Read Q'anjob'al 2 R 7 Bible Online

2 R 7 - Q'anjob'al bible

2 R 7

¹Max tak'wi Eliseo: —Abto wal is k'anej Dios: A yet yecal yab axca hora ti', a bay puertail Samaria ti', a yin jun siclo plata ok je' co manon 10 libra ixim harina. Ac'ala' yin jun siclo ch'en plata ok je' co manon cab almu cebada, ẍi Jehová, ẍi cham.

²Cax max tak'wi jun acaw yilomal cham rey bay cham Eliseo: —Caxc'al mi chi jakloj is c'unail satcan yuj Jehová, c'am mi chi yun axca chal tu', ẍi. Max tak'wi cham Eliseo: —Ok el jun tu' ach ti', palta man ok a lo' ixim, ẍi cham.

³A yet tu' ay canwan eb nak ayoc lepra yin, ayic' bay puertail conob tu', cax max yalon eb bay junjun: —¿Tzet wal chi jun cayti'? Toc'al chotan on ay jechbanen co camichal.

⁴Ta chon octok bay yul conob ti' yowalil chon cam yuj wajil bay yul tu'. Ta chon can chotan cayti' yowalil ok on camc'alta'a. Watx' mi ta chon toj bay is campamento eb sirio. Ta chi yak' mimanc'ulal eb jin, cax chon ayji ec'ok; ta c'amak xin, toc'altac'a tol cambejal jayji, ẍi eb.

⁵A yet max k'ekbi ay xin, cax max toj lemnaj eb bay is campamento eb sirio. Axa yet max apni oc eb, max yilon eb c'amxa junok mac ayic'ok.

⁶A Jehová max ak'on yab eb soldado sirio yec' carruaje, c'al no chej, c'al yetok jun miman bulan soldado max yab eb. A yalon eb sirio tol a reyal eb israel max tojlanen eb reyal hitita c'al reyal Egipto cax chi yak'on owal yetok eb yaloni.

⁷Yuj tu xin, xan max aj lemnaj eb yet ak'balil cax max toj eb elok, max bekcan eb is campamento c'al is mantiado, c'al no chej, c'al is carruaje eb, asan eb max col ba.

⁸A yet max apni oc eb nak tu' bay tilak campamento, cax max octok eb bay yul junok mantiado, max low eb c'al yuq'uena' eb, max yion eltek eb oro, plata c'al pichilej, cax max toj eb c'uban elok. Max meltzoj eb junelxa, max ocpaxtok eb bay yul junxa mantiado cax max yion eltek eb tzetak yetal ay yul, cax tojpax eb c'uban el junelxa.

⁹Ayman max yal eb bay junjun: —Man watx'ok axca chi jun ti'. A tinani' is c'ual wal jiontok abix, akxa xin, tz'inc'al con chi. Tatol okto jechbanej yet yecal, ay mi laj tzet ok tit jiban. Watx' tol chon toj jal bay cham rey, ẍi eb.

¹⁰Xan max toj eb, max yawten eb eb taynem ti' conob, max yalon eb axca ti': —Max on betic' bay is campamento eb sirio, c'amxa junok mac ayic'ok, asanxanej no chej c'al no burro aycanok, c'al is mantiado eb axcac'al max yun yaon aj eb, caytu' yayjicanok.

¹¹Max yawten eb chi taynen ti' conob tu' eb chi taynen yatut cham rey.

¹²Max al-lay bay cham rey, xan max aj wan cham yet ak'balil tu', max yalon bay eb ayoc yin opiso yetok: —Ok wal ayex tzet chi yochej eb sirio chon yutej, yujtol yojtak eb tol chon cam yuj wajil, xan max bekcan eb is campamento cax chi c'uban el ba eb bay xolak te', yet chon mitx'on eb yin jiquisal ta chon eltok yinel conob ti', axa yoccantek eb yul co conobal ti', ẍi cham rey.

¹³A junok eb is chekbej max aloni: —Tokokab jaywanok winak yila' c'al oc'onok no chej ayto ec' ti', cax ok jiloni tzet max uj tu'. Ta chi cam eb, ma c'amak, lajanc'al elok, man watx'ok bay tu' tamwal bay chon can ti', ẍi eb.

¹⁴Xan max yitok eb cab carruaje c'al no chej, cax max chekontok cham rey eb bay is campamento eb sirio. Max yion eb chekbanilej yet chi toj eb beytzej tzetbil wal yayji ocok.

¹⁵Max tzakloj eb yintak eb sirio masantac'al max apni oc eb bay a' Jordán. Axca tu' max yun yilon eb yulak be aycan pichilej c'al is tzetak yetal eb sirio yuj yel xuyuyok eb colon ba. Ayman max meltzoj eb ul yalon bay cham reyal Israel tzet max bet yila'.

¹⁶Max lajwi tu' max eltok masanil eb aj Samaria cax max yion eltek eb masanil tzetak yetal ay yul is campamento eb sirio. Max yun axca max yun yalon Jehová, tol 10 libra ixim harina max txonlay yin jun siclo ch'en plata, cax cab almu cebada, ac'ala' yin jun siclo ch'en.

¹⁷Max yalon cham rey bay jun acaw is yilomal tu' tol chi can taynej puertail conob, palta max toj bulnaj eb anima yiban, max tec'ontok eb, cax max cami, axca max yun yalon cham Eliseo is chekbej Dios tu' bay, yet max betic' cham rey k'anjab yetok tu'.

¹⁸Max eloc axca max yun yalon is chekbej Dios tzetbil tol a bay puertail conob Samaria yab axca ti' yecal ok txonlay harina, 10 libra yin jun siclo ch'en plata c'al cab almu cebada, ac'ala' yin jun siclo ch'en.

¹⁹Axa jun acaw yilomal cham rey tu' max tak'wi bay is chekbej Dios: Caxc'al tol chi jakchaj is c'unail satcan yuj Jehová, c'am chi yun axca chi yun alon tu', ẍi. Max tak'wi cham Eliseo tol ok yila' palta wal looni, majxa.

²⁰Wal yel axca tu' max yunej, yujtol a eb anima max tec'on cam bay ti' puertail conob, axca tu' max yun cami.