁷Yin aymanil max k'anlej cham rey Josías: —¿Mac ay yet jun panteón chi wiltok tu'? ẍi. Axa eb cajan bay jun conob tu' max tak'wi bay: —A is panteón jun chekbej Dios titnak bay Judá, a' max aloncan el tzet chon yin altar bay Betel ti' tinani', ẍi eb bay.*fn*

¹⁸Max yalon Josías: —Aek can jun tu xin, c'am mac chi tenon is bakil, ẍi. Xan majxa tenlay is bakil jun chekbej Dios tu', c'al is bakil junxa chekbej Dios titnak bay Samaria.

¹⁹Axca max yut Josías bay Betel, axca tu' max yut c'ayon el c'apax juntzan lugar yet ayilal bay can ay ajok, juntzan watx'nebil bay Samaria yuj eb reyal Israel, tol chi tx'emontek yowal Jehová.

²⁰Max lajwi tu' cax max mak'on cam yiban juntzan altar tu' masanil eb sacerdote yet juntzan lugar bay chi oc ayilal bay can ay ajok bay Samaria tu'. Max yak'oncan tz'a bakil camnak yiban juntzan altar tu'. Lajwi tu' max paxtek bay Jerusalén.

²¹Max yalon Josías bay masanil conob tol chi chalay k'in Pascua yuj yilay can Jehová is Diosal eb, axca yayjican yul tx'an yunal trato Cham.

²²C'am wal junok reyal Israel ma junok reyal Judá max chaon junok k'in caw wal miman axca jun max chalay ti'. Yettaxc'al max lajwi is tiempoal eb juez, eb max ak'on yajawil yiban conob Israel, c'am bay max chalay junok k'in axca jun ti'.

²³Yet wal 18 abilxa yoc Josías yin reyal max chalay k'inal Pascua tu', yuj yilay aj can Jehová bay Jerusalén.

²⁴Max c'ayon c'apax el Josías eb tz'akan ay is c'ul yaloni, c'al eb chi k'umen pixan camnak, c'al comon dios yulak na, yetokc'al masanil tzetak yetal tol yajbil yuj Jehová; max lajwi masanil yuj bay Judá c'al bay Jerusalén. Max yun axca tu' yuj yiken tzet ẍi yul tx'an yunal ley max ilchaj yuj cham sacerdote Hilcías bay yul templo Jehová.

²⁵C'am junok rey yet yalantok max yawal oc ba yul k'ab Jehová, axca wal max yun jun cham ti', c'amxa junokxa maxto yun yet tzunanil ti'. Yujtol max yikej tzet albilcan yul ley cham Moisés yin masanil is c'ul, yetok masanil is nabal, c'al yetok masanil yipalil.

²⁶Caxc'al axca tu' max yunej, palta aytoc'al yowal c'ul Jehová yin conob Judá yuj bay max tx'emtek Manasés is yowal c'ul Cham.

²⁷Yuj tu' max yal Cham tol ok yiel eb aj Judá tu' satak, axca max yun yion el eb israel is satak, cax ok yintaknen el Cham conob Jerusalén c'al is templo, caxc'al mayal sic'can elok, cax max yaloni tol a bay tu' chi oc ayilal bay.

²⁸A yul tx'an yunal bay tz'ibbil ay is yabixal tzet max yun reyal Judá, a tu' ayay masanil tzet max yun Josías.

²⁹A yul is tiempoal rey Josías tu' max toj Necao, reyal Egipto bay a' miman Éufrates, colwaj yetok reyal Asiria. Cax max eltok rey Josías yak'on owal yetok bay Meguido. A yet max chalen ba eb yin owal tu' max mak'lay cam Josías.

³⁰Max alay octok is mimanil yul carruaje yuj eb ayoc yin opiso yetok. Max tit eb bay Meguido masantac'al max jayoc eb bay Jerusalén; a tu' max muklay bay yul is panteón. Axa masanil eb anima bay yul conobal tu' max aon oc Joacaz is c'ajol Josías yin reyal is q'uexelok.

³¹23 abil Joacaz yet max oc yin reyal bay Jerusalén tu', oxebnej xajaw max oc yin reyal; a is txutx chi yik Hamutal, is cutz'in Jeremías aj Libna.

³²Caw wal yob max yut ba cham satak Jehová, asanc'al yobtakil max yunej axcac'al yobtakil eb is yichmam.

³³Max oc preso yuj rey Necao bay Ribla yul yet Hamat yet watx' c'amxa chi yak' yajawil bay Jerusalén yiban eb aj Judá, cax max yaon oc Necao tu' jun tojlabal yiban eb aj Judá tu': 75 quintal wal ch'en plata, yetok oxeb arroba oro.

³⁴Lajwi tu' max yaon oc rey Necao tu' Eliaquim is c'ajol Josías yin reyal q'uexelok is mam, cax max q'uexon is bi,*fn* max yak'on yik Joacim. Max yiontok Joacaz bay Egipto. A bay tu' max cami.

³⁵Max yak'on Joacim oro yetok plata max k'an reyal Egipto. Max yaon oc tojlabal yiban eb anima bay yul is nación tu', xan max yak' junjun anima ch'en oro c'al ch'en plata atac'ala' jantak tzet ay junjun. Caytu' max yun yak'on is tojlabal.

³⁶25 abil Joacim yet max oc yin reyal, cax 11 abil max yak' reyal bay Jerusalén. A is txutx chi yik Zebuda is cutz'in Pedaías aj Ruma.

³⁷Max oc is mul Joacim tu' yul sat Jehová, axcac'al yobal max yut ba eb is yichmam, axca tu' max yunej.