Read Q'anjob'al 1 Cr 26 Bible Online

1 Cr 26 - Q'anjob'al bible

1 Cr 26

¹A yet max pojlay ec' is turno eb taynem puerta, caytu' max yun axca ti': A eb yinatil Coré: a ton Meselemías, c'ajol Coré yinatil Asaf.

²Eb c'ajol Meselemías yin txolilal: a ton Zacarías, Jediael, Zebadías, Jatniel,

³Elam, Johanán c'al Elioenai.

⁴Max yak' Dios is watx'c'ulal yiban Obed-edom xan xiwil yuninal. A ton eb is c'ajol yin txolilal ti': a ton Semaías, Josabad, Joa, Sacar, Natanael, Amiel, Isacar, c'al Peultai.

⁶A Semaías, is c'ajol Obed-edom, ay eb is c'ajol caw wal mimanbil max yun yeloc eb xol yican, yujtol caw wal jelan eb.

⁷A eb c'ajol Semaías: a ton Otni, Rafael, Obed, Elzabad, Eliú c'al Samaquías; caw wal jelan eb.

⁸A masanil juntzan ti', yinatil Obed-edom c'al eb, masanil eb c'ajolej, c'al eb icanejal, caw wal tec'an eb, ay yip eb mulnaji. Ay 62 yinatil Obed-edom tu' yin masanil.

⁹Eb is c'ajol, c'al eb yican Meselemías, ay waxaklajonwan winak tol caw wal jelan.

¹⁰A eb is c'ajol Hosa, yinatil Merari: a ton Simri, a' ayoc yajawilal. Caxc'al manak babel c'ajolej yayji, a is mam max aon oc yin yajawilal.

¹¹Axa Hilcías yet is cab, Tebalías yet is yox, c'al Zacarías yet is can. A eb is c'ajol c'al eb yican Hosa, oxlajonwan eb yin masanil.

¹²A yin makquiltakil max yun pojchaj ec' eb taynem templo, atac'ala' yichmam eb, cax max tx'oxlay is mulnajil eb bay templo, axcac'al max yun juntzanxa eb yet levitail eb.

¹³Yin suerteal max yun tx'oxlay tzet puertail chi taynej junjun makan eb, caxc'al ach'ej ma icham winak.

¹⁴A Selemías, yetok eb ayoc yetok max taynen puerta bay yetc'ulal bay chi ajol c'u, axa Zacarías is c'ajol tol aj nabal, max taynen puerta bay norte, yetok eb ayoc yetok.

¹⁵A Obed-edom, yetok eb ayoc yetok, a eb max taynen puerta bay sur; axa eb is c'ajol max taynen c'uanbal templo.

¹⁶Axa Supim, c'al Hosa yetok eb ayoc yetok eb, max taynen puerta bay yetc'ulal yayubc'u, a ton bay ay jun puerta yet Selequet bay chi ajtok be. A eb ayoc yetok eb ikbajwom tu', yin txolilal chi yun taynen eb puerta.

¹⁷Junjunc'al c'u, ay wakwan chi taynen puerta bay yetc'ulal bay chi ajol c'u, canwan bay norte, canwan c'apax bay sur, axa pax bay c'uanbal templo tu xin, catakwanc'al chi taynen junjun puerta.

¹⁸Axa bay cawilal tentail bay yetc'ulal yayubc'u, canwan chi taynen bay ti' be, cawan chi taynen bay tentail tu'.

¹⁹Axca ton tu' max yun pojlay ec' opiso tu' xol eb yinatil Coré c'al yet Merari.

²⁰Ay c'apax juntzanxa eb yet levitail eb chi ilon c'uanbal bay templo, c'al bay wajan ofrenda tol yet Jehová yayji ocok.

²¹Axa pax eb c'ajol Laadán, a ton eb max tit yin yinatil Gersón c'al Jehiel.

²²A eb c'ajol Jehiel, a ton Zetam c'al Joel. A eb chi taynen is c'uanbal templo, yetok eb ayoc yetok eb.

²³Max ak'lay c'apax mulnajil eb yinatil Amram, a ton eb yinatil Izhar, Hebrón, c'al Uziel.

²⁴A jun mac ay wal oc yiban yilon juntzan is beyomalil templo, a ton Sebuel, yinatil Moisés, titnak yin yinatil Gersón.

²⁵A Sebuel ti', yican ba yetok Selomit, yujtol a yichmam Selomit tu', a ton Eliezer is yuẍtak Gersón, is yichmam Sebuel. A eb yichmam Selomit yin txolilal: a ton Eliezer, Rehabías, Jesahías, Joram, c'al Zicri.

²⁶A Selomit, yetok eb yican chi taynen tzet yetal ak'bil bay Dios yuj cham rey David, yuj eb yajaw yayji xol junjun makan, c'al junjun tribu, c'al yuj eb mimek yopiso xol eb soldado.

²⁷A juntzan tzet yetal tu', a ton tzet max yi eb bay max occ'al owal, max yak' eb yuj k'anabax bay templo.

²⁸Ay c'apax ec' bay tu' masanil tzet yetal max yak'can eb ti': cham Samuel chekbej Dios, cham Saúl c'ajol Cis, cham Abner c'ajol Ner, c'al cham Joab, yune' xal Sarvia. Masanil juntzan tzet yetal sic'bil el tu', a Selomit yetokc'al yican chi tayneni.

²⁹Yin eb yinatil Izhar titnak Quenanías, eb is c'ajol c'al yetok eb yican. A eb tu', manxanak bay templo ayoc eb yin yopiso; palta ayoc eb yin juezal, c'al yilomalok conob Israel.

³⁰A ton Hasabías, yetok eb yican, yinatil Hebrón eb. A eb tu', yilomal Israel yayji bay yetc'ulal yayubc'u bay a' Jordán, a ton yuj yilon eb tzet yetal tol yet Jehová yayji ocok, c'al masanil tzet yetal tol yet cham rey yayji. Ay 1,700 eb winak caw wal jelan.

³¹A yet 40 abilxa yoc cham rey David yin reyal, max saylay il-lay listail anima bay junjun lugar. A yet tu' max il-layi, tol ay eb yinatil Hebrón caw wal jelan bay Jazer, yul yet Galaad. A jun yajaw yayji yin yinatil Hebrón tu', a ton Jerías.

³²Max ajapnok bisil eb yin 2,700 eb yajaw yayji xol yican. Max alay oc yiban eb yuj cham rey David, tol a eb chi ilon eb tribual Rubén, eb tribual Gad, c'al yetok nan is tribual Manasés. A is mulnajil eb tu', a ton yilon eb tzetak yetal yet Dios yayji, c'al yetok tzet yetal yet cham rey.