Read Q'anjob'al 2 Cr 15 Bible Online

2 Cr 15 - Q'anjob'al bible

2 Cr 15

¹A jun chekbej Dios chi yik Azarías is c'ajol Obed, max oc Yespíritu Dios yin,

²xan max eltok chaon cham Asa, max yalon bay axca ti': Ab tzet ok wal ayach mamin Asa, c'al masanil ex wet conob Judá, c'al ex yinatil Benjamín: A ton wal Jehová ayoc e yetok, tatol ac'al yetok Cham ayex ocok. Ta asan bay chex tewi, tutun ok tak'wokc'al Cham ayex, palta tatol ok e bekcan xin, ok ex beklay c'apax can yuj.

³A co conob ti', mimanxa tiempoal max beytek yin manxanak acaw Dios ayic' yetok, c'amxa eb sacerdote chi cuywaji, c'amxa cuybanilej.

⁴Axa yet max jayoc yailal jiban, max on meltzoj pax oc yul k'ab Jehová co Diosal, cax max on col-lay el yuj Cham.

⁵A yet jun tiempoal tu', c'amxa junc'ulal mac chi ec'jabi, c'amxa chi txecloj ikbej xol masanil nacionlak.

⁶Ay juntzan nacionlak, c'al juntzan conoblak max yak'lej c'ayil ba eb, yujtol a Dios max ak'on somchaj c'ul eb yuj mimek yailal.

⁷Palta ayex ti' xin, tec'an che yut e ba, manchak cabax aj e c'ul, yujtol a e mulnajil ti', ok paktzelay ayex, ẍi Azarías bay eb.

⁸A yet max yaben cham rey Asa jun k'anej max yal is chekbej Dios tu', max yion wal yip. Caytu' max yun yion wal el masanil juntzan yechelej ay bay yul yet Judá, c'al yul yet Benjamín, c'al yetok bay yulak juntzan conoblak max yican ec' bay siquilal tx'otx' yul yet Efraín, cax max ca watx'nen aj jun altar ay satak tentail templo Jehová.

⁹Lajwi tu xin, max wajban oc masanil eb yet Judá, c'al eb yet Benjamín, yetokc'al juntzanxa eb titnak bay yul yet Efraín, Manasés, c'al Simeón, tol jaynak oc cajan xol eb, yujtol xiwil eb israel max ec'tek yetok Asa, yujtol max yil eb tol ayoc Jehová Dios yetok.

¹⁰A yet yox xajaw, yet 15 abilxa yoc Asa yin reyal, max wajban oc ba eb bay Jerusalén.

¹¹A yet jun c'ual tu' max yak'on eb xajanbal bay Jehová. 700 no wacax, c'al 7,000 no calnel max yak' eb yin xajanbalil, a ton no' max yican ec' eb bay eb ajc'ul.

¹²A yet tu', max yak' eb ti' tol asan Jehová is Diosal eb yetok yichmam, ok yak' serbil.

¹³Max yak'on c'apax eb ti', tatol ay mactxel tol manak Jehová is Diosal chi yak' serbil, caxc'al icham anima ma unin, winak ma ix, a juntzan tu' yowalil chi cami.

¹⁴Max yak' eb ti' yin aw yet tzalojc'ulal, c'al yetok nuk' trompeta, c'al yetok cacho.

¹⁵Masanil eb yet Judá max tzaloj yuj is ti' eb max yak' tu', yujtol yetok masanil c'ul eb max yak'on eb ti', cax max el wal yin c'ul eb yak'on serbil Jehová. Yuj tu xin, max tx'ox wal Cham is colwal bay eb, caytu' max yun yayji junc'ulalil xol eb yetok masanil nación cajan is cawilal eb tu'.

¹⁶Yetok c'apaxok, max yion el Asa tu' is mimanbilal Maaca is txutx ixnam, yujtol max yak' xal watx'jok jun yechel Asera. Coc'xac'al max yut Asa jun yechelej tu', max yak'on tz'a bay ti a' aej chi yik Cedrón.

¹⁷Caxc'al maj yiel juntzan lugar yet ayilal bay can ayajok bay Israel, palta a cham Asa yikemc'al max yut ba bay Jehová.

¹⁸Max yaon octok yul templo masanil ch'en oro, c'al ch'en plata max yak' bay Jehová c'al ch'en max yak' c'apax is mam.

¹⁹C'amc'al owal max oqui, masantac'al yet 35 abilxa yoc Asa yin reyal.