Read Q'anjob'al 1 Cr 29 Bible Online

1 Cr 29 - Q'anjob'al bible

1 Cr 29

¹Max lajwi tu', max yalon cham rey David bay masanil eb anima wajan ec' tu': Ex wet conob, a jun in c'ajol Salomón ti' max sic'lay el yuj Dios. Unin ach'ejto nak, axa pax jun mulnajil ti', caw wal tol miman yayji ocok, yujtol man is despachook junok winak; palta a jun ti', tol templo Jehová Dios yayji.

²Max wak' wal wip in wajban masanil tzet yetal ok k'anlay yin templo co Diosal; axca oro, plata, bronce, hierro c'al te te', atac'ala' tzet ok k'anabax yin junjun makan mulnajil; yetok c'apax ch'en cornalina, c'al juntzanxa ch'en ch'en chi oc yin yelbubal, yetok xiwil makanil ch'en ch'en watx' yili, cax xiwil ch'en alabastro.

³A yiban juntzan tzet yetal max in wajbaj yuj watx'jubal templo, chin sa' c'apax oro c'al plata tol wet yul wet, yujtol caw wal miman in camc'ulal yin templo in Diosal.

⁴Chi wak' 2,300 quintal ch'en oro yelxac'al watx', yetok 5,300 quintal ch'en plata, ch'en tol caw wal watx' cawxi, yet chi oc yin satlak pared,

⁵c'al yin tzanc'al tzet mulnajilal ok watx'nej eb mulnajwom yin oro, ma yin plata. Axa tinani' xin, ¿mac ex wal bekan e c'ul e yak'on e colwal bay Jehová? ẍi cham rey.

⁶Yuj tu xin, a eb yajaw yayji xol yican, c'al eb yajaw yayji yin junjun tribual eb yet israelal, yetokc'al eb yajaw yayji yin eb chi toj yin owal, yetokc'al masanil eb yajaw yayji yin masanil mulnajil chi watx'ji yuj cham rey, masanil eb tu', max el wal yin c'ul yak'on is colwal.

⁷Max yak' eb yin watx'jubal templo: 3,800 quintal ch'en oro, yetok 7,600 quintal ch'en plata, yetok 13,500 quintal ch'en bronce, yetok c'apax 75,000 quintal ch'en hierro.

⁸Yetok c'apax eb ay ch'en ch'en watx' yili bay, max yak' eb bay tesoreríail templo tu'. A Jehiel yinatil Gersón ayoc yiloni.

⁹Caw wal max tzaloj masanil anima yuj jantak tzet max yak' eb yajaw tu', yujtol yin masanil c'ul eb max yak'on eb masanil juntzan tzet yetal tu' bay Jehová. Yetok c'apaxok caw wal max tzaloj cham rey David yetok eb.

¹⁰Xan max yal cham rey David watx' k'anej yin Jehová satak masanil conob tu', max yalon axca ti': Mamin Jehová, co Diosal ach, yetok jichmam Israel, al-layokab watx' k'anej en yin tojbalk'inal,

¹¹yujtol ach ti', caw wal miman elapnok, ay epalil, ay a tzekekial, miman yayji oc ekbej, c'al a mayk'ak'al bay masanil satcan, c'al bay masanil sat tx'otx' ti', yujtol et yayji, Yajaw ach yin masanil.

¹²A ayach chi tit masanil beyomal c'al ibilcanilal. Ach Yajaw ach yiban masanil. A yul a k'ab ay masanil ipejal. Ach chi je' ak'on c'apax mimanbilal c'al ipejal bay masanil.

¹³Yuj wal tu xin, xan chi jal yuj diosal, c'al jalon co watx' k'anej ayach ach co Diosal, yuj a mayk'ak'al.

¹⁴Wal yel, ayin ti' yetokc'al eb wet conob ti', c'am wal jabok tzet chi je' co saon ayach. Yujtol masanil juntzan ti' chi tit bay ayach, xan asan tzet chi co cha' ayach chi je' jak'oni.

¹⁵Yujtol ec'jabwomc'al jayji on a satak Mamin. Lajan onc'al axca max yun yec'lej eb jichmam on. A jiquisal bay yiban tx'otx' tx'otx' ti', lajanc'al axca enelej, cax c'am chon mayji on.

