Read Q'anjob'al 1 Cr 19 Bible Online

1 Cr 19 - Q'anjob'al bible

1 Cr 19

¹Lajwi yeq'uel jun tiempoal, max cam cham Nahas, reyal eb amonita, axa Hanún is c'ajol, max occan yin reyal is q'uexelok.

²Max naon cham rey David tzet watx' chi yun yetok Hanún, c'ajol Nahas yin camc'ulalil, yujtol a is mam tu' max colwaj bay yet yalantok. Yuj tu xin, max chektok juntzan eb is chekbej yet chi toj mimanc'ulnelay Hanún tu' yuj eb, a ton yuj is camichal is mam. Palta a yet max apni oc eb is chekbej tu' bay conobal eb amonita,

³axa eb yajaw yayji bay xol eb tu', max yal eb bay Hanún: ¿Chim a na tol yujxac'al a mimanc'ulnelayi, yuj miman yelapnok a mam yul sat, xan chi jayoc juntzan winak yuj rey David? C'amak, a juntzan ti', toc'al chi ul yil eb tzetbil yayji jun co nación ti', ẍi eb bay.

⁴Yuj tu xin, max chekon Hanún tu', tol chi mitx'lay eb chekbej cham rey David tu'. Max tzuklay el xil ti' eb cax max tzil-laytok is pichil eb masantac'al max txecloj is chop eb. Lajwi tu xin, max cheklay meltzoj eb.

⁵Axa yet max bet al-lay bay cham rey David yuj tzet max utlay juntzan eb is chekbej tu', max chekon cham toj chalay eb, yujtol caw wal chi q'uixwi eb. Yuj tu xin, max yalontok cham tol chi can eb bay Jericó masantac'al chi yal ch'ib xil ti' eb tu', catatu' chi tit eb.

⁶Max nachaj el yuj eb amonita tu', tol yob max yab cham rey David. Yuj tu' xan max yatok Hanún, yetok eb amonita 800 quintal ch'en plata yet chi oc tojolok carruaje yet owal, c'al soldado yetok chej chi tit bay Mesopotamia, bay Siria, bay Maaca c'al bay Soba.

⁷Max tojlanej eb yet max tit 32,000 carruaje yet owal, c'al cham reyal Maaca, yetok is soldado. Max ayji is campamento eb bay cawilal conob Medeba. Max el c'apaxtek eb amonita yulak is conob, max jayoc eb bay tu' ul yak'on eb owal yin conob Israel.

⁸Palta max yab cham rey David jun tu', xan max chektok Joab yetok masanil eb soldado.

⁹A eb amonita max babji watx'nen ba yin owal bay chon octok bay yul is conobal eb tu', axa eb rey ajun yetok eb tu xin, max cancan eb bay ac'al.

¹⁰A yet max yilon Joab, tol ay eb ajc'ul bay satak, c'al bay yintak, max sic'lay el eb soldado caw wal jelan yuj, yet chi yak'on eb owal yin eb sirio.

¹¹Axa yet chi yak'on owal yetok eb amonita, max yaoc juntzanxa eb soldado yalan yikbej Abisai is yuẍtak.

¹²Max yalon Joab: Tatol yelxac'al ok je' yuj eb sirio ti' wintak, ayman ok ach tit colwajok; tatol a eb amonita yelxac'al ok je' yuj entak, ayinxa ok in tok colwaj etok.

¹³Tec'baj a ba, jak' owal yuj co colon eb jet conob, a ton is conobal co Diosal; yunokab Jehová bay chi el yin c'ul, ẍi Joab.

¹⁴Caytu' max yun toj Joab yetok eb is soldado yin yak'on owal yin eb sirio. Axa max yunej, tol max elaj juntzan tu' satak.

¹⁵A yet max yilon eb amonita tol mayal elaj eb sirio, axa yel c'apax aj eb tu' satak Abisai, a ton is yuẍtak Joab; max octok eb amonita tu' colon ba yul is conob eb tu'. Axa meltzoj Joab yetok eb is soldado bay Jerusalén.

¹⁶A yet max yilontek eb sirio tol mayal ayc'ay eb yuj eb israel, max yaontok eb chekbej bay eb yet sirioal eb ayic' bay junxa k'axepal a' Éufrates. A Sofac, a' ayoc yajawilok eb soldado yet rey Hadad-ezer.

¹⁷Palta max al-lay juntzan ti' bay cham rey David, xan max wajbaj oc cham masanil eb israel junelxa, cax max k'axpoj ec'tok eb bay a' Jordán, max apni oc eb xin, axa yoc eb yak'on owal yin eb tu'. Max watx'nen oc cham rey David tu' is soldado satak eb sirio, caytu' max yun yak'len eb owal yetok eb.

¹⁸Axa max yun xin, max elaj eb satak eb israel tu'. Ay 40,000 eb soldado chi beyi max cami, c'al 7,000 eb chi toj yetok carruaje. Max cam c'apax Sofac is yajawilal eb soldado.

¹⁹A yet max yilon eb ayoc yetok rey Hadad-ezer, tol mayal ayc'ay eb yuj eb israel, max yaon oc ba eb yin junc'ulalil yetok cham rey David, max can eb yul k'ab. Ataxc'al yet tu' majxa yal c'ul eb sirio tu' max colwaj yetok eb amonita.