Read Q'anjob'al 1 Cr 18 Bible Online

1 Cr 18 - Q'anjob'al bible

1 Cr 18

¹Lajwi juntzan ti xin, max yak'on ayc'ay cham rey David eb filisteo, c'al yaoncan oc yalan yikbej, max yion ec' conob Gat, yetokc'al yaldeail yul k'ab eb.

²Max ay c'apax c'ay eb moabita yuj, xan max yaoc ba eb yul k'ab cham, c'al yak'on eb tojlabal.

³Max yak'on c'apax ayc'ay Hadad-ezer, reyal Soba, a tu' ay bay yetc'ulal Hamat. Max yak' cham rey David owal, yujtol a jun rey tu' lanan makban ba yin tx'otx' tx'otx', masantac'al bay a' Éufrates.

⁴Max ayc'ay eb yuj cham. Mil carruaje max michchaj yuj, yetok 7,000 soldado ayoc yiban chej, yetok c'apax 20,000 eb chi beyi. Max mak'k'aj yakan masanil no chej inej oc carruaje yet owal tu', asanxanej no' yowalil chi k'anlay yuj 100 carruaje max cani.

⁵Ayman max apni oc eb sirio aj Damasco colwaj yetok Hadad-ezer, palta max ay c'apax c'ay eb sirio tu' yuj cham rey David, max cam 22,000 eb tu' yuj.

⁶Lajwi tu' max yaon oc cham juntzan destacamento xol eb sirio aj Damasco. Caytu' max yun yoccan eb sirio bay yul k'ab, max oc eb yak'on tojlabal. Caywal tu' max yun yayc'ay eb ajc'ul yuj cham yuj Jehová yalc'al bay max beti.

⁷Lajwi tu' max yion cham juntzan makbal julbalej naba oro chi k'an eb yajawil eb soldado cham rey Hadad-ezer, max yiontek bay Jerusalén.

⁸Caytu' max yun yion c'apax jun miman bulan ch'en bronce bay Tibhat, c'al bay Cun, a ton juntzan conob tu' makbilta yuj rey Hadad-ezer. A ton yetok juntzan ch'en bronce tu' max watx'nej cham rey Salomón jun miman pila, juntzan mimek oy, c'al masanil mitx'k'abej tol naba bronce bay templo.

⁹A yet max yaben cham Toi, reyal Hamat, tol mayal ayc'ay masanil eb is soldado rey Hadad-ezer yuj cham rey David,

¹⁰max chektek is c'ajol, a ton Adoram, yetok oro, plata, c'al bronce, yet chi ak'lay cawil c'ul cham rey David c'al yalon watx' k'anej yin, yujtol max yak'c'al owal yetok rey Hadad-ezer c'al yayc'ay yuj, yujtol a cham Toi tu' max yak' owal yetok rey Hadad-ezer tu' yet yalantok.

¹¹Max yak' cham rey David masanil juntzan ch'en tu' bay Jehová. Junej max yun yak'on yetok ch'en oro c'al ch'en plata max bet yican ec' bay juntzan nacionlak ti': a ton eb edomita, eb moabita, eb amonita, eb filisteo c'al bay eb amalecita.

¹²Yetok c'apax Abisai, yune' xal Sarvia, yajawil jun makan soldado cham rey David, max yak' ayc'ay 18,000 eb edomita bay jobeal yet Atz'am.

¹³Lajwi tu', max yaon oc cham rey David juntzan destacamento bay Edom; yuj tu' masanil eb edomita max occan yul k'ab. Caywal tu' max yun yayc'ay eb ajc'ul yuj cham rey David yuj Jehová yalc'al bay max beti.

¹⁴Max yak' cham rey David reyal bay yiban conob Israel, max beybalnej wal watx'il, yinc'al tojolal max yun watx'nen el k'anej xol conob.

¹⁵A yajawil eb soldado, a ton Joab, yune' xal Sarvia. A pax Josafat, is c'ajol Ahilud, yajtz'ib cham rey.

¹⁶A pax Sadoc c'ajol Ahitob, c'al Ahimelec, c'ajol Abiatar, sacerdote eb. Axa Savsa, tz'ibom abix.

¹⁷Axa pax Benaía c'ajol Joiada, yajaw yayji yin eb cereteo c'al eb peleteo, a ton eb taynemal cham rey. Axa eb c'ajol David tu', yajaw yayji yet chi colwaj yetok.