Read Q'anjob'al 2 R 9 Bible Online

2 R 9 - Q'anjob'al bible

2 R 9

¹A cham Eliseo is chekbej Dios max yawtej junok eb is yet chekbejal ach'ejto, max yalon bay axca ti': —Watx'nej a ba cax chach toji. Cheontok jun netal aceite ti' cax chach toj bay Ramot yul yet Galaad.

²A yet ok ach apnok bay tu' cax cha sayon ec' Jehú, is c'ajol Josafat is yitxiquin Nimsi. Chach octok bay ayic'ok, cax cheon el xol eb ayic' yetok bay tu', cheontok bay junokxa cuarto.

³Cax cheon aj jun netal aceite ti' cha secon ay aceite tu' yiban is jolom, cax chalon bay axca ti': Axca wal ti' yalon Jehová: Ayin chach in sic'can elok yet ok ach oc yin reyal bay Israel, ẍi Cham, cachi. Chi lajwi tu' cha jakon puerta cax chach eli, c'am chach mayji bay tu', ẍi cham Eliseo.

⁴A jun ach'ej chekbej Dios tu' max toj bay Ramot yul yet Galaad.

⁵A yet max apni oc bay tu', wajan ec' masanil eb capitanil eb soldado max yaloni: —Ay wal janic'ok tzet ok wal ayach, ach in capitán, ẍi. —¿Mac on txel bay ok ach k'anjab tu'? ẍi Jehú. —A ton ayach, ach in capitán, ẍi bay Jehú tu'.

⁶Max lajwi tu' max aj wan Jehú, max octok yul na, cax max yaon ajtok jun chekbej Dios tu' aceite yiban is jolom, max yaloni: —Caywal ti' yalon Jehová co Diosal ayon israel on ti': Ayin chach in sic'can elok yet ok ach oc yin reyal bay in conob Israel.

⁷Ach ok ak' lajwok masanil eb yinatil camnak Acab, a yajawil. Caytu' ok yun in paktzen is camichal eb in chekbej, c'al eb yalomal el in k'anej, a ton is chiq'uil eb pulnak el yuj Jezabel.

⁸Masanil is yinatil Acab yowalil chi lajwi elok. Masanil eb winak, caxc'al mosejal ma yet ba, ok lajwok el xol conob Israel, c'amxa junok yinatil tu' chi cancan yin yiquisal.

⁹Caywal ti' ok wut yinatil Acab axca wal max wut yinatil Jeroboam is c'ajol Nabat, axca max wut c'apax yet Baasa is c'ajol Ahías.

¹⁰A pax yuj Jezabel xin, a no tx'i ok chiontok is mimanil bay yul yet Jezreel, c'amxa mac ok mukon xal, ẍi Jehová, ẍi jun chekbej Dios tu'. Max lajwi yalon jun chekbej Dios tu' masanil juntzan ti', cax max jakon puertail na tu' max toji.

¹¹A yet max ocpaxtok Jehú tu' yin wajayil eb is yet capitanil tu', max k'anlen el eb bay: —¿Tzet ẍi? ¿Tzet yuj xan chach ul yil jun loco tu'? ẍi eb. —Ayex ti' e yojtak nak, e yojtakxa tzet yetal chi yalc'alta' eb chekbej Dios tu', ẍi Jehú bay eb.

¹²—C'amak, man jojtakok, al ayon tzet max ul yala', ẍi eb. Cax max tak'wi Jehú bay eb: —Tix wal tzet max yal ayin ti': Tolab wal axca ti' yalon Jehová: Ayin chach in sic'can el reyalok Israel tinani', ẍi Jehová, ẍi nak ayin, ẍi Jehú bay eb.

¹³Junjunc'al eb max yitek eb is jokan pichil, max yaon ay eb yalan yakan Jehú bay k'och yajtok. Yinxac'al aymanil max xu eb is cacho, max yalon eb yin ipejal: A cham Jehú, reyxa cham, ẍixac'al eb.

