Read Q'anjob'al 2 R 25 Bible Online

2 R 25 - Q'anjob'al bible

2 R 25

¹Max meltzoj oc Sedequías ajc'ulal yin reyal Babilonia. Axa yet lajonebxa c'ual waay yet is lajoneb xajaw, yet balonebxa abil yoc Sedequías yin reyal, cax max apni oc rey Nabucodonosor yetok is soldado yak'on owal yin Jerusalén, max yoymaneni, max watx'nen aj is campamento bay satak conob, max watx'nej aj eb walub bay yinlak is murallail conob tu'.

²Oybilxa aj conob tu' masantac'al yet 11 abil yoc Sedequías yin reyal.

³A yet balonebxa c'ual yoc yet is can xajaw yet jun abil tu', caw wal max ayc'ay wajil bay yul conob tu', c'amxa jabok tzet watx' chi lo' eb conob.

⁴Cax max yolon eb soldado caldeo jun olan yin is murallail conob tu'. Caxc'al oybil aj conob yuj eb soldado tu', palta max el rey Sedequías yetok eb soldado yet ak'balil. Max eltok eb bay nan xol yawoj eb rey, max elapnok eb bay jun puerta bay nan xol cab muralla, caytu' max yun yoc eb yul be bay jobe chi apni bay a' Jordán.

⁵Axa pax eb soldado caldeo xin, max tzakloj eb yintak eb, max michchaj Sedequías yuj eb bay yac'alil Jericó. Max saklemcantok is soldado Sedequías tu'.

⁶Max mitx'on eb caldeo tu' cham rey, cax max yiontok eb bay cham reyal Babilonia ayic' bay Ribla. A tu' max lowxac'al yiban Sedequías yuj cham rey Nabucodonosor.

⁷Satak wal Sedequías max tzoc'lay cam is yuninal, axa pax a' xin, max ilay eltek is bak' sat, max c'al-lay yetok cadena, cax max ilaytok bay Babilonia.

⁸Ukebxa c'u yet is so' xajaw yin 19 abilxa yoc Nabucodonosor yin reyal bay Babilonia, max jayoc Nabuzaradán comandante yet is taynemal cham rey tu', yetok eb is soldado bay Jerusalén.

⁹Cax max yak'on tz'a eb is templo Jehová, c'al yatut eb rey, c'al yetok masanil is na eb mimek winak yayji.

¹⁰Max tenon ay eb soldado caldeo masanil is murallail conob Jerusalén.

¹¹Max lajwi tu' max yiontok Nabuzaradán eb anima maxto can bay yul conobal tu', c'al eb max yaoc ba yetok cham rey Nabucodonosor, yetokc'al eb mulnajwom anima cajan bay tu'.

¹²Asanxanej eb caw wal meba' max can yuj cham comandante yet chi mulnaj eb yin awoj uva c'al juntzanokxa awoj.

¹³Max mak'on poj eb soldado masanil tzetak yetal tol bronce ay yul templo, axca oy ayoc satak templo, c'al is batxlubal yich juntzan yaliẍ pila yet a' aej, c'al jun miman pila, cax max yiontok eb ch'en bronce tu' bay Babilonia.

¹⁴Max yiontok eb netal bay chi ay tik'ak'il tan, c'al pala, c'al ch'en ibal el tanil mecha, c'al cucharón, c'al masanil tzetak yetal tol bronce chi k'anlay yet chi oc ayilal.

¹⁵Max yi c'apaxtok cham comandante tu' tzetak yetal tol naba oro c'al naba plata, a ton juntzan sec', yetok ch'en bay chi ay tza k'ak'.

¹⁶C'amxa yalbanil jantak yalil ch'en bronce ayoc yin cab mimek oy yet templo, c'al yin jun pila yet a' aej, yetokc'al yin juntzan yich watx'nebil yuj rey Salomón yuj yaoncan oc bay is templo Jehová.

¹⁷Is tel junjun oy tu', ec'ban 8 metro. A jolom oy naba bronce, ec'ban nan is cab metro yayji aj is pimal, axa yinlak jolom oy tu' ay c'apax oc yelbub axca yili te granada. A juntzan tu' broncec'al elok. Lajanc'al yayji cab oy tu'.

¹⁸Max oc c'apax Seraías sat sacerdote preso yuj cham comandante, c'al Sofonías yet is cab sacerdote yayji, c'al oxwan eb chi taynen bay ti' templo.

¹⁹A bay yul conob tu' max ilchaj jun comandante chi ikban eb soldado, c'apax owanxa eb yet k'umal ti' cham rey yayji, yetok c'apax jun ajtz'ib chi ion aj is listail eb ayoc yin soldadoal. Ay c'apax junxa 60 eb anima caw wal mimek winak yayji bay yul conobal tu'.

²⁰Masanil juntzan eb anima tu' max yitok Nabuzaradán is comandanteal eb taynemal cham Nabucodonosor reyal Babilonia, bay Ribla yul yet Hamat. A tu' max yal cham rey tol chi cam eb. Axca ton tu' max yun bekoncan eb anima bay Judá tu' is conob c'al is tx'otx'al.

²²Max oc Gedalías, is c'ajol Ahicam is yitxiquin Safán yin gobernadoral yuj Nabucodonosor reyal Babilonia. A' max cancan yilon jantakto anima max can yuj bay Judá.

²³A yet max yaben eb yajawilal eb soldado maxto cani jun k'anej tu', max toj eb bay Mizpa yetok eb is soldado k'anjab yetok Gedalías. A eb tu', a ton Ismael c'ajol Netanías, Johanán c'ajol Carea, Seraías c'ajol Tanhumet aj Netofa, c'al Jaazanías c'ajol jun winak aj Maaca.

²⁴Cax max yak'on Gedalías is ti' bay eb c'al bay eb soldado, max yalon axca ti': C'am chex xiw e can yalan yikbej eb caldeo, cajayanek bay yul nación ti' cax chex oc yalan is chekbanil reyal Babilonia, axca tu' watx' chex elocok, ẍi.

²⁵Axa yet is suk xajaw, max jayoc Ismael is c'ajol Netanías is yitxiquin Elisama, tol yinatil eb reyal Judá yayji. Ay lajonwanxa eb winak ajun yetok, cax max mak'on cam eb Gedalías tu', yetok eb aj Judea, c'al eb caldeo ayic' yetok bay Mizpa.

²⁶Yuj tu xin, masanil eb anima max toj eb yin elilal bay Egipto yuj xiwc'ulalil bay eb caldeo. A tu' max toj eb anima mimanbil, c'al eb yaynakil, c'al eb yajawil eb soldado.

²⁷A yet 27 waay yet 12 xajaw yet 37 abilxa yilaytok rey Joaquín preso bay Babilonia, cax max oc Evil-merodac reyal bay Babilonia. A yet babel abil yoc yin reyal tu' max tx'oxon is watx'c'ulal yin Joaquín, max yion eltek bay yul preso.

²⁸Caw wal yelxac'al watx' max yut is c'ul yin, yintak juntzanxa eb rey ayoc yul preso bay Babilonia.

²⁹Axca tu' max je' q'uexon el Joaquín is pichil chi k'an yul preso tu', cax max low yetok cham rey yin jantakto tiempoal iquis.

³⁰Cax max yak'onc'al cham reyal Babilonia is gasto masantac'al max yal camtok.