Read Q'anjob'al 1 Cr 14 Bible Online

1 Cr 14 - Q'anjob'al bible

1 Cr 14

¹A cham Hiram reyal Tiro max yatok is chekbej bay cham rey David. A yetok eb tu' max toj eb albañil, c'al eb josom te'; max yitok eb te c'ute' yuj watx'jubal aj is despacho cham.

²Yuj tu' max nachaj el yuj cham rey David, tol a Jehová max aon oc cham yin reyal bay xol conob Israel. Caw wal mimanbil max yun is makbej yuj Jehová, yuj is watx'ilok is conob.

³Max yi' cham rey David juntzanxa eb xal yistzil bay Jerusalén, xan aytoc'al is c'ajol c'al is cutz'in max yil yetok eb xal.

⁴Eb is c'ajol max alji bay Jerusalén, a ton eb chi yik axca ti': Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Eliada c'al Elifelet.

⁸A yet max yaben eb filisteo tol mayal oc cham David yin reyal bay masanil Israel, max oc ijan eb sayon tzet chi yun yayc'ayi, palta ayman max yab cham, axa yeltok satak eb tu'.

⁹Max jayoc eb filisteo tu' bay jobeal yet Refaim yin etnej anima.

¹⁰Yuj tu' xan max k'anlej cham David bay Jehová axca ti': —¿Chi mi wak' owal yetok eb filisteo ti'? ¿Ok mi aoc eb yul in k'ab? ẍi cham. Max tak'wi Jehová bay: —Ak' owal yetok eb, yujtol ok wak' ayc'ay eb oj, ẍi.

¹¹Caytu' max yun yajtok cham rey David bay Baal-perazim. A bay tu' max ayc'ay eb filisteo yuj. Axca wal chi yun jakon junok elom aej is be, caytu' max yun jakon Jehová be ayin bay xol eb wajc'ul, ẍi cham. Yuj tu' xan max yak' yik jun lugar tu' Baal-perazim.*fn*

¹²Max bekcan eb filisteo tu' is diosal, xan max chek cham rey David tu' yak'lay tz'aok.

¹³Palta a eb filisteo tu' max meltzoj pax eb jayoc junelxa bay jobeal yet Refaim tu'.

¹⁴Yuj tu xin, max k'anlen pax cham rey David junelxa bay Dios, xan max yal Cham bay: —A tinani' manchak ach oc yin eb bay satak; palta tol chach oymoj yin eb, a bay yintak eb, a tu' chach oc ak'on owal yin eb bay cawilal bay ay te bálsamo.

¹⁵A yet ok abeni, axca tol ay mac chi ec'jab bay chonlak te te' tu', ocan yin owal yin eb. A jun tu' chi yal elapnok tol ayin chin babjitok a satak yet chi wak' cam eb soldado filisteo, ẍi Jehová.

¹⁶Axca wal max yun yalon Dios, caywal tu' max yut cham, xan max lajwi eb soldado filisteo, max tojtac'al bay Gabaón masantac'al max apni oc bay Gezer.

¹⁷Caywal tu' max yun yaj can is mimanbilal cham rey David bay masanil nacionlak. A wal Jehová max ak'on xiwaj c'ul masanil nacionlak tu' bay.