¹⁴Caywal ti' max yun naon oc Jehú c'ajol Josafat is yitxiquin Nimsi yin Joram. A Joram tu' ayc'al oc yetok eb yet israelal yet chi col-lay Ramot yul yet Galaad bay Hazael reyal Siria.

¹⁵Ayxatax c'ual max jaycan bay Jezreel yet max yantej ba bay max yasjitok yuj eb sirio yet max oc owal yin rey Hazael tu'. Max yalon Jehú bay eb ajun yetok tu': Tatol caw wal yel che yochej tol chin oc e reyalok, c'am junok mac chi eltok yul conob ti' yet watx' c'am mac chi toj alon junok k'anej bay Jezreel, ẍi cham Jehú.

¹⁶Ayman max ajtok cham yul is carruaje yet owal, max toj bay Jezreel, bay lanan yanten ba cham Joram. Ay c'apax ec' Ocozías reyal Judá bay tu' yuj bet yil-lay yuj.

¹⁷A yet max yilon jun taynemal conob Jezreel ayajtok bay can, tol chi jayoc Jehú yetok jun bulan winak, max el yaw: —Ay juntzan soldado chi jayocok, ẍi nak. Axca tu xin, max yalon Joram: —Tokokab junok soldado yiban chej, yet chi toj yila' mactxel, c'al k'anleni ta man yinok owal chi jayocok, ẍi.

¹⁸Xan max toj jun soldado yiban chej yuj yilon mactxel, max yalon bay: —A cham rey chi chek ul in k'anlej ayach ta man yinok owal chach jayocok, ẍi nak. Max yalon Jehú bay: —C'am alon et yin jun k'anej ti' ach ti', asan tol ocan tzakan wintak, ẍi cham. Axa yalon jun taynemal conob ayajtok can tu', max yaloni: —A nak chekbej tu' max apni oc bay xol eb tu', palta c'am chi meltzojpaxtek nak, ẍi nak.

¹⁹A wal yet jun bek tu' max chekontok cham rey junxa soldado yiban chej, max apni oc bay eb tu', max yaloni: —A cham rey max in chekon yet chi ul in k'anlej ayach ta man yinok owal chach jayocok, ẍi. Max yalon Jehú bay: —C'am alon et yin jun k'anej ti' ach ti', asan tol ocan tzakan wintak, ẍi cham.

²⁰Max yalon jun taynem conob tu' junelxa: —Ac'ala' junxa nak tu' max apni oc nak bay eb tu', palta c'am chi meltzojpaxtek nak chi wila'. Cochwal a mac chi jayoc bay yul carruaje tu' a Jehú, is yitxiquin Nimsi, yujtol caw wal yaxc'ayinakxac'al tita, axcac'alta' is beybal, ẍi nak taynemal conob tu'.

²¹Xan max yal Joram tol chi alay oc no chej yin is carruaje yet owal. Xan max watx'nej oc eb is carruaje Joram reyal Israel, yetok c'apax Ocozías reyal Judá. Max eltok eb, junjunc'al eb yul carruaje yet owal, max toj eb chaon Jehú. A wal bay tx'otx' tx'otx' Nabot bay yul yet Jezreel max chalej ba eb.

²²A yet max yilon Joram tu' Jehú, max yalon bay: —¿Yin mic'al watx'c'ulalil chach jayoc Jehú? ẍi Joram bay. —¿Bay wal ok titoc watx'c'ulalil? Ilab tol a a txutx xal Jezabel, ac'ala'c'al xal yin ayilal bay comon dios c'al yin is yajbalil, ẍi Jehú.

²³Catatu xin, max meltzoj Joram, max elajok, maxto wal awji bay Ocozías: —Camich jun ti' Ocozías, ẍi.

