Read Q'anjob'al 1 Cr 15 Bible Online

1 Cr 15 - Q'anjob'al bible

1 Cr 15

¹Max yal cham rey David, tol chi watx'ji aj nalak bay conob chi yik conob David. Max watx'nen c'apax bay chi ayji te caẍail trato bay jun mantiado max watx'nej ajok.

²Xan max yal axca ti': C'am junok tol man levitaok chi iontek te caẍa yet Dios, yujtol a Cham max sic'on el eb tu' yet chi yiontek eb te caẍa, c'al yet chi occ'al eb yin ak'oj serbilal bay yin tojbalk'inal, ẍi cham.

³Lajwi tu' max wajban oc masanil eb yet israelal, yuj yilaytek te caẍa yet Jehová bay jun lugar mayal watx'ji yuj tu'.

⁴Max wajban c'apax oc masanil eb yinatil Aarón c'al eb levita.

⁵A yin eb yinatil Coat max wajnaj oc 120; a Uriel yajaw yayji oc xol eb yican tu'.

⁶Axa eb yinatil Merari, ay 220. A Asaías yajaw yayji xol masanil eb yican.

⁷A yin eb yinatil Gersón, max wajnaj oc 130. A Joel ayoc yajawil xol masanil eb yican tu'.

⁸A yin eb yinatil Elizafán, ay 200 eb max wajnaji: a Semaías ayoc yajawilal xol eb yican tu'.

⁹A yin yinatil Hebrón, max wajnaj oc 80 eb. A Eliel a' ayoc yajawilal xol masanil eb yican tu'.

¹⁰A yin yinatil Uziel, 112 max wajnaji; a Aminadab ayoc yajawilalok eb yican tu'.

¹¹Lajwi tu', max yawten cham rey David eb cham sacerdote, a ton Sadoc c'al Abiatar, c'al eb levita, a ton Uriel, Asaías, Joel, Semaías, Eliel c'al Aminadab.

¹²Max yalon bay eb axca ti': Ayex ti', tol yajaw e yayji oc xol masanil e yican, a ton ayex levita ex ti', watx'nejek e ba, atac'ala' ley, yetok masanil eb e yican, cax chi je' e yiontek te caẍa Jehová co Diosal ayon israel on ti' bay jun lugar mayal in watx'nej.

¹³Yujtol a yet babelal, mayexnak max e yioc ayex ti', yuj tu' xan max yak' cam Jehová co Diosal junok eb jetbi, yujtol maj cam co k'anlen jabej tzet watx' max junej, ẍi cham.

¹⁴Yuj tu xin, max watx'nen ba eb atac'ala' ley, yet watx' chi je' yiontek eb te caẍa Jehová Diosal Israel.

¹⁵A te batxbalej max yak'balnej eb yet max yiontek eb jolom is xic', axca max yun yaloncan cham Moisés yuj Jehová.

¹⁶Max yalon c'apax cham rey David bay eb yajaw yayji yin eb levita, tol a bay xol is tribual eb tu', chi sic'lay el eb chi bitni yin tzalojc'ulal, ayoc música yuj eb, a ton salterio, arpa c'al platillo.

¹⁷A xol eb yinatil Leví max sic'lay el eb chi aon oc címbalos: a ton Hemán c'ajol Joel, yetok Asaf c'ajol Berequías is yican, yetok Etán c'ajol Cusaías. Yinatil Merari eb ti'. Max sic'lay c'apax oc eb levita yin colwaj yaon oc arpa yaliẍ yoc yul is nuk' yetok eb: a ton Zacarías, Jaaziel, Semiramot, Jehiel, Uni, Eliab, Maasías c'al Benaía. Max sic'lay c'apax el juntzanxa eb levita yin colwaj eb yaon oc arpa miman yul is nuk': a ton Matatías, Elifelehu, Micnías, Azazías yetokc'al eb taynem templo, a ton Obed-edom c'al Jeiel.

²²Axa Quenanías is yajawil eb levita chi ikban bit, yujtol caw wal jelan yin.

²³Axa pax eb chi taynen te caẍa: a ton Berequías, Elcana, Obed-edom c'al Jehías. Axa eb sacerdote: a ton Sebanías, Josafat, Natanael, Amasías, Zacarías, Benaías c'al Eliezer. A ton eb tu' chi xuon trompeta satak te caẍa yet Dios.

²⁵A cham rey David, yetok masanil eb yicham winakil conob Israel, c'al eb yajaw yayji xol eb soldado, caw wal yin tzalojc'ulal yayji eb yet max bet yion eb te caẍail trato Jehová bay yatut Obed-edom.

²⁶Max occ'al Dios yetok eb levita max iontek te caẍa tu', xan max yak' eb ukc'on no toro, c'al yetok ukc'on no icham calnel yin xajanbalil.

²⁷A pichilej lino caw wal watx' ayoc yuj cham rey David; cay c'apax tu' yet eb levita chi iontek te caẍa tu', cay c'apax tu' yet eb chi bitni, c'al yet Quenanías chi ikban eb. Ay c'apax oc jun chaleco cham rey David naba lino.

²⁸Masanil eb israel max el yaw yuj tzalojc'ulal yet max ilaytek te caẍa Jehová, max xulay c'apax yuc'a' calnel, trompeta c'al yaon oc eb platillo, salterio c'al arpa.

²⁹A yet max jayoc te caẍa yet is trato Jehová bay conob yet David, axa xal Mical is yistzil David tu', a ton cutz'in Saúl, max eltok t'anan bay wentenail na. A yet max yiloni tol a cham rey David, ay wal oc yin tzalojc'ulal chi canalwi, yobxac'al max yut ba cham max yil xal.