Read Q'anjob'al 1 Cr 16 Bible Online

1 Cr 16 - Q'anjob'al bible

1 Cr 16

¹A tu' max alay octok te caẍa Dios bay yul jun mantiado max watx'nej aj cham rey David, tol yetc'alta' max yun watx'ji. Max lajwi tu' max yak'on tz'a eb xajanbal c'al xajanbal yet junc'ulal yetok Dios.

²A yet max lajwi tu' max yalon cham rey watx' k'anej yiban masanil conob yin bi Jehová.

³Axa yak'on cham rey tu' junjun ixim pan, junjun bijan chibej, yetok janic'ok takin uva bay junjun anima.

⁴Max yaoncan oc cham rey David yopiso eb levita, tol chi ak'wi serbil bay te caẍail trato Jehová, a ton eb tu' yowalil chi alon yuj diosalil, c'al yalon eb watx' k'anej bay Jehová Diosal conob Israel yin bital.

⁵A mactxel yajaw yayji yin bit tu', a ton Asaf; axa yintak tu' ay c'apax oc Zacarías. Chi lajwi tu' chi tit c'apax Jeiel, Semiramot, Jehiel, Matatías, Eliab, Benaía, Obed-edom, c'al Jeiel. A ton eb tu' ay is mitx'k'ab yin música, ay is salterio eb, ay c'apax is yarpa eb. Axa Asaf xin, a' chi aon oc platillo.

⁶Axa pax eb sacerdote, a ton Benaía, c'al Jahaziel, a eb tu' chi xuon c'al trompeta satak te caẍail trato Dios.

⁷A yet jun c'ual tu' yin wal babelal max yal cham rey David bay Asaf, yetokc'al eb ayoc yetok, tol yin bital chi yal eb juntzan aloj yuj diosalil ti':

⁸¡Alek yuj diosalil bay Jehová! ¡Alek el is yabixal Cham! ¡Alek bay conoblak masanil tzet max yunej!

⁹Bitnejek bit yuj e yion aj can. Alek el is yunben Cham tol c'ayubtak.

¹⁰Tzalojokonek, yujtol yet onxa Cham; ayokab tzalojc'ulal chi yab eb ayilwom bay Cham.

¹¹K'anek is colwal Jehová, aek ay e ba bay Cham yin tojbalk'inal.

¹²Ayon tol yinatil on Jacob is chekbej Jehová, a ton ayon conob Israel on ti', tol sic'bil on elok, co naektek jantak is yunben Cham tol c'ayubtakxac'al yoqui, c'al is ley tol mayal yalcan elok.

¹⁴A Jehová co Diosal, Yajaw yayji bay masanil sat tx'otx' tx'otx' ti'.

¹⁵Naanc'al is trato yuj yin tojbalk'inal; toltac'a chi yun is yalben Cham yin milal is makquiltakil anima chi ec'lej,

¹⁶a ton jun trato max watx'nej yetok Abraham, yetok bay max yak' is ti' bay Isaac.

¹⁷Max yaon wal oc yip is trato tu' bay Jacob, jun is trato yin tojbalk'inal yetok cham Israel.

¹⁸Max yalon axca ti': Ok wak' tx'otx' Canaán ayach, a ton satakej ok e' tu', ẍi bay.

¹⁹Jaywannej eb yet tu'. Tx'ok conobal yayji eb bay sat tx'otx' tx'otx' ti'.

²⁰Xiwilxa nación bay max ec'c'al cajan eb, c'al bay yulak is makbej eb rey.

²¹Palta maj yal c'ul Dios max etnelay eb, toltax max al-lay bay juntzan rey tu' axca ti':

²²C'am che yetnej eb in chekbej sic'bil el ti', ẍi Cham.

²³Bitnanek bay Jehová e masanil ex cajyom bay sat tx'otx'. Al-lekc'al el junjun c'u tol chon is colc'al Cham.

²⁴Alek el is mimanbilal Cham, c'al is yunben c'ayubtak yoqui bay masanil conoblak, c'al bay nacionlak.

