Read Q'anjob'al 1 Cr 20 Bible Online

1 Cr 20 - Q'anjob'al bible

1 Cr 20

¹A yet junxa abil, a ton yet tiempoal chi tojc'alta' eb rey yin owal, max cancan cham rey David bay Jerusalén, axa Joab max wajontok eb soldado yet israelal yin yetnentok is tx'otx'al eb amonita. Max tojc'al yoymanej conob Rabá, max yak'on owal yin, masantac'al max yal lajwican ay yuj.

²Lajwi tu' max apni cham rey David yiontek is corona is reyal eb amonita tol naba oro, xiwilxa ch'en ch'en watx' yili ayoc yin, tol oxeb arroba wal yalil. Axa yaon aj eb yin jolom cham rey David tu'. Xiwilxa tzet yetal tol ay is tojol max yieltek cham bay jun conob tu'.

³Axa masanil juntzanxa eb anima maxto cancan bay tu xin, max ilay el eb yuj, max alay oc eb yin mulnajil yetok sierra, yetok ch'en ibal el bak' trigo, c'al yetok echej. Ac'ala', axca tu' max yun cham rey David yetok eb amonita bay juntzanxa conob. Lajwi tu' max meltzojtek yetok masanil is soldado bay Jerusalén.

⁴Lajwi tu' max oc jun owal yetok eb filisteo bay Gezer. A yin jun owal tu', a Sibecai aj Husa max mak'on cam Sipai, a jun tu' yinatil eb winak tol mimek is tel. Caytu' max yun cancan eb filisteo yalan yikbej Israel.

⁵Max oc junxa owal yin eb filisteo; a yet tu' axa Elhanán c'ajol Jair, max mak'on cam Lahmi, is yuẍtak Goliat aj Gat. Caw wal miman yin teal is lanza, axca mi yin te te' bay chi bac'lay oc an tx'al yet eb chemwom.

⁶A bay Gat tu' max oc junxa owal. Ay junxa winak bay tu' caw wal tol miman is tel, tol ay 12 yiximal k'ab c'al 12 yiximal yakan; yinatil eb mimek tel.

⁷A jun winak tu' max buchwaj yin eb israel, xan max mak'lay cam yuj Jonatán is c'ajol Simea, yuẍtak cham David.

⁸A juntzan mimek winak ti', yinatil Refa, aj Gat eb; palta max ayc'ay eb yuj David yetok eb is soldado.