Read Q'anjob'al 2 R 24 Bible Online

2 R 24 - Q'anjob'al bible

2 R 24

¹A yul is tiempoal Joacim tu' max tit Nabucodonosor reyal Babilonia yak'on owal yin. Axca tu' max yun yoc rey Joacim oxeb abil yalan is yikbej Nabucodonosor, lajwi tu' max meltzoj oc ajc'ulal yin.

²Max yatek Jehová eb soldado caldeo, c'al eb soldado sirio, c'al eb soldado moabita, c'al eb soldado amonita elk'an yin conob Judá yuj yetnelaytok axca max yun chekon Cham yal eb is chekbej.

³Wal yel max tit jun ti' yiban Judá yujtol a Jehová max aontek yuj yion el Judá is satak, yuj is mul Manasés max yaocok.

⁴Yujc'al is chiq'uil xiwil anima c'am is mul max pulcantok yuj Manasés bay Jerusalén. A yuj tu' xan c'amxa chi yak' Jehová mimanc'ulal.

⁵Masanil tzet max yun rey Joacim, max tz'ibelaycan yul libroal is yabixal eb reyal Judá.

⁶A yet max cam Joacim, max muklay bay mukan eb yichmam, axa Joaquín is c'ajol Joacim, max oc is q'uexelok yin reyal.

⁷Majxa eltek cham reyal Egipto junelokxa yul is makbej, yujtol a reyal Babilonia max ion can ec' bay is makbej chi tittac'al bay a' elom aej yet Egipto masantac'al bay a' Éufrates.

⁸18 abil is k'inal Joaquín yet max oc yin reyal, cax oxebnej xajaw max yak' reyal bay Jerusalén. A is txutx chi yik Nehusta, is cutz'in Elnatán aj Jerusalén.

⁹Caw wal yob is beybal Joaquín tu' satak Jehová, axcac'al max yun is mam, axca tu' max yunej.

¹⁰A yet jun tiempoal tu' max tit eb is soldado Nabucodonosor, reyal Babilonia yak'on owal yin Jerusalén, max oc oyan eb yin conob tu'.

¹¹Lanan yak'on eb owal, cax max apni oc rey Nabucodonosor.

¹²Axca tu' max yun yaon oc ba Joaquín is reyal Judá yetok is txutx, c'al eb yajaw, yetokc'al eb is chekbej yul k'ab rey Nabucodonosor tu'. Max toj eb preso bay Babilonia yet waxakebxa abil yoc Nabucodonosor yin reyal.

¹³Max lajwi tu xin, cax max yion eltek Nabucodonosor masanil beyomal bay yul is templo Jehová, c'al yul is despacho cham rey. Cax max mak'on poj masanil mitx'k'abej tol oro yet templo watx'nebilcan yuj Salomón is reyal Israel, axca max yun yalon Jehová yet yalantok.

¹⁴Cax max yiontok yetok, masanil eb anima, yetok eb yajaw, c'al eb soldado caw wal watx'. Max yion c'apaxtok eb tenom ch'en yetokc'al eb ay yopiso. 10,000 eb max ilaytok preso tu' yin masanil. C'amxa mactxel maxto cani, asanxanej eb meba' max cani.

¹⁵Max yion c'apaxtok Nabucodonosor tu', rey Joaquín yetok is txutx c'al eb yistzil, c'al eb ayoc yin opiso yetok, c'al yetok eb anima ay yelapnok bay yul nación tu'. A ton tu' max ilaytok yuj bay Babilonia.

¹⁶A xol masanil anima max yitok bay Babilonia tu' ay 7,000 eb soldado, cax ay mil eb ay mulnajil chi je' yuj, c'al eb tenom ch'en. Max yi c'apaxtok masanil eb tec'an yip yak'wi owal.

¹⁷Ayman max yaoc cham rey Nabucodonosor Matanías is yuẍtak is mam Joaquín tu', yin reyal is q'uexelok. Max q'uexon is bi Matanías tu' cax max yak'on yik Sedequías.

¹⁸21 abil is k'inal Sedequías yet max oc yin reyal, 11 abil max yak' reyal bay Jerusalén. A is txutx chi yik Hamutal, is cutz'in Jeremías aj Libna xal.

¹⁹Caw wal yob max yut ba Sedequías yul sat Jehová axca wal max yut ba Joacim.

²⁰Yuj tu' max tit yowal Jehová yin Jerusalén c'al Judá, xan max yiel Cham is satak.