Read Q'anjob'al 2 R 3 Bible Online

2 R 3 - Q'anjob'al bible

2 R 3

¹A yet 18 abil yoc Josafat yin reyal bay Judá, max chaon el yich Joram is c'ajol Acab yak'on reyal yiban Israel, cax 12 abil max yak' reyal bay Samaria.

²Yob is yunben satak Jehová, palta maj wal apnok yintak yet is mam c'al is txutx. A jun ti' max yiel jun ch'en ch'en yet Baal tol a is mam max watx'nen ajok.

³Caxc'al mi axca tu', palta max beybalnejc'al Joram is yobtakil Jeroboam is c'ajol Nabat, cham max ikban eb israel yin yobtakil.

⁴A cham Mesa reyal Moab, jobom calnel cham yetok masanil anima yul is makbej. Yuj tu' xan a tojlabal chi yak' bay cham reyal Israel a ton 100,000 yune' calnel yetok 100,000 no icham calnel yetokc'al is lanail.

⁵Axa yet max cam Acab xin, max yiel ba cham reyal Moab yul k'ab conob Israel.

⁶Yuj tu xin, max eltek Joram bay Samaria cax max wajon oc masanil eb soldado Israel.

⁷Ayman max yaltok bay Josafat reyal Judá: A reyal Moab mayal yiel ba yul in k'ab, ¿chi mi cha a c'ul chach oc wetok cax chi jak'on owal yin? ẍitok bay. Axa tak'wi cham reyal Judá tu' axca ti': Ok in tok etok yetokc'al in soldado c'al no' in chej.

⁸Palta xin, ¿tzet beal bay ok on oc yin eb? ẍitok cham. Max tak'wi cham Joram, max yaloni: A bay beal tz'inan tx'otx' yul yet Edom, a tu' ok on tok, ẍitok bay.

⁹Axca tu' max yun toj cham reyal Israel, cham reyal Judá c'al cham reyal Edom yetok eb is soldado eb. Yujtol max ec'c'al oyoyok eb yin ukeb c'ual xan max lajwi aj ya' eb soldado c'al yetok yet masanil no no'.

¹⁰Lajwi tu xin, max yalon cham reyal Israel: —A tinani' cochwal tol max on wajbaj oc Jehová ayon oxwan rey on ti' yet chon yaoc yul k'ab eb aj Moab, ẍi.

¹¹Max yalon Josafat: —¿C'am mi junok chekbej Jehová cayti' yet watx' chi k'anlej bay Cham juj? ẍi. Max tak'wi junok eb soldado cham reyal Israel: —A cayti' ayic' Eliseo is c'ajol Safat. A jun ti' is chekbej cham Elías yayji yet yalantok, ẍi.

¹²A jun tu' caw wal yel chekbej Jehová wali, ẍi Josafat reyal Judá. Yuj tu' xan yin wal aymanil max toj eb oxwan rey tu' k'anjab yetok cham Eliseo.

¹³Palta a Eliseo max yal bay cham reyal Israel: —¿Tzet walon wet etok? A tu' chi toj a k'anlej bay eb chekbej dios yayji yuj a mam c'al a txutx, ẍi. Palta a cham reyal Israel max occ'al tean yin: —C'amak, yowalil tol a bay junok chekbej Jehová chi co k'anlej, yujtol a Cham max on iontek cayti' yet chon ayc'ay yul is k'ab eb moabita, ẍi bay.

¹⁴Max yalon cham Eliseo bay: —Chi wal satak Jehová, Cham Yajaw yin Masanil, Cham chi wak' serbil, ta man yujok ay yelapnok Josafat reyal Judá ti' yul in sat, c'am wal jabok chin cha' wab tzet chala', tamwal jabok chin oc t'anan en.

¹⁵Iektek junok mactxel chi je' txalon te arpa in satak ti', ẍi cham Eliseo. Cax max yiontek eb jun nak chi je' yuj. A yet lanan txalon nak te arpa tu', max jayoc yipalil Jehová yin cham Eliseo,

¹⁶cax max yalon axca ti': —Axca wal ti' yalon Jehová: Watx'nejek xiwilok sanja bay jun jobe ti',

¹⁷caxc'al c'am cak'ek' tamwal nab ok e yil yayi, palta a bay jun jobe ti' ok noj yuj aej, xan a e masanil ayex ti' ok e yuc'a', ok yuq'uen a' no e wacax c'al yetok no chej.

¹⁸A jun ti' asan ch'an junok yaliẍ tx'oxbanilejal tol subojtak yayji yul sat Jehová, toltax ok yaoc Cham eb moabita yul e k'ab.

¹⁹Xan a yet tu', uchek lajwok masanil conoblak eb tol watx' yoc is murallail, c'al juntzan conob tol mimek conob yayji ocok. K'akek aj masanil yawoj telak eb, mukek el nuk'lak yuc'bala' eb, c'al e mukon el tx'otx' eb bay chi mulnaj eb yetok ch'en, ẍi Cham, ẍi cham Eliseo.

²⁰Axa max yun xin, a yet junxa k'inibalil, yet wal axca yorail chi ak'lay ofrenda, a bay yul makbej Edom, a tu' max tit aej toxac'al max nojil sat tx'otx' tx'otx' yuj a'.

²¹Yak'ban tu xin, max nachaj el yuj eb moabita tol lanan yapni oc eb rey yak'on owal yin eb. Xan max awtelay masanil eb ach'ej c'al eb ichamtak winak, a ton eb tiempo wal yoc yin soldadoal, cax max oc eb makon bay sat mojon.

²²Axa yet puch k'inibalil, yet max aj wan eb, toxac'al chi jopopi a' aej yuj yakan c'u, axa max yilontok eb moabita tu' tol chic'xac'al yili a'.

²³Xan max yal eb axca ti': A jun tu' chic'. Toxc'a a eb rey yetok eb is soldado max mitx'lej oc ba yin owal, max mak'lej cam ba. A tinani' tonek yet chi ji'can masanil is tzet yetal eb max cani, ẍi eb.

²⁴Palta a yet max jayoc eb moabita bay is campamento eb israel, ayman max oc eb israel tu' yak'on owal yin eb. Max elaj eb moabita bay eb, max tzaklojxac'al eb israel tu' yintak eb, max mak'on cam eb.

²⁵Lajwi tu' max yuchon lajwok eb is conoblak eb moabita, max yak'on noj eb tx'otx' tx'otx' bay chi oc mulnajil yetok ch'en. Max mukon el eb a' nuk'lak aej c'al tzoc'on aj eb masanil te awojtelak. Asanxanej conob Kir-hareset maxto cani, axa eb chi k'okwaj yetok jurjubej max oc oyan eb yinlak conob, max k'okontok eb ch'en yiban.

²⁶A yet max yilon cham reyal Moab tol caw wal ow yoc owal yin, max yiontek 700 eb soldado chi k'anbalnej espada. Max jakon eb jun be bay ayic' cham reyal Edom yaloni, palta maj je' yuj eb.

²⁷Lajwi tu', max iontek cham reyal Moab is babel c'ajol, a ton jun tu' t'inan ok occan yin reyal is q'uexelok. Max yak'on tz'a yin xajanbalil bay yiban murallail conob. Caytu' max yun tit owal yin eb israel, xan max yion aj eb is campamento, max meltzoj eb bay is conobal.