Read Q'anjob'al 2 R 8 Bible Online

2 R 8 - Q'anjob'al bible

2 R 8

¹Max yalon cham Eliseo bay xal ix ictzojnak aj yune' yuj cham, tol chi toj xal cajay bay junokxa lugar yetok yune' yetokc'al eb cajan yetok bay yatut, yujtol mayal yal Jehová tol ok yak' junok miman wajil bay jun conob tu', tol ukeb abil ok yak'a'.

²Xan max yikej xal toji axca max yun yalon cham Eliseo. Caytu' max yun toj xal bay yul is tx'otx'al eb filisteo. A bay tu' max cancan cajan yin ukeb abil.

³Max lajwi tu xin, max meltzojtek bay yul is makbej eb filisteo tu', max toj satak cham reyal Israel yuj k'anoni tol chi ak'lay pax yatut c'al is tx'otx'al junelxa bay.

⁴Lanan k'anjab cham rey tu' yetok Giezi, is chekbej cham Eliseo, yujtol max yal cham rey tol chi al-lay bay masanil tzetak yetal tol c'ayubtak max yun cham Eliseo tu'.

⁵A wal yet jun bek tu' lanan wal yalon Giezi tu' yabixal tzet max yun yictzonen aj cham Eliseo tu' jun yune' jun xal ix. A wal yet tu' max jayoc xal yalon yuj is tx'otx' c'al yuj is na. Yuj tu xin, max yalon Giezi tu' bay cham rey axca ti': —Mamin rey, a ton wal jun xal ix ti' chi wala', a ton jun yune' xal ti' max yictzonej aj cham Eliseo, ẍi bay.

⁶Max k'anlen cham rey bay xal ix tu', axa yalontek xal jun abix tu' bay cham; lajwi tu' max chekon cham rey tu' junok eb is chekbej tol yipc'ulej yayji yuj, yet chi toj ak'lay is satak xal ix tu', yetokc'al masanil tzet yetal max yak' tx'otx' yettax max el xal bay yul nación tu' masantac'al tinani'.

⁷Lajwi tu xin, max toj cham Eliseo bay Damasco. A yet jun tiempoal tu' caw wal ya'ay Ben-adad, is reyal Siria. Max al-lay bay tol mayal apni oc cham chekbej Jehová.

⁸Xan max yal cham rey bay junok is chekbej chi yik Hazael: —Itok junok sabalej cax chach toj elon cham chekbej Jehová tu'. Cax cha k'anon bay tol chi k'anlej bay Jehová wuj, tatol okto jay in c'ul yuj jun ilya' ti', ẍi.

⁹Xan max toj Hazael yilon cham Eliseo. Max yiontok sabalej caw wal watx' chi el bay Damasco, 40 wal no camello iknej oc sabalej tu'. A yet max apni oc satak cham, max yaloni: —A cham a chekbej Ben-adad reyal Siria, a' max in chekontek yet chi ul in k'anlej ayach, ok tom jay c'ul yuj jun ilya' ayoc yin ma c'amakxa, ẍi.

¹⁰Max tak'wi cham Eliseo: —Asi', cax chalon bay tol ok jay c'ul yuj jun ilya' tu', palta max yal Jehová tol ok camc'alta'a, ẍi cham Eliseo.

¹¹A wal yet jun bek tu' max ocxac'alcan t'anan cham Eliseo yin Hazael tu' masantac'al yobxac'al max yabej. Axa max yun xin, max ok'aj cham chekbej Dios tu'.

¹²Xan max k'anlej Hazael tu' bay: —¿Tzet yuj xan chach ok' mamin? ẍi. Max tak'wi cham Eliseo tu' bay: —Wojtak wali tol ok ak' yobc'ulalil yin eb wet israelal, ok aoc is k'ak'al is cuartel eb, cax ok a mak'on cam eb ach'ej yetok espada. Ok a mak'on cam eb yaliẍ unin c'al a c'upontok is c'ul eb ix yob ix, ẍi cham.