²⁴Axa pax Jehú xin, max yetc'ulnentok is julbal max julwajtok yin Joram, palanc'al toj yin yichin max eq'uel bay is pixan. Xan max ayc'ay Joram yuj yas tu', max cam bay yul is carruaje.

²⁵Lajwi tu' max yalon Jehú bay jun is chekbej chi yik Bidcar: —Ieltek yul carruaje tu' cax cha k'okoncan eltok bay tx'otx' tx'otx' yet Nabot ti', yujtol chito in natek ach jun wetok, tzakan on yintak is carruaje Acab is mam jun ti', yet max yaloncan el Jehová jun k'anej ti' yiban. Max yal axca ti':

²⁶Max wil mak'lay cam Nabot yetokc'al yuninal yet ewi. Caywal tu' ok yun in paktzen ayach ac'ala' bay jun lugar ti', ẍi Jehová. Yuj tu xin, mitx'a', cax cha k'okoncantok bay tx'otx' yet Nabot, yujtol axca tu' max yun yalon Jehová, ẍi Jehú.

²⁷A yet max yilon oc Ocozías reyal Judá tzet max uji, max elajok max tojcan bay beal Bet-hagan, palta a Jehú xin, max tojc'al yintak, max yaloni: —Mak'ek cam c'apaxok, ẍi. Max michchaj yuj eb bay witzal Gur cawilal Ibleam. A bay tu' max yak' yasjok eb bay yul is carruaje tu', palta maxto je' yeli masantac'al bay Meguido. A bay tu' max cami.

²⁸Lajwi tu' max ilaytok yuj is chekbej bay Jerusalén yul jun carruaje. A tu' max mukay bay mukan eb is yichmam bay conobal David.

²⁹A Ocozías tu' max chail yich yak'on reyal bay Judá yet wal usluq'uebxa abil yoc Joram is c'ajol Acab yin reyal bay Israel.

³⁰Lajwi tu' max toj Jehú bay Jezreel. A yet max yaben xal Jezabel tzet max uj tu', max bonon yinlak bak' sat, max xion ay xil is jolom, max eltok t'anan bay jun wentena.

³¹A yet max jayoc Jehú bay ti' conob tu' max yalon xal bay axca ti': —Jantak yalon a c'ul Zimri, ach ti' max a mak' cam a yajawil, ẍi xal.

³²Max ajtok t'anan Jehú bay jun wentena tu', max yaloni: —¿Mactxel ayoc wetok? ẍi cham. Ay cawan oxwan eb mulnajwom yul yatut xal max eltek t'anan yiloni.

³³Max yalon Jehú bay eb: —Tenek aytek jun ix tu', ẍi bay eb. Max tenon aytek eb, toxac'al max lowcan tiẍlabok is chiq'uil yinlak sat pared yet max ec'aytek, axa no chej max tec'on ay xal bay sat tx'otx'.

³⁴Lajwi tu' max toj Jehú tu' lowok c'al yuq'uena'. Axa yet max xew low tu' max yaloni: —Ilek tzet che yut jun ix caw wal yob tu', yujxac'al tol is cutz'in jun rey, xan mukayokabi, ẍi bay eb.

³⁵Axa yet max bet mukon eb xin, max yilon eb tol asanxanej bakil jolom yetok yakan c'al yetok is k'ab ayic'ok.

³⁶Axa yet max meltzoj eb max yalon eb bay Jehú tzetbil yayji ocok, axa Jehú max aloni: —Toxa mayal yalcan el Elías aj Tisbe, cham chekbej Jehová tol a no tx'i ok chiontok is mimanil Jezabel bay yul yet Jezreel,

³⁷tol a is mimanil tu' sakleminakxac'al ok yuncantok yuj no no' tu' yalxac'al bay ok cancan satlak tx'otx' yul yet Jezreel, xan c'am mac ok alonok: Tix is mukbanil xal Jezabel ti', man ẍiok eb, ẍi Jehová, ẍi Elías, ẍi Jehú.