¹⁶Yuj wal tu xin, ach co Diosal, et yayji oc masanil juntzan beyomal ti'. A ayach chi tit masanil juntzan tzet yetal chi co wajbaj yuj co watx'nen aj junok templo yuj ach jion can.

¹⁷Wojtak wal Mamin, tol cha beyc'ulnej el nabalej, asan wal tojolal chi cha a c'ul. Yuj tu' xan yin wal in watx' nabalil chi yun wak'on juntzan ti' yul a k'ab. A tinani', chi wil yin tzalojc'ulal tol a masanil eb a conob wajan ec' cayti', yin wal masanil c'ul eb chi yak'on eb yofrenda ayach.

¹⁸Mamin Jehová, co Diosal ach yetok Abraham, yetok Isaac c'al yetok Israel, a ton eb jichmam on tu'. Ak'c'al ayjok yin is nabal eb a conob ti' tol chi elc'al yin c'ul eb yak'oni, cax chi yaon wal oc eb c'ul en.

¹⁹Chi wochej wal tol chak' nabal in c'ajol Salomón ti', yet chi yikej masanil a chekbanil yin masanil is c'ul, yetokc'al jantak a ley, cax chi beybalneni, yet ok je' watx'nen aj jun miman na max in wajbaj can is mitx'k'abil ti', ẍi cham rey David.

²⁰Max lajwi tu' max yalon pax cham rey David bay eb conob axca ti': A tinani' ex wet conob, alek watx' k'anej bay Jehová co Diosal, ẍi cham. Xan max yal masanil eb conob watx' k'anej bay Jehová Dios, a ton is Diosal yetok eb yichmam. Max ay jajan eb c'al yay nojan eb satak Dios yet ayic' eb satak cham rey.

²¹Axa yet junxa c'ual xin, max yak'on tz'a eb xajanbal bay satak Jehová: 1,000 no ach'ej wacax, yetok 1,000 no icham calnel, c'al 1,000 no yune'tak calnel, yetok vino chi ak'layc'alta' yetok junjun makan no'. Xiwilxa xajanbal max watx'ji yet chi chi' masanil eb israel.

²²A wal yet jun c'ual tu', max low eb c'al yuq'uena' eb yin tzalojc'ulal satak Jehová. Max lajwi tu', max ca watx'nen oc eb Salomón, c'ajol David yin reyal. Max bonon eb is jolom yetok aceite satak Jehová, yin yoccan is yajawilok eb. Max bonon c'apax eb Sadoc yin yoccan sat sacerdoteal.

²³Caytu' max yun yoctok Salomón yin reyal q'uexelok is mam yin ikbej max yak' Jehová. Caw wal watx' max eloc yin is yikbej tu'. Masanil conob Israel caw wal max yikej eb bay.

²⁴Masanil eb yajaw yayji, c'al eb soldado, yetokc'al juntzanxa eb c'ajol cham rey David, max yak' eb ti' yiken bay cham rey Salomón.

²⁵Max ilay wal can Salomón yuj Jehová satak conob Israel, max yak' wal Cham mimanbilal bay is yilbej. C'am junok reyal Israel yet yalantok tol caytu' binaji.

²⁶Cawinak abil max yak' cham David c'ajol Isaí, reyal yiban conob Israel; 7 abil max yak' reyal bay Hebrón, 33 abil max yak' reyal bay Jerusalén.

²⁸Max cam yin icham winakil yin tzalojc'ulal, caw wal beyom, c'al miman yelapnok. Axa Salomón is c'ajol max occan q'uexelok yin reyal.

²⁹A yabixal cham rey David ti', yettax yichbanil masantac'al lajubal, a tu' tz'ibbilcan bay yul tx'an un yet cham Samuel, cham Natán, c'al cham Gad, is chekbej Dios.

³⁰A tu' tz'ibbilcan masanil tzet max yun yin is yikbej, is mimanbilal, c'al masanil tzetak yetal max ec'tok yiban, c'al yiban Israel, yetokc'al yiban juntzanxa nación.