¹³Max yalon Hazael bay cham axca ti': —Ayin ti' caw c'am welapnok. ¿Tzet wal ok yun wunen junok tzet yetal axca tu'? ẍi. Max tak'wi pax cham Eliseo bay: —A Jehová mayal yal ayin tol ach ok ach oc yin reyal bay Siria ti', ẍi.

¹⁴Max lajwi tu' max yaloncan toj ba Hazael bay cham Eliseo, axa toj bay satak is yajawil tu'. Max k'anlen el cham rey tu' bay: —¿Tzet ẍi cham Eliseo ayach? ẍi bay. Max tak'wi Hazael, max yaloni: —Max yal ayin tolab ok jay a c'ul yuj jun ilya' ti', ẍi.

¹⁵Axa yet junxa c'ual xin, max yak' ch'acay Hazael jun pim k'ap, max bet yaontok yiban sat cham rey, axca tu' max yun camxac'al cham. Max lajwi tu' axa Hazael max occan yin reyal is q'uexelok.

¹⁶A yet oyebxa abil yoc Joram is c'ajol Acab yin reyal bay Israel cax max chaon el yich Joram is c'ajol Josafat yak'on reyal bay Judá.

¹⁷32 abilxa is k'inal yet max chaon el yich yak'on reyal tu', waxakeb abil max yak' reyal bay Jerusalén.

¹⁸Palta ac'ala' is beybal eb reyal Israel max beybalnej, c'al is beybal eb yinatil Acab, yujtol max yi' is cutz'in Acab yistzilok. Yuj tu xin, caw wal yobtak is yunben satak Jehová.

¹⁹Palta maj yal c'ul Jehová max yak' lajwok Judá, yujtol caw wal ay is mimanc'ulal yin yuj cham rey David is chekbej, tol max yak' Jehová is ti' bay tol iquisc'al ec' is yinatil yin tojbalk'inal.

²⁰A yul tiempoal Joram yet max yak'on reyal, a Edom max yiel ba yul k'ab conob Judá, max yaon oc is reyal yul yet.

²¹Xan max toj Joram yetok masanil is carruaje yak'on owal yetok eb edomita bay Zair, palta eb edomita max oymoj eb yin. Axa yet ak'balil max aj wan Joram yetok eb capitán yayji yin carruaje yet owal tu'. Max yak'on eb owal yin eb edomita, axca tu' max yun colon el ba yul k'ab eb, axa eb soldado Israel xin, max meltzojcantek eb bay yatut.

²²Palta a conob Edom xin, max elc'alta' yin yilon ba yul yet masantac'al tinani'. A c'apax yet tu' max yion el ba conob Libna.

²³A janic'okxa is yabixal Joram c'al tzetak max yunej, a tu' tz'ibbilcan bay yul tx'an un yet yabixal eb reyal Judá.

²⁴Axa yet max cam Joram xin, a tu' max muklay bay mukan eb yichmam, a ton bay conobal David. Lajwi tu' axa Ocozías is c'ajol max occan yin reyal is q'uexelok.

²⁵A yet lajcawebxa abil yoc Joram is c'ajol Acab reyal bay Israel, cax max oc Ocozías yin reyal bay Judá.

²⁶22 abil is k'inal yet max chaon el yich yak'on reyal, jun abil max yak' reyal bay Jerusalén. A is txutx chi yik Atalía. A xal tu' yitxiquin Omri reyal Israel.

²⁷A Ocozías tu', ac'ala' axca is beybal Acab max beybalnej, yujtol niej yayji bay Acab, xan caw wal yob tzet max yun satak Jehová.

²⁸A Ocozías tu' max junanej is nabal yetok Joram is c'ajol Acab, yet max yak'on eb owal yin Ramot bay Galaad yin Hazael, reyal Siria, palta max yasji Joram yuj eb sirio tu'.

²⁹Xan max meltzojtek Joram bay Ramot. Max jaycan oc bay Jezreel yuj yanten ba yuj bay max yasjitok yuj eb sirio. Yujtol max yabi ay Joram tu xin, xan max toj Ocozías bay Jezreel.