Read Q'anjob'al 2 Cr 12 Bible Online

2 Cr 12 - Q'anjob'al bible

2 Cr 12

¹A yet max yion yip Roboam yin yikbej, caw wal tec'anxa max yabej, max bekon yiken is ley Jehová. Caytu' max yun masanil eb yet conob.

²Caw wal tol tenomtak max yut ba eb bay Jehová xin, xan a yet oyebxa abil yoc Roboam yin reyal, a Sisac reyal Egipto max jayoc yak'on owal yin Jerusalén.

³Max jayoc yetok 1,200 carruaje yet owal, yetok c'apax 60,000 soldado ayoc yiban chej, c'al yetok junxa miman bulan soldado c'amxa chi bischaji. A eb aj Libia, eb aj Suka, c'al eb aj Etiopía max tit yetok bay Egipto.

⁴Max ayc'ay conoblak tol ayoc is murallail bay Judá yuj, masantac'al max jayoc eb bay Jerusalén.

⁵Xan max oc cham chekbej Dios chi yik Semaías satak cham rey Roboam yetok eb yajaw yayji xol eb aj Judá maxax waj ba bay Jerusalén, tol elnak aj satak Sisac, max yalon axca ti': —Chi yal Jehová axca ti': Yujtol max in e bekcanok, yuj tu' xan mayal quex in bekcan bay yul k'ab rey Sisac, ẍi Jehová, ẍi Semaías.

⁶A eb yajawil yayji xol conob, c'al yetok reyal eb, yinxac'al ayilal max yojtaknej el eb is tenomtakil, max yalon eb axca ti': —Tojol tzet chi yun Jehová jin, ẍi eb.

⁷A yet max yilon Jehová tol ayilal chi yut ba eb, max yalon Cham bay Semaías: Yujtol max yut ba eb yin ayilal, xan man ok wak' c'ayil eb, palta txennej ok yun ex in coloni, majxa in k'anbalnej Sisac yin wion el masanil yowal in c'ul yin conob Jerusalén ti'.

⁸Asan xin, ok can eb yul k'ab Sisac tu', yet watx' ok nachaj el yuj eb, tol tx'ok yel yin quin yak'on serbil eb, tx'ok c'apax yel yin yak'lay serbil eb reyal nacionlak, ẍi Jehová.

⁹Caytu' max yun jayoc Sisac reyal Egipto yak'on owal yin Jerusalén. Max yion masanil beyomal c'uan bay templo, c'al bay despacho cham rey. Masanil max yieltek, max yion c'apaxtok juntzan makbal julbalej naba oro watx'nebil yuj cham rey Salomón.

¹⁰Axa bronce max k'anbalnej cham Roboam yet chi watx'nej makbal julbalej is q'uexelok juntzan tu', max yak'on taynej eb chi taynen bay chon octok bay despachoal rey.

¹¹Junjuntakc'al el chi toj cham rey bay templo Jehová, chi yiontok eb chi taynen tu' juntzan makbal julbalej. Axa yet chi lajwi tu', cax chi yion paxtek eb bay is cuartel eb.

¹²Yuj tu xin, yujtol max yiay ba Roboam, xan max ay tananok yowal c'ul Jehová yiban. Maj yak' lajwok Cham masanil, watx'xac'al max yuncan bay Judá.

¹³Max yi pax yip cham Roboam junelxa bay Jerusalén, max yak'onc'al reyal bay tu'. 41 abil is k'inal yet max chaon oc yak'on reyal; 17 abil max yak' reyal bay Jerusalén, a ton jun conob tu' sic'bil el yuj Jehová xol is tribual Israel yet chi cajay ec' bay tu'. A is txutx Roboam tu', chi yik Naama, aj Amón xal.

¹⁴Caw wal yob is beybal Roboam tu' yujtol maj wal yaoc yin c'ul yiken bay Jehová.

¹⁵A is yabixal Roboam yet yichbanil c'al is lajubal, yetokc'al listail eb yuninal, a tu' tz'ibbil bay yul tx'an un yet Semaías c'al yet Iddo, eb is chekbej Dios.

¹⁶Caw wal max occ'al Roboam yin owal yetok Jeroboam.

¹⁷A yet max cam Roboam, max muklay bay conob David; lajwi tu' max occan Abiam is c'ajol yin reyal is q'uexelok.