Read Q'anjob'al 1 Cr 24 Bible Online

1 Cr 24 - Q'anjob'al bible

1 Cr 24

¹Yin c'apax txolilal chi yun yilon eb yinatil Aarón tu' yopiso. A eb c'ajol Aarón tu': a ton Nadab, Abiú, Eleazar c'al Itamar.

²Palta a Nadab yetok Abiú, babel max cam eb satak is mam, c'amtoc'al c'ajol eb, xan asan Eleazar yetok Itamar max oc yin sacerdoteal.

³Max pojlay ec' eb sacerdote yin makquiltakil yuj cham David, yetok colwal Sadoc yinatil Eleazar, c'al Ahimelec yinatil Itamar.

⁴Palta max yiltek eb tol a yinatil Eleazar xiwil bisil eb yintak eb yinatil Itamar, xan max pojlay ec' eb yet chi oc 16 makan yetok yinatil Eleazar, palta asan 8 makan yetok yinatil Itamar.

⁵Yin suerteal max yun chaon junjun makan is turno, yujtol ay eb mimek winak sic'bil oc yin mimek opiso satak Dios xol yinatil Eleazar, c'al xol yinatil Itamar.

⁶A eb yajaw yayji xol eb yinatil Eleazar, c'al yetok eb yinatil Itamar, max yi eb suerte yin txolilal, jun yin yet Eleazar, jun c'apax yin yet Itamar, axcac'al tu' max yun beytok eb yin opiso tu' masanil. Axa Semaías c'ajol Natanael, jun levita ajtz'ib, max tz'iben is bi eb atac'ala' is turno eb max yi eb yin suerteal. Axa cham rey yetokc'al eb ayoc yin opiso yetok, eb sacerdote, a ton Sadoc c'al Ahimelec c'ajol Abiatar, yetokc'al eb yajaw yayji xol eb sacerdote c'al xol eb levita, testigo masanil eb tu'.

⁷A ton listail is bi junjun makan yin txolilal ti', atac'ala' max yun yeloc is turno yin suerteal: 1) Joiarib, 2) Jedaías, 3) Harim, 4) Seorim, 5) Malquías, 6) Mijamín, 7) Cos, 8) Abías, 9) Jesúa, 10) Secanías, 11) Eliasib, 12) Jaquim, 13) Hupa, 14) Jesebeab, 15) Bilga, 16) Imer, 17) Hezir, 18) Afses, 19) Petatías, 20) Hezequiel, 21) Jaquín, 22) Gamul, 23) Delaía, 24) Maazías.

¹⁹Caytu' max yun pojlay ec' is turno eb sacerdote yin yak'wi serbil eb bay templo, atac'ala' leyal Jehová co Diosal ayon Israel on ti', axca max yun yalon bay Aarón is yichmam eb.

²⁰A ton is bi eb yajaw yayji xol juntzanxa eb yinatil Leví ti': Jehedías yinatil Subael titnak yin yinatil Amram.

²¹A Isías babel xol eb yinatil Rehabías.

²²Jahat yinatil Selomot titnak yin yinatil Izhar.

²³Jerías, Amarías, Jahaziel c'al Jecamán, yinatil Hebrón eb ti', atac'ala' is k'inal eb yin txolilal.

²⁴Samir yinatil Micaía titnak yin yinatil Uziel.

²⁵Zacarías c'ajol Isías is yuẍtak Micaía.

²⁶Mahli, Musi, c'al Jaazías, c'ajol Merari eb.

²⁷Beno, Soham, Zacur, c'al Ibri, c'ajol Jaazías eb, titnak yin Merari.

²⁸Cawan is c'ajol Mahli, a ton Eleazar c'al Cis. A Eleazar tu', c'am is c'ajol. A pax Cis xin, ay jun is c'ajol, a ton Jerahmeel.

³⁰A eb c'ajol Musi, a ton Mahli, Edar c'al Jerimot. A ton eb tu' yajaw yayji xol eb yinatil Leví.

³¹A eb tu' max cha c'apax eb is turno yin opiso yin suerteal axca max yun eb yican eb, a ton eb yinatil Aarón. A ton bay satak cham rey David, yetok Sadoc c'al Ahimelec c'al eb yajaw yayji xol eb yinatil Leví, c'al eb sacerdote, a tu' max oc suerte tu'. Lajanc'al max utlay eb yajaw yayji xol yinatil nak babel winak, c'al xol yinatil nak tzunan.