²⁵Yujtol a Jehová yelxac'al miman yelapnok, moj wal tol chi al-lay watx' k'anej yin. Yelxac'al ay is may Cham yintak juntzan tzet yetal chi al-lay oc diosal.

²⁶A is diosal juntzanxa conoblak c'am jabok yelapnok; palta a Jehová max watx'nen satcan.

²⁷Miman txequel is mimanbilal c'al is yibanil aj can Cham, is watx'il yili, c'al yipalil chi txecloj bay is templo.

²⁸Ex anima bay conoblak, alek bay Jehová tol miman is yipalil, c'al is tzekekial.

²⁹Alek watx' k'anej bay Cham axca is mojalil. Ocanek yetok e yofrenda bay yamak'il templo Cham. Ocanek ayilal bay Jehová bay is cajlobal tol watx' yili.

³⁰Bilokab aj masanil anima satak Cham, yujtol a Cham max cawxanen yulyibank'inal ti', xan c'am chi q'uexlabi.

³¹Tzalojokab satcan c'al tx'otx' tx'otx'. Al-layokab xolak nación tol rey ton Jehová.

³²Bilokab a' mar yetok masanil tzet yetal ay bay yul a'. Tzalojokab masanil lugar bay chi oc mulnajil yetok masanil tzetak yetal ay bay.

³³Elokab yaw te' mimek telak satak Jehová yuj tzalojc'ulal, yujtol chi jayoc Cham yin yak'on yajawilal bay sat tx'otx' ti'.

³⁴Alek yuj diosal bay Jehová yujtol yelxac'al watx' Cham, yujtol a is camc'ulal ayc'al yin tojbalk'inal.

³⁵Alek axca ti': Col on Mamin, tol co Colomal ach. Yin on a wajbantek, c'al on a colon el bay nacionlak, yet chi jal yuj diosal ayach, c'al yin tzalojc'ulal chi jal watx' k'anej.

³⁶Jalek watx' k'anej yin Jehová co Diosal ayon israel on ti', yin tojbalk'inal, quex chi. Lajwi tu' max yalon masanil conob: Yunokabi, ẍi eb, xan max yal eb watx' k'anej bay Jehová.

³⁷Caytu' max yun cancan Asaf yetokc'al eb ajun yetok, yuj cham rey David, bay max can te caẍail trato Jehová, yet chi bitnic'al eb junjun c'u, atac'ala' tzet chi uj bay tu'.

³⁸Max can c'apax can Obed-edom yetokc'al eb ajun yetok, 68 eb yin masanil. Axa Obed-edom, c'ajol Jedutún c'al Hosa, a eb max taynencan nail tu'.

³⁹Max can c'apax cham sacerdote Sadoc, yetokc'al eb yet sacerdoteal ajun yetok, bay mantiado tol asan Jehová ay yet bay Gabaón,

⁴⁰yet chi yak'c'al tz'a eb xajanbal bay Jehová yin tojbalk'inal bay altar, yet k'inibalil, c'al yet yayc'ualil, axca wal tz'ibelaycan bay leyal Jehová, max yak'can bay conob Israel.

⁴¹A yetok eb sacerdote tu' max can c'apax Hemán, yetok Jedutún yetokc'al jaywanxa eb maxax sic'lay elok, a ton eb tu' ayoc yiban tol chi bitni: Al-layokab watx' k'anej bay Jehová, yujtol ayc'al is camc'ulal yin tojbalk'inal, ẍi eb yin is bit tu'.

⁴²A juntzan eb ti', max xu eb trompeta c'al yaon oc eb platillo, yetokc'al juntzanxa mitx'k'abej yin música, bay Dios. Axa pax eb c'ajol Jedutún max taynen ti' puerta.

⁴³Lajwi tu xin, max meltzojtok masanil eb anima bay yatut. Caytu' max yun meltzoj c'apax cham rey David bay yatut, max yalon watx' k'anej yiban masanil mac cajan yetok bay yatut.