Read Q'anjob'al 2 Cr 17 Bible Online

2 Cr 17 - Q'anjob'al bible

2 Cr 17

¹Axa Josafat, is c'ajol Asa max oc yin reyal is q'uexelok. Tec'an max yut ba yin colon ba bay Israel.

²Max yaoc soldado bay masanil conoblak ayoc is murallail yul yet Judá. Max ayji destacamento bay masanil yul makbej Judá tu', c'al bay juntzan conoblak yul yet Efraín, a ton juntzan tu' max yican ec' cham Asa.

³Max occ'al Jehová yetok cham Josafat, yujtol lajan max yut is beybal axca max beybalnej cham David, is yichmam yet babelal. Majc'al yak' serbil juntzan yechel Baal,

⁴palta tol a is Diosal yetok yichmam max yak' serbil, max yikej wal is chekbanil. Majc'al tzakloj yintak is beybal eb aj conob Israel.

⁵Yuj tu' xan watx' max yun yayji ec' yin yikbej yuj Jehová. Masanil eb aj Judá tu' max yak' eb sabalej bay, yuj tu' xan caw wal max aj wal can is beyomal, yelxac'al mimanbil max yunej.

⁶Yin masanil is c'ul max tzaklojc'al yintak is cuybej Jehová, max yion c'apax el juntzan lugar yet ayilal bay can ayajok, c'al masanil juntzan yechel Asera.

⁷Oxebxa abil yoc yin yajawilal, max chekontok juntzan eb mimek yajaw yayji: a ton Ben-hail, Abdías, Zacarías, Natanael, c'al Micaías yet chi toj cuylay eb anima bay yul is makbej.

⁸Max toj c'apax juntzan eb levita ti' yetok eb: Semaías, Netanías, Zebadías, Asael, Semiramot, Jonatán, Adonías, Tobías, c'al Tobadonías. Ajun c'apax eb sacerdote ti' yetok eb, a ton Elisama c'al Joram.

⁹Max cheklaytok eb ti' yetok tx'an yunal ley Jehová, yet chi toj cuylay eb anima bay masanil conoblak yul yet Judá.

¹⁰Yuj tu xin, a masanil nacionlak ay cawilal Judá tu' max xiw eb bay Jehová, majxa oc eb yin yak'on owal yin Josafat.

¹¹Axa max yunej, toltax ay eb filisteo max yitek sabalej, c'al ch'en plata yin tojlabalil bay Josafat. Ilab c'apax eb árabe, max yitek eb 7,700 no calnel; ac'ala' cay c'apax tu' bisil no chiwo max yitek eb bay.

¹²Cay wal tu' max yun yion yip Josafat. Max watx'nej aj conoblak ayoc is murallail bay Judá.

¹³Xiwil loj c'uan yuj bay juntzan conob tu'. Ay c'apax is soldado caw wal jelan max ayji ec' bay Jerusalén.

¹⁴Tix listail is soldado ti' atac'ala' is tribual: A Adnas yajaw yayji xol eb soldado yinatil Judá. 300,000 eb soldado wal tol jelan.

¹⁵Axa yet is cab yajaw a ton Johanán, a jun tu' yajaw yayji yin 280,000 soldado.

¹⁶A yet is yox yajaw, a ton Amasías, is c'ajol Zicri; a jun ti' tol max el wal yin c'ul yaon oc ba yin yak'on serbil Jehová, yetok 200,000 soldado caw wal jelan.

¹⁷A Eliada yajaw yayji xol eb soldado yinatil Benjamín, caw wal jelan cham yin ak'oj owal, yetok 200,000 winak ibil oc is julbal, c'al yetok makbal julbalej.

¹⁸Axa Jozabad yajaw yayji yin 180,000 soldado watx'xa yayji is mitx'k'ab yin owal.

¹⁹A masanil juntzan ti' ayoc yalan yikbej cham rey, c'amoc eb ayic' bay conoblak ayoc is murallail yul yet Judá tz'akilok eb ti'.